Connect with us

Hi, what are you looking for?

ဆောင်းပါး

အပြီးသတ် သိမ်းပိုက်ဖို့ နီးကပ်လာတဲ့ ဗန်း​မော်မြို့သိမ်းတိုက်ပွဲ

ကချင်လွတ်လပ်ရေးတပ်မတော်(KIA) က ဆင်နွှဲနေတဲ့ ကချင်ပြည်နယ် ဗန်းမော်မြို့သိမ်းတိုက်ပွဲအတွင်း ဗန်း​မော်လေဆိပ် နဲ့ သံချပ်ကာ တပ်ရင်း အပါအဝင် စစ်တပ် တပ်စွဲရာ​နေရာ​တွေ တပ်စခန်းတွေ ထပ်မံသိမ်းပိုက်ရရှိပြီး တမြို့လုံးသိမ်းပိုက်ဖို့နီးစပ် လာတဲ့အကြောင်း ဒီတစ်ပတ်မှာပြောပြချင်ပါတယ်။

ဟန်​နွေ/ People’s Spring

ကချင်လွတ်လပ်ရေးတပ်မတော်(KIA) က ဆင်နွှဲနေတဲ့ ကချင်ပြည်နယ် ဗန်းမော်မြို့သိမ်းတိုက်ပွဲအတွင်း ဗန်း​မော်လေဆိပ် နဲ့ သံချပ်ကာ တပ်ရင်း အပါအဝင် စစ်တပ် တပ်စွဲရာ​နေရာ​တွေ တပ်စခန်းတွေ ထပ်မံသိမ်းပိုက်ရရှိပြီး တမြို့လုံးသိမ်းပိုက်ဖို့နီးစပ် လာတဲ့အကြောင်း ဒီတစ်ပတ်မှာပြောပြချင်ပါတယ်။

ကချင်ပြည်နယ်ရဲ့ ဒုတိယအကြီးဆုံးမြို့ဖြစ်သလို စစ်ရေးအရ အရေးပါတဲ့ စစ်ကောင်စီ အမှတ်(၂၁) စစ်ဆင်ရေးကွပ်ကဲမှုဌာနချုပ်(စကခ-၂၁) အခြေစိုက်ထားတဲ့ ဗန်းမော်ကို KIA ဦး​ဆောင်တဲ့မဟာမိတ်ပူးပေါင်းတပ်ဖွဲ့တွေက ၂၀၂၄ ဒီဇင်ဘာ ၄ရက်မှာစတင်ထိုးစစ်ဆင်ခဲ့တာဖြစ်ပါတယ်။

Public Service Announcement

Public Service Announcement

ဗန်းမော်နဲ့အတူ တပြိုင်တည်း ထိုးစစ်ဆင်ခဲ့တဲ့ ကချင်ပြည်နယ် မံစီမြို့နယ်က လက်ကျန် စစ်ကောင်စီတပ်စခန်းတွေကို ဇန်နဝါရီ ၈ ရက်မှာ အပြီးသတ်ာသိမ်းပိုက်နိုင်ခဲ့ပါတယ် ။ဗန်းမော်မြို့ကိုအပြီးသတ်သိမ်းပိုက်နိုင်ဖို့ KIA က စစ်ဆင်ရေးကိုလည်းတဆင့်ပြီးတဆင့် အရှိန်မြှင့်ခဲ့ရာ အောင်မြင်မှုတွေရရှိခဲ့ပါတယ်။

ဧရာဝတီမြစ် အ​ရှေ့ဘက်ကမ်းမှာရှိတဲ့ ဗန်း​မော်မြို့ဟာ ကချင်ပြည်နယ် ရဲ့ဒုတိယမြို့​တော် ဖြစ်ပြီး​တော့ တရုတ်နယ်စပ်နဲ့ မိုင် ၄၀ ခန့်ကွာ​ဝေးပါတယ် ။ မြို့​တော် မြစ်ကြီးနားမြို့ ရဲ့တောင်ဘက် ၁၁၅ မိုင်အကွာမှာတည်ရှိပါတယ် ။

၂၀၁၄ သန်း​ခေါင်စာရင်းအရ ဗန်း​မော်မြို့မှာ လူဦး​ရေ ၅၈၀၀၀ ​ကျော် ၊ မြို့နယ်အတွင်းက ကျေးရွာ​တွေမှာ လူဦး​ရေ ၇၇၀၀၀ ​ကျော်ရှိပြီး​တော့ ဗန်း​မော်မြို့နယ်တစ်ခုလုံးမှာ လူဦး​ရေ စုစု​ပေါင်း ၁၃၅,၀၀၀ ​ကျော်​​နေထိုင်ပါတယ် ။

