ဟန်နွေ/People’s Spring
ချင်းပြည်နယ် မင်းတပ်မြို့ရှိ ပြည်သူလူထု နေအိမ်များကို စစ်ကောင်စီတပ်က မီးရှို့ဖျက်ဆီးနေကြောင်း ဒေသခံက ပြောသည်။
စက်တင်ဘာ ၁၅ရက် ညနေပိုင်းက မင်းတပ်မြို့ အနောက်ရပ်ကွက် ခလရ(၂၇၄) တပ်ရင်းသို့ သွားသည့် လမ်းအနီးရှိ ဒေသခံများ၏ နေအိမ် ၃လုံးကို စစ်ကောင်စီတပ်က မီးရှို့ဖျက်ဆီးခဲ့ခြင်းဖြစ်သည်ဟု ဆိုသည်။
Public Service Announcement
ထိုသို့ မီးမရှို့မီ ပစ်ခတ်သံများ ထွက်ပေါ်ခဲ့ကြောင်းလည်း ဒေသခံက ပြောသည်။
” သေချာမသိရသေးဘူး။ တိုက်ပွဲလား စခ က ရမ်းပစ်တာလား မသိရသေးဘူး”ဟု ဒေသခံကပြောသည်။
စစ်ကောင်စီတပ်က ပြည်သူ့နေအိမ်များကို အကြောင်းမဲ့ မီးရှို့သည်မှာ ဟုတ်သည်ဟု ဒေသခံက ပြောသည်။
ပြီးခဲ့သည့် ရက်ပိုင်းကလည်း ခလရ(၂၇၄) တပ်ရင်း အောက်ဘက်လှေးကောင်းလမ်းခွဲရှိ ပြည်သူ့နေအိမ် ၅လုံးကို မီးရှို့ခံခဲ့ရသကဲ့သို့ နောက်ရက်တွင်လည်း ပြည်သူ့ နေအိမ် ၃လုံး မီးရှို့ခံရသည်ဟု ဒေသခံက အသိပေးသည်။
ချင်းဒေသကာကွယ်ရေးတပ်(CDF) – မင်းတပ် တပ်မှူးတစ်ဦးဖြစ်သည့် နိုင်းတမ်ကလည်း “မင်းတပ်မြို့တွင်းက စကစတပ်စွဲတဲ့နေရာအနီးတဝိုက်ကအိမ်တွေကို စစ်သားတွေမီးရှို့နေကြပါတယ်ပစ်ကွင်းရှင်းတဲ့သဘောပါ။ အိမ်တွေကိုအကာအကွယ်ယူပြီးသူတို့ကိုလာတိုက်မှာစိုးရိမ်လို့ ကျည်တပစ်အကွာအဝေးကိုရှင်းနေကြတာ။ ထပ်ရှို့ကြပါလိမ့်မယ်။ကျင်ဒွေးတိုက်ပွဲတုန်းက တစ်မြို့လုံးပြာကျခဲ့ရတာက သူတို့ဒီလိုမျိုးမီးရှို့လို့ ဖြစ်ခဲ့ရတာ” ဟု လူမှုကွန်ရက်တွင်ရေးသားထားသည်။
CDF မင်းတပ်သည် ချင်းညီနောင်အဖွဲ့ဝင်ဖြစ်ပြီးမဟာမိတ် အာရက္ခတပ်တော်(AA)နှင့်အတူ ကျင်ဒွေးမြို့ နှင့် မတူပီမြို့သိမ်းတိုက်ပွဲများကို အောင်မြင်မှုရရှိထားသည်။
ထို့ပြင် စစ်ကောင်စီက မင်းတပ်မြို့နယ်ကိုလေကြောင်း၊ လက်နက်ကြီး၊ ဒရုန်း တိုက်ခိုက်မှုများ ဆက်တိုက်ပြုလုပ်နေခြင်းကြောင့် မင်းတပ်မြို့နယ်တွင်လည်း တိုက်ပွဲများ အချိန်မရွေးဖြစ်ပွားနိုင်ကြောင်း CDF မင်းတပ်က အသိပေးထားသည်။
