ယောနသံ၊ဇေအောင်/People’s Spring
မန္တလေးတိုင်း၊ စဉ့်ကူးမြို့ရှိ နာမည်ကျော် ပျုစောထီးရွာဖြစ်သော ရွာသာယာကျေးရွာစခန်းသိမ်းတိုက်ပွဲအတွင်း ငါးရက်ကြာ ပုန်းအောင်းနေသည့် ပျူစောထီးခေါင်းဆောင်တစ်ဦးကို အစာရေစာပြတ်လပ်သည့် ပုံစံဖြင့် အရှင်ဖမ်းမိခဲ့သည်။
ဧရာဝတီမြစ်လယ်ရှိ ရွာသာယာစခန်းကို အမှတ်(၅၁၂) PDF တပ်ရင်း၊ စဉ့်ကူးပကဖနှင့် ပြည်သူ့ကာကွယ်ရေးတပ်ပေါင်းစုက ဇူလိုင် ၂၅ ရက်တွင် တိုက်ခိုက်သိမ်းယူခဲ့ခြင်းဖြစ်သည်။
Public Service Announcement
ဇူလိုင်၃၀ရက်တွင် ရွာသာယာကျေးရွာသို့ သွားရောက်၍ နယ်မြေရှင်းလင်းစဉ် ပျူစောထီးခေါင်းဆောင်အောင်မင်းဆိုသူ ထပ်မံဖမ်းမိခြင်းဟု ကာကွယ်ရေးရဲဘော်တစ်ဦးက ပြောသည်။
“စခန်းသိမ်းပြီး ၅ရက်အကြာမှာ နယ်မြေသွားရှင်းတော့ ပုန်းနေရာကနေ ထွက်လာတာ။ ငါးရက်လုံးအစာမစားရတော့ အဟာရပြတ်နေပြီ။ သူ့ကိုယ်သူလည်း အောင်မင်းမဟုတ်ဘူးလို့ ညာသေးတာ”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
ရွာသာယာရွာပျူစောထီးခေါင်းဆောင် (၅၀) အရွယ်အောင်မင်းအား ယခုအခါ ကျန်းမာရေးစောင့်ရှောက်မှုပေးနေရသည်။
အောင်မင်းသည် စစ်ကောင်စီနှင့်ပူးပေါင်းပြီး ကျေးရွာနေအိမ်များအား မီးရှို့ဖျက်ဆီးခြင်းအပါအဝင် ရာဇဝတ်မှုများကျူးလွန်ခဲ့ကြောင်း စဉ့်ကူးဒေသခံများက ပြောသည်။
ရွာသာယာကျေးရွာစခန်းသိမ်းတိုက်ပွဲအတွင်း စစ်ကောင်စီနှင့်ပျူစောထီးအဖွဲ့ဝင် ၅၀ထက် မနည်းသေဆုံးခဲ့ပြီး ပျူ စောထီးနှင့် မိသားစုဝင်၄၀ ကျော်ကို ပြည်သူ့ကာကွယ်ရေးတပ်ဖွဲ့များက ခေါ်ယူထိန်းသိမ်းထားသည်။
ဖမ်းမိထားသော ပျူစောထီးများ၏ ကျူးလွန်ခြင်းခံရသူများအနေဖြင့် အမှုတစ်ခုချင်းစီအလိုက် လာရောက်အသိပေး တိုင်ကြားရန် ပြည်သူ့ကာကွယ်ရေးတပ်ဖွဲ့များက ဒေသခံများအသိပေးထားသည်။
ဇူလိုင် ၁၈ရက်ကလည်း စဉ့်ကူးမြို့သိမ်းတိုက်ပွဲမှ ရေတော်ပျူခေါင်းဆောင် ငနိုင် ၊ ဒိုးပင်ကုန်းဇီးပင်ကုန်း ပျူခေါင်းဆောင်ထွန်းလင်း စသည့် ပျူခေါင်းဆောင်များနှင့် ပျူစောထီးများ စုစုပေါင်း ၂၈ ဦး ဖမ်းဆီးရမိခဲ့ကြောင်း မိုးကုတ်ဗျူဟာ အမှတ်(၁၂၂၂) တပ်ရင်းက အသိပေးထားသည်။
၎င်းတို့အနက် ပျူခေါင်းဆောင်ငနိုင်ကိုမူ ပြည် သူများရှေ့၌ (၁၂၂၂)တပ်ရင်းမှ တပ်ရင်းမှူး ၊တပ်ရေးဗိုလ်၊စစ်ကြောင်းမှူး ၊ စခန်းမှူး ၊ IOတို့မှ စစ်ဆေးခဲ့သည်။
ဖမ်းဆီးရမိသူများတွင် စစ်ကောင်စီဒုဗိုလ်မှူးကြီး တစ်ဦး၊ ဗိုလ်မှူးတစ်ဦး၊ဗိုလ်ကြီး လေးဦး၊ဗိုလ် တစ်ဦး၊ တပ်ကြပ်ကြီး လေးဦး၊ဒုတပ်ကြပ်ကြီး လေးဦး၊ တပ်ကြပ်နှစ်ဦး၊တပ်သား ကိုးဦး၊ လက်ပံလှနှင့် စဥ့်ကူးမြို့မှ စခန်းမှူးနှစ်ဦးလည်း ပါဝင်သည်။
စဉ့်ကူးမြို့ကို ဇူလိုင် ၁၇ ရက်တွင် မန္တလေး PDFဦးဆောင်ပြီး ပြည်သူ့ကာကွယ်ရေးတပ်ဖွဲ့များက သိမ်းပိုက်ခဲ့ခြင်းဖြစ်သည်။ စဥ့်ကူးမြို့အား ပြန်လည်တိုက်ခိုက်ရန်စစ်ကောင်စီက ပြင်ဆင်နေပြီး စဉ့်ကူးမြို့တဖက်ကမ်း သပိတ် ကျင်းမြို့နယ် မခေါက်ကျေးရွာ၌ တပ်စွဲထားကြောင်း သတင်းရရှိသည်။