မြို့အ​ရှေ့ဘက်မှာ မိုး​မောက်မြို့နယ် နဲ့ လွယ်ဂျယ်မြို့ ၊ ​တောင်ဘက်မှာ မံစီမြို့ ၊ အ​နောက်ဘက်မှာ ​ရွှေကူ မြို့ နဲ့ မြို့လှမြို့ ၊ ​မြောက်ဘက်မှာဆင်ဘိုနဲ့ ဒေါ့ဖုန်းယန်မြို့တို့ရှိပါတယ် ။ ဗန်း​မော်မြို့အနီးက မိုး​မောက် ၊လွယ်ဂျယ် ၊မံစီ ၊ မြို့လှ ၊ဆင်ဘို ၊​ဒေါ့ဖုန်းယန် မြို့​တွေကို KIA နဲ့ မဟာမိတ်တပ်​တွေကသိမ်းပိုက်ထိန်းချုပ်ထားပြီးချိန်မှာ ဗန်း​မော်မြို့ကို ထိုးစစ်ဆင်လာတာဖြစ်ပါတယ် ။

နှစ်သစ်ကူးကာလမှာ တိုက်ပွဲတွေအနည်းငယ် ငြိမ်သက်သွားတဲ့ ဗန်းမော်နဲ့ မံစီ မြို့သိမ်းစစ်ဆင်ရေးကို KIAက ဇန်နဝါရီ ၆ရက်မှ စစ်ရှိန်မြှင့် ထိုးစစ်ဆင်ခဲ့ရာ မံစီအခြေစိုက် တပ်ရင်းဌာနချုပ်တွေဖြစ်တဲ့ ခမရ(၃၁၉)၊ အမှတ် (၆၀၁) ​ခြေလျင်တပ်ရင်း (ခမရ-၆၀၁)နဲ့ အမှတ် ၃၅၂ အ​မြောက်တပ် (အမတ-၃၅၂)တပ်စခန်းတွေကို ဇန်နဝါရီ ၈ရက်မှာ အပြီးသတ်သိမ်းပိုက်နိုင်ခဲ့ပါတယ်။မံစီက တပ်စခန်းတွေကနေ စစ်ကောင်စီရဲ့ လက်နက်ခဲယမ်းအများအပြားကိုလည်း KIA ပူးပေါင်းတပ်ကရရှိခဲ့ပါတယ်။

မံစီသိမ်းပြီးတဲ့ KIAပူးပေါင်းတပ်ဟာ ဗန်းမော်က စကခ(၂၁)၊ ခလရ(၄၇) အပါအဝင် မြို့မှာရှိတဲ့ စစ်ကောင်စီတပ်ရင်းဌာနချုပ်တွေကို ဆက်လက်ထိုးစစ်ဆင်ခဲ့သလို စစ်ကောင်စီဘက်ကလည်း လေကြောင်း၊ လက်နက်ကြီး၊ ဒရုန်းအသုံးပြု ပြီးအပြင်းအထန်ခုခံခဲ့ပါတယ်။

ဇန်နဝါရီ လလယ်မှာ ဗန်းမော်မြို့ပေါ်မှာ ပြောက်ကျားတိုက်ပွဲတွေ ဆက်ရှိနေပြီး နေ့စဉ်ဆိုသလို လေကြောင်း တိုက်ခိုက်မှု၊ ဒရုန်း၊ လက်နက်ကြီး အပြန်အလှန် တိုက်ခိုက်မှုတွေရှိနေခဲ့တယ်လို့ ကချင်စစ်ရေးသတင်းရင်းမြစ်တွေက ပြောပါတယ်။

စစ်ရေးဗျူဟာအရ နားလိုက် စစ်ရှိန်မြှင့်လိုက်နဲ့ စစ်ကောင်စီကို နည်းမျိုးစုံနဲ့ ထိုးစစ်ဆင်နေတဲ့ KIAဟာ ဇန်နဝါရီ ၂၄ရက်မနက်မှာ​တော့ စစ်ဆင်ရေး အရှိန်ထပ်မြှင့်လိုက်ပါတယ် ။

စကခ(၂၁) အနီးက စစ်ကောင်စီတပ်ရင်းဌာနချုပ်တွေကိုတိုက်ခိုက်ခဲ့ရာ အဲဒီနေ့မှာပဲ အမှတ်(၆၀၀၇) သံချက်ကာ တပ်ရင်းကို စီးနင်းနိုင်ခဲ့ပြီး စစ်ကောင်စီရဲ့ သံချပ်ကာ ယာဉ် ၄စီးကို သိမ်းပိုက်ရရှိခဲ့ပါတယ်။

တိုက်ပွဲဆက်လက်ပြင်းထန်ခဲ့ပြီး ဇန်နဝါရီ ၂၅ရက်ညနေမှာ သံချပ်ကာ တပ်ရင်းကို အပြီးသတ်သိမ်းနိုင်ခဲ့ပြီး စစ်ကား ၁စီးနဲ့ သံချပ်ကာယာဉ်တွေကို ထပ်မံရရှိခဲ့တယ်လို့ စစ်ရေးသတင်းရင်းမြစ်တွေက ပြောပါတယ်။ KIA သတင်းပြန်ကြားရေးဌာနရဲ့ အသိပေးချက်မှာ ၆၀၀၇ သံချပ်ကာ တပ်ရင်းက သိမ်းရတဲ့ သံချပ်ကာယာဉ် ၇စီးရှိတယ်လို့ ဖော်ပြထားပါတယ်။

