တနင်္သာရီမြို့နယ်၊ ညောင်ပင်ကွင်းရွာအခြေစိုက်၊ အမှတ်(၅၆၁) ခြေမြန်တပ်ရင်း(ခမရ)မှ စစ်သား နှစ်ဦးသည် တပ်ရင်းမှ ထွက်ပြေးလာပြီး တနင်္သာရီမြို့နယ် ပြည်သူ့ကာကွယ်ရေးတပ်ဖွဲ့ နှင့် မြိတ်ခရိုင် ပြည်သူ့ကာကွယ်ရေးတပ်မတော်၊ တပ်ရင်း(၂) ၏ တပ်ခွဲ(၁) ပူးပေါင်းစစ်ကြောင်းထံ အလင်းဝင်လာခဲ့သည်။
တပ်သား ထွန်းလင်းပိုင် နှင့် တပ်သား ထက်မြတ်သူသည်အောက်တိုဘာ(၃၁)ရက်နေ့က ထွက်ပြေးလာခဲ့ခြင်းဖြစ်ပြီးနိုဝင်ဘာ(၁)ရက်နေ့တွင် လာရောက်အလင်းဝင်ခဲ့ခြင်းဟု တနင်္သာရီတိုင်ပြည်သူ့ကာကွယ်ရေးအဖွဲ့ က သတင်းထုတ်ပြန်သည်။
“အဲ့ဒီတပ်ရင်းထဲ မတရားဖိနှိပ်မှုတွေ ရှိနေတယ်တဲ့။ ဒါကြောင့် သူတို့ ပြေးလာကြတာ” ဟု တနင်္သာရီတိုင်ပြည်သူ့ကာကွယ်ရေးအဖွဲ့ မှ တာဝန်ရှိသူတစ်ဦးကပြောသည်။
တပ်တွင်း မတရားဖိနှိပ်ခံရခြင်းအပြင် ပြည်သူများအပေါ် စစ်သည်တော်ကျင့်ဝတ်များဖောက်ဖျက်ပြီး မတရားဖိနှိပ်သတ်ဖြတ်မှုများ လုပ်နေသည့်အတွက် ထွက်ပြေးအလင်းဝင်ခဲ့ခြင်းဖြစ်ကြောင်း ထွက်ဆိုသည်ဟု ထုတ်ပြန်ချက်၌ ဖော်ပြထားသည်
Public Service Announcement
အလင်းဝင်ရောက်လာသည့် ရဲဘော်နှစ်ဦးအား ကောင်းမွန်စွာစောင့်ရှောက်ထားပြီး ပြည်သူ့ရင်ခွင်နှင့်ချိတ်ဆက်ကာ ၎င်းတို့၏ ဆန္ဒအတိုင်း ကူညီဆောင်ရွက်ပေးသွားရန် စီစဉ်လျက်ရှိကြောင်း တနင်္သာရီတိုင်ပြည်သူ့ကာကွယ်ရေးအဖွဲ့ က အသိပေးထားသည်။
စစ်တပ်ကအာဏာသိမ်းပြီးနောက် တနင်္သာရီတိုင်းအတွင်း CDM ဝင်ရောက်လာခဲ့သည့် ရဲတပ်ဖွဲ့ နှင့် စစ်သားများမှာ ထားဝယ်ခရိုင်တွင် (၉၈)ဦး၊ မြိတ်ခရိုင်တွင်(၁၁၀)ဦး၊ ကော့သောင်းခရိုင်တွင် (၂၉)ဦး၊ စုစုပေါင်း (၂၃၇) ဦးထိ ရှိပြီဖြစ်ကြောင်းသိရသည်။
