စစ်ကောင်စီနှင့် ကိုးကန့်ပြည်သူ့စစ်များ တိုက်ခိုက်လိုစိတ်ကျဆင်းပြီး လက်နက်များစွန့်ကာ ထွက်ပြေး​နေဟု MNDAA ထုတ်ပြန်

ကိုးကန့်ဒေသတိုက်ပွဲများတွင်စစ်ကောင်စီတပ်နှင့် ကိုးကန့်ပြည်သူ့စစ်တပ်ဖွဲ့ဝင်များသည် တိုက်ခိုက်လိုစိတ်ကျဆင်း​ပြီး လက်နက်များစွန့်ခွာထွက်ပြေး​နေကြကြောင်း ကိုးကန့်တပ်မတော်(MNDAA)က သတင်းထုတ်ပြန်သည်။

ယမန်နေ့ နိုဝင်ဘာလ ၅ ရက်နေ့တိုက်ပွဲသတင်းများ ဖော်ပြရာ၌ အသိပေးခဲ့ခြင်းဖြစ်သည်။

ယမန်နေ့တွင် MNDAAသည် ကိုးကန့်ဒေသ၏ တောင်ပိုင်း စစ်ကြောင်းရေးမဟာဗျူဟာနေရာကို သိမ်းယူနိုင်ခဲ့ပြီး တာရွှေထန်ဘက်ရှိ ကိုးကန့်ပြည်သူ့စစ်အဖွဲ့များသည် လက်နက် များစွန့်လွတ်ပစ်ချကာ စခန်းမှထွက်ပြေးခဲ့ကြသည်ဟု ထုတ်ပြန်သည်။

ယခုရက်ပိုင်းတွင် ကိုးကန့်ခရိုင်၊ရှီးရှမ်းဒေသ တာရွှေထန်နေရာတွင်အခြေချနေထိုင်သော ကိုးကန့်ပြည်သူ့စစ်အဖွဲ့ များသည် MNDAA၏အဆက်မပြတ် ပစ်ခတ်တိုက်ခိုက်မှုအောက်တွင် တိုက်ခိုက်ချင်သောစိတ်ဓာတ် မရှိတော့ကြောင်း၊ ယမန်နေ့တွင်လည်း စစ်ကောင်စီအဖွဲ့ဝင်အချို့နှင့် ပြည်သူ့စစ်အဖွဲ့တို့သည် လက်နက်များ ပစ်ချခဲ့၍ စခန်းမှ ထွက်ပြေးခဲ့ကြကြောင်း ​ဖော်ပြထားသည်။

Public Service Announcement

သို့​သော် တိုက်ပွဲများ၌ အထိနာသည့် စစ်ကောင်စီတပ်သည် အရပ်သားများကို ပစ်မှတ်ထား တိုက်ခိုက်သည့် လေကြောင်းမှ ဗုံးကြဲပစ်ခတ်မှုများ လုပ်နေ၍ ကလေးငယ်အပါအဝင် ပြည်သူလူထု ထိခိုက်မှုများ ရှိခဲ့သည်ဟုလည်း အသိပေးသည်။

ယမန်နေ့ ညနေက ကိုးကန့်ခရိုင်၊ မန်တုံပကျေးရွာအုပ်စု ၊ ကျောက်ထန်ပရွာကို တိုက် လေယာဉ်ဖြင့် နှစ်ကြိမ်လာရောက်ပြီး အကြီးစားဗုံးနှစ်လုံးပစ်ခတ်ခဲ့ရာ နေအိမ် ၃လုံး ပျက်စီးပြီး ကလေးငယ်အပါအဝင် အရပ်သား(၃)ဦးဒဏ်ရာရ ရှိခဲ့သည်။ ယင်းအနက် ကလေးငယ်နှင့် သက်ကြီးရွယ်အို အမျိုးသမီးတို့မှာ ဒဏ်ရာပြင်းထန်ခဲ့ကြောင်းသိရသည်။

ကိုးကန့် ခရိုင်၊ တုန်းရှမ်းဒေသ၊ တာကန်ထန်တပ်စခန်းကိုနိုဝင်ဘာ ၄ရက်နှင့် ၅ ရက်တွင် ၂ ကြိမ်တိုက်ခိုက်ပြီး ဒုတိယအကြိမ်တိုက်ခိုက်မှုတွင်စခန်းသိမ်းယူနိုင်ခဲ့​ကြောင်း ၊ မုံးကိုးဒေသ ၊ ရှောက်ချင်ရှူနေရာရှိ စစ်ကောင်စီတပ်စခန်းကို ထိုးစစ်တိုက်ခိုက်ခဲ့သိမ်းပိုက်ခဲ့​ကြောင်းအသိ​ပေးထားသည်။

ထိုအပြင် မူပန်(သိန္နီ)ဒေသ ရေပူဂိတ်နေရာတွင်ရှိသော စစ်ကောင်စီတပ်ဖွဲ့ ကို နိုဝင်ဘာ ၄ ရက်ညနှင့် ၅ ရက်နံနက်တွင်တိုက်ခိုက်မှု ၊ နိုဝင်ဘာ ၅ ရက်ည​နေတွင် ဟိုပင်ကျေးရွာ

အုပ်စု(၁၄)မိုင် မှ (၁၅)မိုင်ကြားတွင် အရပ်သားယာဉ်အဖြစ်ဟန်ဆောင်ထားသော စစ်ကောင်စီယဥ်(၅)စီးကို အောင်မြင်စွာ ကြားဖြတ်တိုက်ခိုက်မှု စသည်တို့ကိုလည်ထုတ်ပြန်သည်။

ယာဉ်တန်း(၅)စီးမှာ တစ်စီးသည်ဖျက်ဆီးခံရပြီး ကျန်ပို့ဆောင်ယာဉ်တန်းများသည် အပြန်လမ်းမှ ပြန်သွားကာ ကြားဖြတ်တိုက်ခိုက်တွင်လက်နက်ခဲယမ်းများ သိမ်းဆည်းရရှိ​ကြောင်းလည်းသိရသည်။

MNDAAနှင့်ညီနောင်မဟာမိတ်တပ်များသည် အောက်တိုဘာ ၂၇ရက်မှစ၍စစ်ကောင်စီတပ်စခန်းများကိုတိုက်ခိုက်သိမ်းပိုက်သည့် စစ်ဆင်ရေးများကိုနေ့စဉ်ဆောင်ရွက်လျက်ရှိရာ စစ်ဆင်ရေး ၁၁ရက်အတွင်း တပ်စခန်း ၁၄၄ ခုထက်မနည်းကိုသိမ်းပိုက်ပြီးဖြစ်သည်။