ဇေအောင်/People’s Spring
မန္တလေးတိုင်း၊ မြစ်သားမြို့နယ်အနောက်ခြမ်းတွင် ရေနစ်မြုပ်ကျေးရွာများဆီ ကုညီကယ်ဆယ်ရေးအဖွဲ့များမရောက်၍ အဆိုပါဒေသရှိ ပြည်သူများ စားနပ်ရိက္ခာအခက်အခဲ ရှိနေကြောင်း သတင်းရရှိသည်။
စက်တင်ဘာ ၁၁ ရက်ကတည်းက ရေကြီးနေသည့် မြစ်သားမြို့အနောက်ဘက်ရှိ ကင်းစိန်ဈေး အနောက်ရွာ၊ ပေါက်မြိုင်၊ အင်းယင်း၊ တမာပင်၊ နွားဖြူငယ်၊ စမုံပေါက်၊ သစ်တတ်ကုန်း၊ လောင်းတော်ဦး၊ နွားကူးလေး၊ တကိုတည်း၊ ယွေး၊ ဒါးရဲကောင်း၊ ကင်းစိန်ဈေးအရှေ့ အစရှိသည့် ကျေးရွာများသို့ ကယ်ဆယ်ရေးစက်လှေများ ရောက်ရှိလာခြင်းမရှိကြောင်း၊ ထို့အပြင် အစားအသောက်နှင့် ထမင်းထုပ်ဝေသည့်စက်လှေများပါ ရောက်မလာ၍ ရေဘေးသင့်ပြည်သူများ အခက်အခဲဖြစ်နေကြောင်း မြစ်သားမြို့နယ်အနောက်ခြမ်း ဒေသခံများက ပြောသည်။
“ရေက ဘေးကြပ်နံကြပ်မို့ ဘယ်သူမှ ထမင်းထုပ်လာမပို့သလို စက်လှေတွေအကုန်လှည့်ပြန်သွားကြတာချည်းပါပဲ။ ကြာရင် အစာအိမ်ထိခိုက်ပြီး ကလေးငယ်တွေနဲ့ အဘိုးအဘွားတွေ သတိလစ်နိုင်တဲ့ အထိအနေအထားမို့ပါ။”ဟု ဒေသခံတစ်ဦးက ပြောသည်။
Public Service Announcement
ကျောက်ဆည်နှင့် မြစ်သားမြို့နယ်များရှိ ရေဘေးသင့်ဒေသများသို့ ထမင်းထုပ်များလာရောက်ပို့ဆောင်နေကြသော်လည်း စက်လှေမောင်းနှင်တတ်သူနည်းပါးခြင်း၊ ရေစီးသန်ခြင်း၊ လမ်းကြောင်းမကျွမ်းကျင်ခြင်းများကြောင့် အလှည့်ကျပို့ဆောင်နေရ၍ နောက်ကျနေရခြင်းဖြစ်ကြောင်း ပရဟိတအဖွဲ့အချို့က ပြောသည်။
ထို့အပြင် ရေဘေးသင့် ဒေသအချို့တွင် ပရဟိတအဖွဲ့များယူဆောင်လာသည့် စက်လှေများကို စစ်ကောင်စီကသိမ်းယူပြီး ၎င်းတို့ပို့လိုသည့်ဒေသသို့ ပို့ဆောင်နေကြောင်း၊ ထို့ကြောင့် ပရဟိတအဖွဲ့များမှာ စိတ်ရှိသလောက် မကူညီနိုင်ဘဲဖြစ်နေကြောင်း ပရိဟတသမားအချို့က ပြောသည်။
ရှမ်းပြည်နယ်တောင်ပိုင်း၊ ကရင်ပြည်နယ်၊ မန္တလေးတိုင်းတို့တွင် ရေဘေးအား အဆိုးရွားဆုံးရင်ဆိုင်နေရပြီး ရမည်းသင်း၊ တပ်ကုန်းနှင့် ကလောမြို့နယ်တို့တွင် ပြည်သူအများအပြား သေဆုံးခဲ့ပြီး လူဦးရေသိန်းချီ ရေဘေးဒုက္ခ ကြုံတွေ့နေရသည်။
