တော်လှန်​ရေးတပ်များက သီပေါမြို့ရှိ စစ်တပ်စခန်းများကိုတိုက်ခိုက်

မိထက်/People’s Spring

ရှမ်းပြည်နယ်မြောက်ပိုင်း သီပေါမြို့မှ ရဲစခန်း၊ ထွေအုပ်ရုံးအပါအဝင်စစ်ကောင်စီစခန်းများကို မဟာမိတ်ပူးပေါင်းတပ်ဖွဲ့များက ထိုးစစ်ဆင်တိုက်ခိုက်နေပြီး သီပေါထောင်လည်း ပွင့်သွားပြီဟု ကနဦးသတင်းရရှိသည်။

သီပေါမြို့တွင် ယနေ့ နံနက်အစောပိုင်းမှာစ၍ တအာင်းအမျိုးသားလွတ်မြောက်ရေးတပ်မတော်(TNLA) နှင့် မဟာမိတ်တပ်များက စစ်ကောင်စီစခန်းများကိုတိုက်ခိုက်ခြင်းဟု မြို့ခံအချို့ကပြောသည်။

“သီပေါထောင်ပါ ပွင့်သွားပြီဗျ။ အကျဉ်းသားတွေကို မဟာမိတ်က လွှတ်ပေးနေတယ်။ ရဲစခန်း၊ထွေအုပ်ရုံးတွေရပြီလို့လည်းကြားတယ်။ လေကြောင်းကြောက်လို့ အပြင်မထွက်ရဲလို့ တိတိကျကျမသိရသေးပါဘူး” ဟု ဒေသခံတဦးကပြောသည်။ သီ​ပေါ​ထောင်ပွင့် သည်ဆို​သောသတင်းကို People’s Spring ကသီးခြားအတည်မပြုနိုင်​သေး​ပေ။

Public Service Announcement

စစ်ကောင်စီတပ်ဖွဲ့ဝင်အများအပြား ထွက်ပြေးနေပြီး မဟာမိတ်တပ်ဖွဲ့များက လိုက်လံတိုက်ခိုက်နေကြောင်း၊ စစ်ကောင်စီကလည်း သီပေါမြို့နယ်ပတ်ဝန်းကျင်ကျေးရွာအချို့ကို လေကြောင်းမှတိုက်ခိုက်နေကြောင်း သတင်းရရှိသည်။

တော်လှန်​ရေးတပ်ဖွဲ့များသည်သီပေါမြို့ရှိ တောင်ခမ်းအမြောက်တပ်ကိုလည်း ထိုးစစ်ဆင်တိုက်ခိုက်နေပြီး စစ်ကောင်စီကလည်း လက်နက်ကြီးများပစ်ခတ်နေကြောင်း ဒေသခံများကပြောသည်။

တိုက်ပွဲအတွင်း လက်နက်ကြီးထိမှန်၍ အရပ်သားတစ်ဦးသေဆုံးကြောင်း သတင်းရရှိထားသည်။ ဒေသခံအများအပြားသည် နေအိမ်များနှင့် ဘုန်းကြီးကျောင်းအချို့၌ခိုလှုံနေကြကြောင်းသိရသည်။

သီပေါမြို့ရှိ နောင်တော်၊ယာပြင်၊မဲပုတ်ကျေးရွာတို့တွင်လည်း တိုက်ပွဲဖြစ်ပွားနေကြောင်းသတင်းရရှိသည်။

သီပေါမြို့သည် ကိုးကန့်တပ်မတော်(MNDAA)ထိန်းချုပ်ထားသည့်လားရှိုးမြို့ နှင့် TNLA ထိန်းချုပ်ထားသည့် ကျောက်မဲမြို့ကြား၌တည်ရှိသည်။

ယနေ့ (သြဂုတ် ၁၀ ရက်) နေ့လယ်ပိုင်းတွင် သီပေါမြို့ပေါ်၌ တိုက်ပွဲပြန်လည်ငြိမ်သက်နေပြီး ရွာအချို့၌ ဆက်လက်ဖြစ်ပွားနေသည်ဟု ဒေသခံအချို့ကပြောသည်။