မကွေးတိုင်း ပွင့်ဖြူမြို့နယ် ရှောက်တော-မဲဇလီလမ်း တွင် မြို့မရဲစခန်းမှူးနှင့် စစ်ကောင်စီတပ်သားများပါရှိသော မော်တော်ယာဥ်ကို မိုင်းခွဲတိုက်ခိုက်ရာ စစ်ကောင်စီတပ်သားလေးဦးသေဆုံးခဲ့သည်ဟု PDF Pwintbyu က ယနေ့(အောက်တိုဘာ၂၁) အသိပေး ထုတ်ပြန်သည်။
တိုက်ပွဲဖြစ်စဥ်မှာ အောက်တိုဘာ ၂၀ ရက် ည၁၁နာရီခွဲ တွင် ပွင့်ဖြူမြို့မရဲစခန်းမှူးမောင်းနင်လာသော ကားနှင့် စစ်ကောင်စီတပ်သားများပါရှိသော ကားတစ်စီးကို မိုင်းနှစ်ကြိမ်ခွဲခဲ့ခြင်း ဖြစ်သည်။
ပထမအကြိမ်မိုင်းခွဲတိုက်ခိုက်မှုအတွင်း စခန်းမှူးမောင်းနှင်းသည့် ကားမှာ ပြင်းထန်စွာထိခိုက်ခဲ့သည်ဟု ယူဆရပြီး စစ်ကောင်စီတပ်သားများပါရှိသောယာဥ်မှာ အနည်း ငယ်သာထိခိုက်ခဲ့သည်။
ထို့ကြောင့် ဒုတိယအကြိမ်မိုင်းခွဲရာ စစ်ကောင်စီတပ်သားပါရှိသော ကားပေါ်မှ ဆင်းလာသည့် တပ်သားလေးဦး သေဆုံးခဲ့သည်ဟု PDF Pwintbyu ဆိုသည်။
Public Service Announcement
ကျန်ရှိသည့် စစ်ကောင်စီတပ်သားများက ပစ်ခတ်မှုများစွာ ပြုလုပ်သဖြင့် လမ်းပိုင်းတွင်မြှုပ်ထားသည့် လက်ကျန်မိုင်းများကိုပါ တစ်ပါတည်းဖောက်ခွဲခဲ့သည်ဟု PRA(မကွေး)၏ တပ်ဖွဲ့ဝင်တစ်ဦးက ပြောသည်။
“ဒုတိယအကြိမ် ဖောက်ခွဲတော့ စစ်ခွေးတွေသေတာ သေချာတယ်။နောက်အလုံးတွေထပ် ဖောက်တော့သေ၊မသေမသိသေးဘူး”ဟု ၎င်းက ပြောသည်။
လူထုတော်လှန်ရေးအင်အားစု PRA (မကွေး)နှင့် PDF Pwintbyu တို့ ပူးပေါင်း ၍ တိုက်ခိုက်ခဲ့သည့် ယမန်နေ့ည တိုက်ပွဲ၌ ပြည်သူ့တပ်ဖွဲ့ဝင်ဘတစ်စုံတစ်ဦးမျှ ထိခိုက်ခဲ့ခြင်းမရှိဟု သိရသည်။
