မိုးဗြဲ – လွိုင်ကော်နှင့် မိုးဗြဲအရှေ့ဘက်ခြမ်း တိုက်ပွဲများတွင် စစ်ကောင်စီတပ် အထိနာ၊ ယာဥ်နှစ်စီး မီးလောင်

မိုးဗြဲ – လွိုင်ကော်နှင့် မိုးဗြဲအရှေ့ဘက်ခြမ်း တိုက်ပွဲများတွင် စစ်ကောင်စီ ယာဥ်နှစ်စီးမီးလောင်ပြီး သေဆုံးသူလည်းများပြားကြောင်း ကရင်နီဒေသခံစစ်ရေးသတင်းရင်းမြစ်များက ပြောသည်။

အဆိုပါတိုက်ခိုက်မှုဖြစ်စဥ်အရ အောင်ပန်းအခြေစိုက် စစ်ကောင်စီတပ်ရင်းများကို ကရင်နီဒေသသို့ စစ်ကူပို့စဥ် မိုးဗြဲ – လွိုင်ကော်လမ်း၌ ကြားဖြတ်တိုက်ခိုက်ခံရခြင်းဟု ဆိုသည်။

“၂၄ ရက်နေ့က နွားလဝိုးရွာလမ်းခွဲမှာ ကြားဖြတ်တိုက်ခံရတာ။အဲဒီနေ့က စကစ ကားအစီးရေ ၄၅စီး လောက်ရှိတယ်။အောင်ပန်းဘက်ကနေ တပ်ဖြည့်လာတာ။အစုလိုက် မဟုတ်ဘူး။၅ စီးတစ်ဖြတ်၊သုံးစီးတစ်ဖြတ် ဆင်းလာတာမျိုး။အဲဒီကို ကြားဖြတ်တိုက်တာ။စကစ ကားနှစ်စီးမီးလောင်တာတော့ သေချာတယ်”ဟု ကရင်နီစစ်ရေးသတင်းရင်းမြစ်က ပြောသည်။

မိုးဗြဲ – လွိုင်ကော် လမ်းပိုင်းနှင့် မိုးဗြဲအရှေ့ဘက်ခြမ်းရှိ တိုက်ပွဲများတွင် စစ်ကောင်စီတပ်မှ ထိခိုက်သေဆုံးမှုများရှိနေပြီး အသေးစိတ်စာရင်းကို သက်ဆိုင်ရာ တပ်ရင်းများမှ အသိပေးမည်ဟု ကရင်နီအမျိုးသားများကာကွယ်ရေးတပ်(KNDF)တာဝန်ရှိသူက ပြောသည်။

Public Service Announcement

“ထိတွေ့မှုတွေက သူတို့ဘက်က အင်အားဖြည့်တာကို ဖြတ်တိုက်တယ်။နောက်ပြီး စစ်ထိုးလာတာလည်းပါတာပေါ့”၎င်းက ပြောသည်။

လက်ရှိ မိုးဗြဲ-လွိုင်ကော် တိုက်ပွဲအတွင်းရှိ ကရင်နီပူးပေါင်းတပ်ဖွဲ့ဝင်တစ်ဦးကလည်း “သေဆုံး အလောင်းတွေကို စက်မှုဇုံနားက အိမ်တစ်အိမ်ထဲကိုဆွဲသွင်းပြီး နေအိမ်နဲ့အတူ မီးရှို့ခဲ့တယ်”ဟု ပြောသည်။

မိုးဗြဲ – လွိုင်ကော် နှင့် မိုးဗြဲမြို့ဆီဆိုင်လမ်းမကြီးကို စစ်ကောင်စီက ထိန်းချုပ်နိုင်ရန် စစ်ကောင်စီဘက်က စစ်ကြောင်းထိုးလှုပ်ရှားခဲ့သည်။

ထို့အတူ ယခုရက်ပိုင်းအတွင်း ရှမ်းပြည်နယ်မှတဆင့် ကရင်နီဒေသသို့ စစ်ကားအစီးရေ ၇၀ ကျော်အထိ ဝင်ရောက်လာပြီး အင်အား ၁,၀၀၀ထက်မနည်းပါရှိနိုင်ကြောင်း ကရင်နီစစ်ဖက်ရေးရာသတင်းရင်း မြစ်များက ခန့်မှန်းသည်။

ဖယ်ခုံမြို့မှအစပြု၍ မိုးဗြဲ -နန်းဖယ်ခုံ၊ မိုးဗြဲ-လွိုင်ကော် ၊ ဖားဆောင်း -မယ်စဲ့တို့တွင် တိုက်ပွဲများ ပြင်းထန်လာမည်ဟု ၎င်းတို့က သုံးသပ်သည်။

“ဒီနေ့လည်း တိုက်ပွဲဖြစ်နေတယ်။အသေးစိတ်အခြေအနေတော့ ပြောမရသေးဘူး”ဟု မိုးဗြဲ PDF တပ်ဖွဲ့ဝင်တစ်ဦးက ပြောသည်။