မြို့ခံပြည်သူများ၏ ပျော်ရွှင်မှုများ ခွန်အားဖြစ်ရကြောင်း မိုးကုတ်ဗျူဟာထုတ်ပြန်

မိထက်/People’s Spring

မိုးကုတ်မြို့ကို တအာင်းတပ်မတော်(TNLA) ဦးဆောင်သော PDFတပ်ဖွဲ့ဝင်များ၏ ပူးပေါင်းအင်အားဖြင့် သိမ်းပိုက်နိုင်ခဲ့ခြင်းအပေါ် ဒေသခံပြည်သူများ၏ ပျော်ရွှင်မှုများမှာ ရဲဘော်များ၏ ခွန်အားများဖြစ်ရကြောင်း မိုးကုတ်ဗျူဟာက အသိပေး ထုတ်ပြန်သည်။

မိုးကုတ်မြို့ကို ဇူလိုင်လ ၂၄ရက် ညနေ ၅နာရီတွင် အပြီးသတ်သိမ်းပိုက်နိုင်ခြင်းဟု ထုတ်ပြန်အသိပေးထားသည်။

Public Service Announcement

“မိုးကုတ်မြို့ကို (၂၄.၇.၂၀၂၄) ညနေ (၅:၀၀) ချိန်တွင် TNLA ဦးဆောင်သော PDFတပ်ဖွဲ့ဝင်များ၏ ပူးပေါင်းအင်အားဖြင့် အပြီးသတ် သိမ်းပိုက်နိုင်ခဲ့ပါသည်။ပြည်သူများ၏ ပျော်ရွှင်မှုများက ရဲဘော်များ၏ ခွန်အား၊ အင်အားများဖြစ်ပါတယ်။ မိုးကုတ်မြို့သူ မြို့သားများ ဘေးအန္တရာယ်ကင်းကြပါစေ”ဟု မိုးကုတ်ဗျူဟာ ထုတ်ပြန်ချက်၌ ဖော်ပြသည်။

တိုက်ပွဲဝင် ကာကွယ်ရေးရဲဘော်များကို မြို့ခံလူထုက အောင်သပြေပန်း၊ ရှမ်းအိုးစည်၊ ရှမ်းအကများဖြင့် ကြိုဆိုခဲ့ကြသည်။

“ဒီလောက် ညီညွှတ်တဲ့ မြို့ဟာ လွတ်မြောက်သင့်တယ် မဟုတ်လားဗျာလွတ်မြောက်သင့်တယ် မဟုတ်လား။ ခေတ်ဟာ ပြောင်းခဲ့ပြီ ။ခေတ်ဟာ ပြောင်းနေပြီ ။ဦးဆောင်တိုက်ပွဲဝင်တဲ့ မဟာမိတ် PSLF /TNLAနှင့်တကွ NUG PDFများ တော်လှန်ရေးအင်အားစုများအားလုံးကို ကျေးဇူးတင်ရပါတယ် ။ကျေးဇူးတင်ထိုက်ဆုံးကတော့ မြို့လူထုပါဘဲ မြို့လူထုရဲ့ စိတ်အားထက်သန်မှုဟာ တော်လှန်ရေးရဲ့ တွန်းအားပါဘဲခင်ဗျာ”ဟု မန္တလေး PDFတပ်မှူးက လူမှုကွန်ရက် ၌ ယမန်နေ့က ရေးသားထားသည်။

မိုးကုတ်မြို့ရှိ စစ်ကောင်စီတပ်စခန်းအားလုံးကို အားလုံးရှင်းလင်းခဲ့ပြီး၊ မိုးမိတ်နှင့် နောင်ချိုတွင် တိုက်ပွဲဆက်လက်ဖြစ်ပွားခဲ့ကြောင်းTNLAက ယမန်နေ့(ဇူလိုင် ၂၄ရက်)ညတွင် သတင်းထုတ်ပြန်သည်။