ဟန်နွေ၊ဇော်ရမ်း/People’s Spring
မန္တလေးတိုင်း သပိတ်ကျင်းမြို့နယ် ကျောက်လှည်းဘီးကျေးရွာအနီးရှိ ခလရ(၁၄၈)တပ်ရင်းကို တအာင်းတပ်မတော်(TNLA)နှင့် မဟာမိတ်ပူးပေါင်းတပ်များက သိမ်းပိုက်ခဲ့ကြောင်း မိုးကုတ်ဗျူဟာက ယနေ့ သတင်းထုတ်ပြန်သည်။
မန္တလေး – မိုးကုတ် ကားလမ်းပေါ်ရှိ ခြေလျင်တပ်ရင်း ခလရ(၁၄၈)ကို TNLA၊ မိုးကုတ်ဗျူဟာအပါအဝင် မဟာမိတ် ပူးပေါင်းတပ်များက ယနေ့ (ဩဂုတ် ၉ရက်) ညနေပိုင်းတွင် သိမ်းပိုက်နိုင်ခဲ့ခြင်းဖြစ်သည်ဟု ဖော်ပြသည်။
Public Service Announcement
စခန်းသိမ်းတိုက်ပွဲအတွင်း လက်နက်ခဲယမ်းများ သိမ်းပိုက်ရရှိခဲ့ကြောင်း ဖော်ပြထားပြီး ခလရ(၁၄၈)တပ်ရင်းရှေ့၌ အောင်ပွဲခံနေသည့် တော်လှန်ရေးရဲဘော်များ၏ မှတ်တမ်းဓာတ်ပုံကို ဖော်ပြသည်။
TNLA အနေဖြင့် ရှမ်းမြောက်ရှိ ကျောက်မဲ ၊ နောင်ချို၊ မိုးမိတ်နှင့် မန္တလေးတိုင်း မိုးကုတ်မြို့ကို သိမ်းပိုက်ပြီးနောက် သပိတ်ကျင်းနယ် စစ်ဆင်ရေးတွင် ပါဝင်လာသည်ကို တွေ့ရသည်။
TNLA ရဲဘော်အချို့ကလည်း အညာမြေသို့ ခရီးသွားရောက်နေသည့် မှတ်တမ်းကို ပြီးခဲ့သည့် ရက်ပိုင်းက ၎င်းတို့၏ လူမှုကွန်ရက်၌ ဖော်ပြခဲ့သည်ကို တွေ့ရသည်။
ခလရ (၁၄၈)သိမ်းပိုက်နိုင်မှု နှင့်ပတ်သတ်ပြီး TNLA ပြောရေးဆိုခွင့်ရှိသူ လွေးယေဦးထံ ဆက်သွယ်မေးမြန်းရာ အခြေအနေများ မသိရသေးဟု ပြောသည်။
သပိတ်ကျင်းမြို့နယ်ရှိ စစ်ကောင်စီစခန်းများကို ပြီးခဲ့သည့်ဇူလိုင်ကတည်းက ကချင်လွတ်လပ်ရေးတပ်မတော်(KIA) ပါဝင်သည့် ပူးပေါင်းတပ်က ထိုးစစ်ဆင်တိုက်ခိုက်ခဲ့ရာ တပ်စခန်း ၃ခုထက်မနည်းကို သိမ်းပိုက်ရရှိထားသည်။
သပိတ်ကျင်းနယ်၌ ခလရ(၁၄၈)၊ အမှတ်(၁) သုတေသန တပ်ရင်း၊ အမှတ်(၂၀) စစ်ဆေးရုံ (ကုတင် ၁၀၀)၊ စစ်ကောင်စီ၏ တန်းမြင်လေ့ကျင့်ရေးကောင်း(တတက-၁၃)၊ စစ်အခြေခံ လေ့ကျင့်ရေးတပ်(စခတ-၂) တပ်များ ကျန်ရှိနေရာ ခြေလျင်တပ်ရင်းကို သိမ်းယူနိုင်ခဲ့ခြင်းဖြစ်၍ ကျန်တပ်များသည်လည်း သိပ်မကြာနိုင်ဟု သတင်းရင်းမြစ်တစ်ဦးက သုံးသပ်ထားသည်။
မန္တလေးတိုင်းနှင့် စစ်ကိုင်းတိုင်းအစပ်မှ စစ်ကောင်စီစခန်းများကို ဆက်တိုက်သိမ်းယူနေသည့် ပြည်သူ့ကာကွယ်ရေးတပ်ဖွဲ့များက စဉ့်ကူး-သပိတ်ကျင်းလမ်းပိုင်း၊ သိပိတ်ကျင်းမြို့အဝင်ရှိ တောင်ကုန်းပေါ်မှ ချောင်းကြီးရဲစခန်းကို
ဩဂုတ် ၁ရက်တွင် သိမ်းယူခဲ့သည်။
ကချင်လွတ်လပ်ရေးတပ်မတော်(KIA)က စစ်ဒေသမှူးအဖြစ် တာဝန်ယူပြီး စစ်ရေးဖော်ဆောင်နေသည့် တိုက်ပွဲများအတွင်း ယခုရက်ပိုင်းတွင် ထီးချိုင့်မြို့ရှိ တကောင်း နီကယ်စက်ရုံအပါအဝင် မန္တလေးတိုင်းနှင့် စစ်ကိုင်းတိုင်း အစပ်မှ စစ်ကောင်စီ၏စခန်းများကို ဆက်တိုက်သိမ်းယူခဲ့သည်။
မိုးမိတ်-မန္တလေးလမ်းပေါ်ရှိ သပိတ်ကျင်းမြို့နယ် တွင်းငယ်ရဲစခန်းကို ဇူလိုင် ၂၅ရက်နှင့် သပိတ် ကျင်းမြို့တွင် အင်းနက်ရွာရှိ စစ်ကောင်စီစခန်းကုန်းနှင့် စစ်ဆေးရေးဂိတ်ကို ဇူလိုင် ၂၀ရက်က သိမ်းယူခဲ့သည်။
