မွန်ပြည်နယ်နှင့် တနင်္သာရီတိုင်း၌ မိုးကြီးပြီးနောက်ဆက်တွဲ ရေဘေးသတိထားကြရန် NUG ထုတ်ပြန်

ဘင်္ဂလားပင်လယ်အော်တွင် ယခုတစ်ပတ်အတွင်း မုန်တိုင်းငယ်ဖြစ်ပေါ်လာနိုင်ခြင်းနှင့်အတူ မွန်ပြည်နယ်နှင့် တနင်္သာရီတိုင်း၌ မိုးကြီးပြီးနောက်ဆက်တွဲ ရေဘေးသတိပေးချက်ကို အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန (MOHADM)က ထုတ်ပြန်ထားသည်။

မွန်ပြည်နယ်နှင့် တနင်္သာရီတိုင်းအပါအဝင် ကမ်းရိုးတန်းဒေသများ၌ ဇူလိုင်လကုန်အထိ မိုးကြီးနိုင်မည့် သတိပေးချက်ကို MOHADM က ဇူလိုင် ၂၄ရက်တွင် ထုတ်ပြန်ထားခြင်းဖြစ်သည်။

ဘင်္ဂလားပင်လယ်အော်တွင် လေဖိအားနည်းရပ်ဝန်းတစ်ခုဖြစ်နေပြီး ပိုမိုအားကောင်းလာနိုင်ကြောင်း၊ ဇူလိုင် ၂၆ ရက်တွင် မုန်တိုင်းငယ်အဆင့်သို့ရောက်ရှိနိုင်ပြီး အိန္ဒိယနိုင်ငံကမ်းရိုးတန်းဘက်သို့ ဦးတည်ရွှေ့လျားနိုင်သည်ဟု MOHADM က ထုတ်ပြန်ထားသည်။

သို့သော် မုန်တိုင်းငယ်၏အရှိန်ကြောင့် မွန်ပြည်နယ်၊ ကရင်ပြည်နယ်၊ ရခိုင်ပြည်နယ်၊ရှမ်းပြည်နယ်၊ တနင်္သာရီတိုင်း၊ ရန်ကုန်တိုင်းနှင့် ပဲခူးတိုင်းနှင့် ရခိုင်ပြည်နယ်တို့တွင် မိုး‌ကြီးနိုင် ကြောင်းသတိပေးထားသည်။

Public Service Announcement

” ဟိုတစ်ပတ်က ရေဘေးကဒေသခံတွေအတွက် တော်တော် ထိခိုက်သွားတယ်။ ကြိုတင်ပြင်ဆင်နိုင်ခြင်းလည်း မရှိခဲ့ဘူး။မိုးဆက်ကြီးမယ်ဆိုရင် မလွယ်ဘူး”ဟု မော်လမြိုင်မြို့၊ သီရိမင်္ဂလာရပ်ကွက်မှ ‌အမျိုးသမီးတစ်ဦးက ပြောသည်။

လတ်တလော ရာသီဥတုအခြေအနေများကြောင့် မွန်ပြည်နယ်နှင့် တနင်္သာရီတိုင်းအပြင်ရှမ်းပြည်နယ်တောင်ပိုင်း၊ ကရင်ပြည်နယ်အရှေ့ပိုင်းဒေသများ၌ ရေကြီးရေလျှံမှုနှင့် မြေပြိုမှုဘေးအန္တရာယ်များကို အထူးသတိထားပြင်ဆင်နေထိုင်ကြရန် MOHADMက သတိပေးထားသည်။

မွန်ပြည်နယ်နှင့် တနင်္သာရီတိုင်းတွင် ပြီးခဲ့သည့် ဇူလိုင်လလယ်က မိုးကောင်းခဲ့ရာ ရေဘေးကြုံတွေ့ခဲ့ရသည်။

မွန်ပြည်နယ်၊ မော်လမြိုင်၊ ပေါင်၊ ချောင်းဆုံမြို့တို့တွင် ရေကြီးနစ်မြုပ်မှုဖြစ်ပွားခဲ့သည်။ ‌မော်လမြိုင်မြို့တွင် ရေဘေးကြောင့် ကလေးငယ် သုံးဦး သေဆုံးခဲ့ပြီး ပေါင်မြို့နယ်တွင် ‌အမျိုးသားတစ်ဦး တောင်ကျရေ၌ မျောပါပျောက်ဆုံးခဲ့သည်။