ကျောက်မြောင်း ခမရ(၁၂)တပ် လက်နက်ကြီးပစ်ခတ်နေ၍ ပျူစောထီးရွာများပါ ထွက်ပြေးတိမ်းရှောင်နေရ

ဇေအောင်/People’s Spring

စစ်ကိုင်းတိုင်း၊ ကျောက်မြောင်းမြို့နယ်တွင် စစ်ကောင်စီ​၏ တပ်မ(၃၃)လက်အောက်ခံ ခြေမြန်တပ်ရင်း ခမရ(၁၂)မှ လက်နက်ကြီးဖြင့် ရမ်းသမ်းပစ်ခတ်နေ၍ ပျူစောထီးကျေးရွာအချို့ပါ ထွက်ပြေးတိမ်းရှောင်နေရကြောင်း သတင်းရရှိသည်။

ဇူလိုင်တတိယပတ်အတွင်း စဥ့်ကူးမြို့အား ပြည်သူ့ကာကွယ်ရေးတပ်မတော်(မန္တ​လေး) ပူးပေါင်း သိမ်းပိုက်နိုင်ခဲ့ပြီးနောက် ​မြစ် တဘက် ကမ်း ကျောက်မြောင်းမြို့ရှိ စစ်ကောင်စီတပ်က လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း၊ ထိုသို့ပစ်ခတ်ရာတွင် ပျူစောထီးရွာအချို့၌ လက်နက်ကြီးကျ၍ ထွက်ပြေးတိမ်းရှောင်နေရကြောင်း ဒေသခံများက ပြောသည်။

Public Service Announcement

“မခေါက်ပျူရွာဆို လေယာဥ်ပေါ်ကမှားချလို့တဲ့ အဘွားကြီးနဲ့အဘိုးကြီး တစစီကိုကောက်လို့မရဘူးလို့ပြောတယ်။ မခေါက်ကလည်းမနေကြဘူး။ အကုန်ပြောင်းကြတာတကြောလုံး။”ဟု ကျောက်မြောင်းဒေသခံတစ်ဦးက ပြောသည်။

မခေါက်ကျေးရွာသည် စစ်ကောင်စီလက်အောက်ခံ ပျူစောထီးအင်အားကောင်းရာ ရွာတစ်ရွာဖြစ်သော်လည်း တစ်ရွာလုံး ရွှေ့ပြောင်းသွားကြောင်း၊ ထို့အပြင် စစ်တပ်ရှိရာ ကျောက်မြောင်းမြို့အပါအဝင် နွယ်ငြိမ်း၊ ရေတော်အစရှိသည့် ကျေးရွာ ၄ရွာခန့်ပါ တိမ်းရှောင် နေရကြောင်း ဒေသခံများက ပြောသည်။

“စဥ့်ကူးဘက်ခြမ်းကိုပစ်တာ။တောတွေထဲနေတယ်ဆိုပြီးပစ်တာ။ လက်နက်ကြီးအစတွေက အိမ်တွေပေါ်ကျတာ။ အိမ်တွေကိုသိမ့်သိမ့်ကိုတုန်နေတာပဲ။”ဟု ကျောက်မြောင်းမြို့၊ ရေတော်ရွာဒေသခံတစ်ဦးက ပြောသည်။

ဇူလိုင် ၂၀ ရက်ကလည်း ကျောက်မြောင်းမြို့စစ်ကောင်စီတပ်မှ လက်နက်ကြီးဖြင့် ပစ်ခတ်ခဲ့၍ စဥ့်ကူးမြို့နယ်၊ လက်ပန်လှရွာ၊ ပြည်စိုးအောင် ရပ်ကွက်၌ ကျရောက်ပေါက်ကွဲခဲ့သေးသည်။

စဥ့်ကူးမြို့အပါအဝင် စဥ့်ကူးနယ်ရှိ တပ်စခန်းအားလုံးကို ပြည်သူ့ကာကွယ်ရေးတပ်မတော်(မန္တလေး)နှင့် ပူးပေါင်းတပ်များက ဇူလိုင် ၁၇ ရက်တွင် အပြီးသတ်သိမ်းပိုက်ရရှိခဲ့သည်။