စစ်အာဏာရှင်ဆန့်ကျင်ရေး ဆန္ဒပြပွဲပြုလုပ်ခဲ့သည့် ရန်ကုန်မြို့ မြောက်ဒဂုံမြို့နယ် (၄၀) စျေးရှိ စျေးဆိုင်များအား စစ်ကောင်စီက ဖျက်ဆီးခဲ့ကြောင်း ဒေသခံပြည်သူများက ပြောသည်။
အဆိုပါ စျေးပတ်ဝန်းကျင်ကို ယမန်နေ့ ညပိုင်းနှင့် ယနေ့ နံနက်က စစ်ကောင်စီတပ်သားများနှင့် အရပ်ဝတ်ဖြင့် အင်အားအများအပြား ရောက်ရှိလာပြီး အကြမ်းဖက်ဖျက်ဆီးခဲ့ခြင်း ဖြစ်ကြောင်း မြောက်ဒဂုံမြို့နယ်နေ ပြည်သူတစ်ဦးက ပြောသည်။
“မနေ့က ဆန္ဒပြပွဲလုပ်သွားလို့ ဆိုပြီး (၄၀)စျေးကို ညထဲက စစ်သားတွေ လာဖျက်သွားကြတယ်။ ခုမနက်လည်း လမ်းဘေးစျေးသည်တွေက မသိတော့ လာဖွင့်တာကို ထပ်ဖျက်ဆီးသွားတယ်။ စျေးဆိုင်တွေကိုလည်း ပေးမဖွင့်ဘူး။ ပိတ်ခိုင်းထားတယ်။ အနီးအနားမှာလဲ စစ်သားနဲ့ အရပ်ဝတ်တွေ အများကြီး စောင့်နေကြတယ်” ဟု ၎င်းက ပြောသည်။
ယင်းကဲ့သို့ ဖျက်ဆီးခံရသည့်အတွက် ဝမ်းနည်းမိကြောင်းနှင့် ပြည်သူများအား အနူးအညွတ်တောင်းပန်အပ်ကြောင်း ရန်ကုန်သပိတ်အင်အားစုမှ ကိုရဲညီထက်က လူမှုကွန်ရက်စာမျက်နှာ၌ ဖော်ပြထားသည်။
Public Service Announcement
“မနေ့က သပိတ်မှာ ဟောခဲ့တဲ့ ကိုနန်းလင်းစကားလိုပဲ နှလုံးတုန်၊ ရင်တုန်ဖြစ်ရပြီး အခုလို စျေးပစ္စည်းတွေဆုံးရှုံးရတာ၊ နစ်နာရတာတွေ အတွက် တောင်းပန်ပါတယ်။ ဒီလုပ်ရပ်ဟာ စစ်တပ်ဟာ ကျွန်တော်တို့ တော်လှန်ရေးအင်အားစုတွေနဲ့ ပြည်သူတွေကြားသွေးကွဲအောင်လုပ်တဲ့ လမ်းစဉ်ပါပဲ။ ကျွန်တော်တို့ကို မြင်တာနဲ့ ပြည်သူတွေမှာ စိုးရိမ်စိတ်ဖြစ်လာအောင် စစ်တပ်က ပုံဖော်လုပ်ယူနေတာပါ။ လှည်းတန်းဈေးမှာ လုပ်ခဲ့တုန်းကလည်း ဈေးတစ်လုံးကို မီးရှို့ဖျက်ဆီးခဲ့ဖူးပါတယ်။ အခုလည်း ဒီနည်းလမ်းကို ထပ်လုပ်ပြီး အဓမ္မအနိုင်ကျင့်ပြုလုပ်ခဲ့တာပါ။ ပြည်သူတွေကို ဒီကောင်တွေဟာ အကြောက်တရားနဲ့ ဖိနှိပ်ပြီး အာဏာတည်မြဲဖို့ ကြိုးစားနေတာဖြစ်တယ်” ဟု ကိုရဲညီထက်က ရေးသားခဲ့သည်။
ဆက်လက်၍ “စစ်တပ်ဟာ သေချာပေါက်ကျရှုံးနေပါပြီ။ ဒီကောင်တွေရဲ့ နိဂုံးဟာ ကျရှုံးခြင်းပါပဲ။ ဒီကောင်တွေဟာ ရန်ကုန်ကို ဘယ်တော့မှ အုပ်ချုပ်လို့မရစေရပါဘူး။ ရန်ကုန်မှ မဟုတ်ပါဘူး။ မြန်မာပြည်တစ်ပြည်လုံး ဘယ်နေရာ ဘယ်ဒေသမှ အုပ်ချုပ်၍ မရစေရပါဘူး။ လုံးဝ အုပ်ချုပ်ခွင့်မရစေရပါဘူး” ဟု ကိုရဲညီထက်က အသိပေးဖော်ပြခဲ့သည်။
စစ်ကောင်စီမှ လုံခြုံရေး အထူးတင်းကြပ်ထားသည့် ကြားမှ ယမန်နေ့က လူထုသပိတ်တိုက်ပွဲတရပ်ကို စစ်အာဏာရှင်ဆန့်ကျင်ရေး ရန်ကုန်အင်အားစုနှင့်အတူ ကိုနန်းလင်းနှင့် သပိတ်အင်အားစုများက ယမန်နေ့တွင် မြောက်ဒဂုံဈေး၌ ပြုလုပ်ခဲ့သည်။
