ကချင်ပြည်နယ် ဖားကန့်မြို့ ဆိုင်းတောင်ရပ်ကွက်ရှိ ကချင်လွတ်လပ်ရေးအဖွဲ့(KIO) တိုက်နယ်ရုံးကို စစ်ကောင်စီတပ်က ဇွန်လ ၂၀ရက်ညပိုင်းတွင် ဝင်ရောက်စီးနင်း တိုက်ခိုက်ခဲ့သည်ဟု ဖားကန့်ဒေသခံက ပြောသည်။
ဒေသတွင်း ကချင်သတင်းဌာန KNG ၏ ဖော်ပြချက်တွင် အဆိုပါ တိုက်ခိုက်ခံရမှုအတွင်း ၁၂ဦး ထိခိုက်မှုရှိခဲ့ပြီး ယင်းအနက် သုံးဦးသေဆုံးကာ ထိခိုက်ဒဏ်ရာရသူများ ဖမ်းဆီးခံရသူများရှိသည်ဟု ဆိုသည်။
ယင်းနှင့်ပတ်သက်၍ ဖားကန့်ဒေသခံသတင်းရင်းမြစ်တစ်ဦးက “နည်းနည်းအပစ်အခတ် ဖြစ်တယ် လို့ ကြားတယ်။ မနေ့ကညက နဲ့ ဒီနေ့မနက်ပိုင်းလေး ဖြစ်တယ်လို့ကြားတယ်”ဟု ဇွန်လ ၂၁ရက် တွင် People’s Spring သို့ ပြောသည်။ ထိခိုက် သေဆုံးအခြေအနေ အသေးစိတ် မသိရသေးဟု ၎င်းက ပြောသည်။
ကချင်သတင်းရင်းမြစ်တစ်ဦးကလည်း” ကျနော်တို့လည်း သတင်းလိုက်စုံစမ်းနေတာ။ သုံးယောက်သေတယ် ၇ယောက်က ဒဏ်ရာရတယ်ပြောတယ်”ဟု ပြောသည်။ သေဆုံးထိခိုက်သူများမှာ KIO ဝန်ထမ်းများ ဟုတ်၊မဟုတ် မသိရသေးဟု ဆိုသည်။
Public Service Announcement
အဆိုပါဖြစ်စဉ်နှင့်ပတ်သက်ပြီး KIO သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်ပြီး အဆက်အသွယ်မရသေးပေ။
အဆိုပါရုံး၌ KIOက ဖမ်ဆီးထားသူ ၂၀ ကျော်ရှိပြီး ၎င်းတို့ကို စစ်ကောင်စီက ဖမ်းဆီးသွားကြောင်း၊ ထို့ပြင် အနီးဝန်းကျင်၌ နေထိုင်သူများကိုပါ စစ်ကောင်စီတပ်က ဖမ်းသွားကြောင်း ကချင်ဒေသ သတင်းဌာနများက ဖော်ပြထားသည်ကို တွေ့ရသည်။
ဒေသတွင်း မီဒီယာတစ်ခုဖြစ်သည့် The 74 Media တွင် စီးနင်းတိုက်ခိုက်ခံရသည့် ရုံးကို စစ်ကောင်စီတပ်က မီးရှို့ဖျက်ဆီးခဲ့သည့် ဓာတ်ပုံမှတ်တမ်းများကိုပါ ဖော်ပြထားသည်။
