ဒီပဲယင်းနယ်တွင် စစ်ကောင်စီတပ် လက်နက်ကြီးပစ်ခတ်၍ ပြည်သူတစ်ဦးသေ၊ သုံးဦးဒဏ်ရာရ

စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာတွင် စစ်ကောင်စီတပ် ပစ်ခတ်လိုက်သည့် လက်နက်ကြီးကျည်ကျရောက်ပေါက်ကွဲ၍ အမျိုးသမီးတစ်ဦးသေဆုံးခဲ့ကြောင်း သတင်းရရှိသည်။

နိုဝင်ဘာ၁ ရက် ညနေပိုင်းက စစ်ကောင်စီတပ်၏ လက်နက်ကြီးဖြင့် ပစ်ခတ်မှုကြောင့် ဒီပဲယင်းနယ်အရှေ့ခြမ်းရှိ လက်ယက်ကုန်းကျေးရွာသို့ လက်နက်ကြီး ၂ လုံးကျရောက်ပေါက်ကွဲခဲ့ကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။

လက်ယက်ကုန်းရွာနေ အသက်(၄၀)ကျော်အရွယ် အမျိုးသမီးတစ်ဦးသေဆုံးခဲ့ကြောင်း၊ ထို့အပြင် အခြား မိသားစုတစ်စုမှ သုံးဦးထိခိုက်ဒဏ်ရာရကာ တစ်ဦးမှာစိုးရိမ်ရကြောင်း ၎င်းအဖွဲ့က ပြောသည်။

“ရေဦးက စစ်သား ၂၀လောက်က ရေဦးကြာဖူးဝိုင်းကနေ လက်နက်ကြီးနဲ့ ရမ်းပစ်တာ။ လက်ယက်ကုန်းကျေးရွာထဲ လက်နက်ကြီးနှစ်လုံးကျတာ။”ဟု ဒေသခံတစ်ဦးက ပြောသည်။

Public Service Announcement

အဆိုပါ စစ်ကောင်စီတပ် စစ်ကြောင်းကြောင့် ဒီပဲယင်းအရှေ့ခြမ်းကျေးရွာများမှာ ထွက်ပြေးတိမ်းရှောင်နေရသည်။

လက်ယက်ကုန်းရွာကို ပြီးခဲ့သည့် ၂၀၂၂ စက်တင်ဘာ၁၆ ရက်ကလည်း လေကြောင်းမှ ပစ်ခတ် တိုက်ခိုက်ခဲ့၍ ဘုန်းတော်ကြီးကျောင်းနှင့် စာသင်ကျောင်းရှိ ကလေးငယ် ၆ ဦးအပါအဝင် ပြည်သူ၁၁ဦးသေဆုံးခဲ့သေးသည်။