ကရင်နီ(ကယား) ပြည်နယ်၊ ဖရူဆိုမြို့နယ်အနောက်ခြမ်းကို တိုက်ပွဲဖြစ်ပွားခြင်းမရှိဘဲ စစ်ကောင်စီက လေကြောင်းမှဗုံးကြဲတိုက်ခိုက်ခဲ့ကြောင်း ဒေသခံသတင်းရင်းမြစ်များက ပြောသည်။
ဇွန်လ ၂၁ ရက် ည ၁၂ နာရီကျော်ခန့်က ဖရူဆိုအနောက်ဘက်ခြမ်းရှိ ကျေးရွာတစ်ရွာကို လေယာဉ်ဖြင့် သုံးကြိမ်ထက်မနည်း ဗုံးကြဲတိုက်ခိုက်ခဲ့ခြင်းဟု ဆိုသည်။
“စုစုပေါင်း အိမ်ခြောက်လုံးလောက်ပျက်စီးသွားတယ် ။ကိုယ့်ညီမ အိမ်တစ်လုံးလုံးပျက်စီးတာ။ လူတွေတော့ ဘုရားသခင်ကယ်တယ်”ဟု ဖရူဆိုဒေသခံတစ်ဦးက ပြောသည်။
ဇွန်လ ၅ ရက်မှ ယနေ့အထိ ဖရူဆိုမြို့နယ်တွင် တိုက်ပွဲလုံးဝဖြစ်ပွားခြင်းမရှိခဲ့ကြောင်းလည်း ကရင်နီလူမှုအသင်းအဖွဲ့များကွန်ရက်က အသိပေးသည်။
Public Service Announcement
စစ်တပ်က အာဏာသိမ်းပြီးနောက်ပိုင်း ယခုနှစ်မေလကုန်ပိုင်းအထိ ကရင်နီပြည်နယ်၌ လေကြောင်းတိုက်ခိုက်မှု ပိုမိုလုပ်ဆောင်လာခဲ့ပြီး နှစ်နှစ်အတွင်း လက်နက်ကြီးနှင့် လေကြောင်းတိုက်ခိုက်မှုတို့အပြင် တရားမဲ့သတ်ဖြတ်မှုကြောင့် အရပ်သားပြည်သူ ၁၅၂ဦး သေဆုံးခဲ့ရပြီး၊ ၁၆၂ဦး ထိခိုက်ဒဏ်ရာရခဲ့သည်။
မကြာသေးမီရက်ပိုင်းကလည်း မိုးဗြဲမြို့တွင်း ထိုးစစ်ဆင်နေသော စစ်ကောင်စီတပ်က ရွာသား ၂၈ ဦးအား ရက်ရက်စက်စက်အစုလိုက်၊အပြုံလိုက်သတ်ဖြတ်မှု ကျူးလွန်ထားသည်။
