ရှမ်းပြည်နယ်မြောက်ပိုင်း ကိုးကန့်ဒေသ မုံးကိုးရှိ စစ်ကောင်စီ ဗျူဟာစခန်းကုန်းကို ကိုးကန့်တပ်မတော်(MNDAA)နှင့် ရက္ခိုင့်တပ်တော်(AA) တို့က ယနေ့တိုက်ခိုက်သိမ်းပိုက်ခဲ့ကြောင်း စစ်ရေးသတင်းရင်းမြစ်က ပြောသည်။
“မုံးကိုး စကစ ဗျူဟာစခန်းကုန်း ကျသွားကြီ MNDAAနဲ့ AAက သိမ်းတာ။၁၀၅မမ ၂ခုသိမ်းရတယ်ပြောတယ်”ဟု စစ်ရေးသတင်းရင်းမြစ်က ပြောသည်။
စစ်ကောင်စီ၏ အရေးပါသည့် ဗျူဟာစခန်းကုန်းသိမ်းပိုက်မှု ဖြစ်စဉ်နှင့်ပတ်သက်ပြီး MNDAA ကလည်း အတည်ပြုသည်။
“သိမ်းပိုက်နိုင်ခဲ့ပြီဗျ။ ဒီနေ့လည်ပိုင်း ၁၂နာရီ ၄၀မှာ အောင်မြင်စွာ သိမ်းပိုက်နိုင်ခဲ့ပါပြီ”ဟု MNDAA ပြောရေးဆိုခွင့်ရှိသူ လီကျာဝင်းက ပြောသည်။
Public Service Announcement
‘၁၀၂၇ စစ်ဆင်ရေး’ကာလအတွင်း MNDAAနှင့် AA တို့ ပူးပေါင်းပြီး ကိုးကန့်ဒေသရှိ စစ်ကောင်စီတပ်စခန်းများကို တိုက်ခိုက်လျက်ရှိရာ နေ့စဉ် စစ်ကောင်စီတပ်စခန်းများ သိမ်းပိုက်နိုင်ခဲ့ပြီး စစ်ဆင်ရေး ၁၂ရက်တာ အတွင်း စစ်ကောင်စီတပ်စခန်း ၁၁၃ ခုထက်မနည်းကိုသိမ်းပိုက်ထားသည်။ ထို့ပြင် တအာင်းတပ်မတော်(TNLA) ကလည်း စစ်ကောင်စီတပ်စခန်း ၃၀ကျော်ကို သိမ်းပိုက်ထားသည်။
စစ်ကောင်စီတပ်ထံမှ သံချပ်ကာယာဉ်နှင့် လေယာဉ်ပစ်စက်သေနတ်များ၊ လက်နက်ကြီးများအပါအဝင် လက်နက်ခဲယမ်းများစွာ ရရှိထားပြီး စစ်ကောင်စီတပ်က သေဆုံးထိခိုက်ဖမ်းဆီးခံရသူ အများအပြားရှိခဲ့သည်။ ထို့ပြင် ညီနောင်မဟာမိတ်များထံ လက်နက်ချ အလင်းဝင်ရောက်သူ အများအပြားရှိနေသည်။
