ဘားအံအပါအဝင် သံလွင်မြစ်ကမ်းကျေးရွာများ ရေဘေးကြုံနေ

နိုင်ပကောင်း/People’s Spring

ကရင်ပြည်နယ်၊ ဘားအံမြို့နယ်တွင် သံလွင်မြစ်ရေထပ်တက်လာ၍ ဘားအံမြို့အပါအဝင် သံလွင်မြစ်ကမ်းတစ်လျှောက်ရှိ ကျေးရွာများ ရေကြီးမှုဘေးကို ဆိုးရွားစွာခံစားနေရပြီး ပြည်သူသောင်းချီ ရေဘေးသင့်နေရသည်ဟု ဒေသတွင်းသတင်းရင်းမြစ်များကပြောသည်။

မိုးသည်းထန်စွာရွာသွန်းနေပြီး သံလွင်မြစ်ရေကြီးလာခြင်းကြောင့် ဇူလိုင်(၂၅)ရက်မှစ၍ ဘားအံမြို့နှင့် သံလွင်မြစ်ကမ်းတစ်လျှောက်ရှိ ကျေးရွာများတွင် ရေကြီးရေလျှံမှု ဖြစ်ပေါ်ခဲ့ပြီး ရေကြီးမှုကြောင့် ဘားအံ-လှိုင်းဘွဲလမ်း၊ ဘားအံ-မော်လမြိုင်လမ်း၊ ဘားအံ-သထုံးကားလမ်းတို့တွင် ယာဉ်ငယ်များ သွားလာလို့မရကြောင်း ဒေသခံများက ပြောသည်။

Public Service Announcement

ရေကြီးမှုကြောင့် ဘားအံမြို့ပေါ်နှင့် အချို့ကျေးရွာများတွင် ယာယီရေဘေးရှောင် ကယ်ဆယ်ရေးစခန်းများ ဖွင့်လှစ်ထားခဲ့ရပြီး အဆိုပါရေဘေးရှောင်ကယ်ဆယ်ရေးစခန်းတွင် ပြည်သူထောင်ချီ ရောက်ရှိခိုလှုံနေထိုင်ရကာ ရေကြီးမှုကြောင့် မရွှေ့ပြောင်းနိုင်ဘဲ ပိတ်မိနေသူများကိုလည်း ကူညီကယ်ဆယ်ရေးအဖွဲ့များက ဆက်လက်ခေါ်ထုတ်နေရသည်ဟု ဒေသခံများက ပြောသည်။

ယနေ့ ဇူလိုင်(၂၈)ရက်တွင် သံလွင်မြစ်ရေသည် ဘားအံမြို့၏ စိုးရိမ်ရေမှတ်အထက် (၉၄၄)စင်တီမီတာအထိ ကျော်လွန်ရောက်ရှိနေပြီး ယခင် (၂၀၁၈)ခုနှစ် မြစ်ရေကြီးသည့် စံချိန် (၉၃၈)စင်တီမီတာထက် ပိုများနေသည့်အတွက် ဘားအံမြို့တွင် ရေကြီးမှုစံချိန်သစ်တင်ခဲ့သည်ဟု ဒေသခံများက ပြောသည်။

“ဒီနှစ်ကတော့ ရေကြီးတာက ချက်ချင်းတက်တယ်။ ပြီးတော့ အရင်စံချိန်ထက်ကို ကျော်သွားတဲ့အတွက် တော်တော်တော့ အနိမ့်ပိုင်းတွေ ပိုပြီးတော့ဒုက္ခရောက်မယ်ပေါ့နော်” ဟု ဒေသခံတစ်ဦးက ပြောသည်။

ယခုနှစ်အတွင်း သံလွင်မြစ်ရေအတက်မြန်သည့်အတွက် ဘားအံမြို့ရှိ အမြင့်ပိုင်းရပ်ကွက်မှလွဲ၍ အနိမ့်ပိုင်းရပ်ကွက်များ၌ နေအိမ်အများအပြား ရေနစ်မြုပ်ဖြစ်ခဲ့ပြီး လက်ရှိတွင် ရေဘေးသင့်ပြည်သူများအတွက် စားစရာနှင့် သောက်ရေသန့်အကူအညီများ လိုအပ်လျက်ရှိနေသည်ဟု ဒေသခံများက ပြောသည်။

ကရင်ပြည်နယ် ဘားအံမြို့အပါအဝင် ကမမောင်း၊ လှိုင်းဘွဲ၊ ပိုင်ကျုံ၊ ကော့ကရိတ်၊ ကျုံဒိုး၊ ကြာအင်းဆိပ်ကြီး၊ ကျိုက်ဒုံ၊ မြ၀တီမြို့တို့တွင် ရေကြီးရေလျှံမှုဖြစ်ပေါ်ခဲ့ပြီး ထိုင်းနယ်စပ်ကုန်သွယ်ရေးလမ်းပိုင်းအပါအဝင် လမ်းပိုင်းအချို့ ပြတ်တောက်သွားခဲ့ပြီး မြ၀တီမြို့တွင် ရေကြီးမှုကြောင့် ပြည်သူနှစ်ဦးထက်မနည်း သေဆုံးသွားခဲ့သည်ဟု ကူညီကယ်ဆယ်ရေးလုပ်ဆောင်နေသူများထံမှ သိရသည်။

စစ်ကောင်စီလက်အောက်ခံ မိုးလေဝသနှင့် ဇလဗေဒညွှန်ကြားမှုဦးစီးဌာန၏ ယနေ့ ဇူလိုင်(၂၈)ရက် ထုတ်ပြန်ချက်အရ သံလွင်မြစ်ရေသည် ဘားအံမြို့၏ စိုးရိမ်ရေမှတ်အထက် ဆက်လည်တည်ရှိနေပြီး နောက်တစ်ရက်အတွင်း ပေဝက်ခန့် မြင့်တက်နိုင်သလို လာမည့်ဩဂုတ်တွင်လည်း သံလွင်မြစ်ရေနှင့် သောင်းရင်းမြစ်ရေတို့မှာ စိုးရိမ်ရေမှတ်ထက်ကို ကျော်လွန်ရောက်ရှိနိုင်သည်ဟု ခန့်မှန်းထားသည်။