အနန်းကွင်းဗျုဟာ ဝိုင်းခံရချိန် အနီးတဝိုက်က ရွာကို လက်နက်ကြီးနဲ့စစ်တပ်ပစ်ခတ်

နိုင်ပကောင်း/People’s Spring

ဘုရားသုံးဆူ – သံဖြူ ဇရပ် လမ်းပိုင်းက အနန်းကွင်းဗျုဟာပိတ်ဆို့တိုက်ခိုက်ခံရချိန် စစ်ကောင်စီတပ်က လက်နက်ကြီးပစ်ကူပေးရာမှာ ဖားပြရွာကို ပစ်မှတ်ထားပြီး ၂ ရက်ဆက်တိုက် ပစ်ခတ်တာရှိလာတယ်လို့ ကရင်စစ်ရေးသတင်းရင်းတွေက ပြောပါတယ်။

စစ်ကောင်စီရဲ့ ဗျုဟာတပ်စခန်းရှိတဲ့ အနန်းကွင်းရွာနဲ့ ဖားပြရွာဟာ ၁၄ မိုင်ခန့်ဝေးပါတယ်။

Public Service Announcement

အနန်းကွင်းဗျုဟာ ပိတ်ဆို့ တိုက်ခိုက်ခံရချိန်မှာ စက်တင်ဘာလ ၁၆ ရက်နဲ့ ၁၇ ရက်တွေမှာ စစ်ကောင်စီတပ်က လက်နက်ကြီးနဲ့ ဖားပြရွာထဲကို ပစ်မှတ်ထားပစ်ခတ်လာတာလို့ သိရပါတယ်။

လက်နက်ကြီးပစ်ခတ်မှုကိုတော့ သံဖြူဇရပ်မြို့ ၊ ဝဲကလိရွာအခြေစိုက် စစ်တပ်က တာဝေးပစ် ဟောင်ဝစ်ဇာအမျိုးအစား အမြှောက်နဲ့ပစ်ခတ်တာလို့ ကရင်စစ်ရေးသတင်းရင်းမြစ်က ပြောပါတယ်။

လက်နက်ကြီးကျည်ဟာ ဖားပြရွာထဲ ကျရောက်ပေမယ့် လူထိခိုက်မှုမရှိဘူးလို့သိရပါတယ်။

“(ရွာသားတွေ) ထိခိုက်မှုတွေမရှိပါဘူး၊ အချို့ကတော့ ပြောင်းရွှေ့နေကြပါပြီ” လို့ ဖားပြကျေးရွာ ဒေသခံကပြောပါတယ်။

ဖားပြရွာအနီးက ကျုံခဝန်ရွာကိုလည်းပြီးခဲ့တဲ့ ရက်ပိုင်း စက်တင်ဘာလ ၉ ရက် မနက်ပိုင်းက လေကြောင်းကနေ တိုက်ခိုက်လာတာကြောင့် ကလေး ၁ ဦီးအပါအဝင် အရပ်သား ၂ ဦီးထိခိုက်ဒဏ်ရာရတဲ့ ဖြစ်စဉ်ဖြစ်ထားပါတယ်။

အနန်းကွင်းဗျုဟာကို ဖြတ်တောက်ပိတ်ဆို့ တိုက်ခိုက်ခံနေရချိန်မှာ မြေပြင်ကနေ စစ်ကူပို့ဖို့ ခက်ခဲလာတဲ့ စစ်ကောင်စီဟာ လက်နက်ကြီးပစ်ကူ၊ လေကြောင်းပစ်ကူနဲ့ လှမ်းပစ်တာလို့ ကရင်စစ်ရေးသတင်းရင်းမြစ်ကပြောပါတယ်။

ဘုရားသုံးဆူ – သံဖြူဇရပ်လမ်းပိုင်းကို စိုးမိုးထားတဲ့အနန်းကွင်းဗျုဟာနဲ့ လွတ်ရှမ်းရွာ စခန်းတွေကို KNU နဲ့ပူးပေါင်းတပ်က တိုက်ခိုက်ရာမှာ လွတ်ရှမ်းရွာစခန်းကိုစစ်ကောင်စီက ပြီးခဲ့တဲ့ ရက်ပိုင်းက လက်လွှတ်လိုက်ရပါတယ်။

တိုက်ပွဲတွေကြောင့် အနန်းကွင်းနဲ့လွတ်ရှမ်းရွာ အပါအဝင် အနီးတဝိုက်ရွာတွေက ဒေသခံတွေ စစ်ရှောင် နေကြရပါတယ်။