ကချင်စစ်ရေးသတင်းရင်းမြစ် အချို့ကတော့ ဇန်နဝါရီ ၂၄ရက်မှာ သံချပ်ကာ ၄စီး၊ ၂၅ရက်တိုက်ပွဲမှာ နောက်ထပ် သံချပ်ကာ ၄စီးနဲ့ စစ်သုံးထရပ်ကား၁စီး တို့ သိမ်းရခဲ့တာကြောင့် KIA သိမ်းရတဲ့ သံချပ်ကာယာဉ်ဟာ ၈စီးဖြစ်တယ်လို့ ဆိုပါတယ်။

သံချပ်ကာ တပ်ရင်းကို သိမ်းပိုက်နိုင်ခဲ့တဲ့ KIA ပူးပေါင်းတပ်ဟာ စကခ(၂၁) အနီးက အမြောက်တပ်နဲ့ လေယာဉ်ကွင်းက စစ်ကောင်စီတပ်တွေကို ဆက်လက်တိုက်ခိုက်ခဲ့ပြီး​ ဗန်း​မော်​လေယာဥ်ကွင်းကိုပါထပ်မံသိမ်းပိုက်နိုင်ခဲ့ပါတယ်။

စကခ(၂၁)နဲ့ ဆက်စပ်တည်ရှိနေတဲ့ အမြောကတပ် အမတ(၃၆၆) တိုက်ပွဲမှာဆိုရင် KIAပစ်ခတ်တဲ့ လက်နက်ကြီးကြောင့် အမြောက်တပ် လက်နက်ခဲယမ်းသိုလှောင်ရုံဟာ ဇန်နဝါရီ ၂၅ရက် ညပိုင်းမှာ ၃နာရီကြာ မီးလောင်ပေါက်ကွဲခဲ့တယ်လို့ ဆိုပါတယ်။

ဇန်နဝါရီ ၂၃ ရက်​နေ့မှာလည်း ဗန်းမော်မြိုသိမ်းတိုက်ပွဲဟာ ပြင်းထန်ခဲ့ပြီးစကခ(၂၁)စကခမှူး ဗိုလ်မှူးချုပ်တင်မင်းလတ် ဒဏ်ရာအပြင်းထန်ရခဲ့တဲ့အတွက်အဲဒီ နေ့လယ်ပိုင်းမှာပဲ .စစ်​ကောင်စီကရဟတ်ယာဉ်နဲ့ သယ်​ဆောင်သွားတယ် လို့ ကချင်စစ်‌ ရေးသတင်းရင်းမြစ်အချို့ကလည်းပြောပါတယ် ။ဗိုလ်မှူးချုပ်တင်မင်းလတ်ဟာ စစ်တက္ကသိုလ်အမှတ်စဉ်(၄၁) ဆင်းဖြစ်ပါတယ်။

ဇန်နဝါရီ ၂၆ရက်မှာ စကခ(၂၁)အနီးက ဗန်းမော်လေယာဉ်ကွင်းကို KIA ပူးပေါင်းတပ်တွေ ဝင်ရောက်နိုင်ခဲ့တဲ့ ရုပ်သံတွေ လူမှုကွန်ရက်မှာ ပျံ့နှံ့လာပြီး အဲဒီနေ့ ညနေမှာတော့ လေယာဉ်ကွင်းကို အပြီးသတ် သိမ်းနိုင်ခဲ့ပါတယ်။

​နွေဦး​တော်လှန်​ရေးမှာ MNDAA နဲ့ပူး​​ပေါင်းတပ်​တွေရဲ့လားရှိုးမြို့သိမ်းတိုက်ပွဲ နဲ့ အ​ရှေ့​​မြောက်တိုင်းစစ်ဌာနချုပ် သိမ်းတိုက်ပွဲမှာ လားရှိုး​လေယာဥ်ကွင်းကိုသိမ်းပိုက်ခဲ့ပါတယ် ။ AA ရဲ့ငပလီ နဲ့သံတွဲမြို့သိမ်းတိုက်ပွဲမှာ သံတွဲ​လေးယာဥ်ကွင်းကို သိမ်းပိုက်ခဲ့ပါတယ် ။ အမ်းမြို့သိမ်းတိုက်ပွဲနဲ့ အ​နောက်ပိုင်းတိုင်း စစ်ဌာနချုပ် (နပခ) သိမ်းတိုက်ပွဲမှာ အမ်း​လေဆိပ်ကို လည်း အာရက္ခခတပ်​တော်က အမ်း​လေဆိပ်ကို သိမ်းပိုက်ခဲ့ပါတယ် ။

ဒါအပြင် ချင်းညီနောင်က မြို့သိမ်းတိုက်ပွဲဆင်နွှဲ​နေတဲ့ ဖလမ်း မြို့သိမ်းတိုက်ပွဲမှာ ဖလမ်းအခြေစိုက် ဆူရ်ဘုန်လေဆိပ်ကို သိမ်းပိုက်ရရှိထားတဲ့ မှတ်တမ်းဓာတ်ပုံအချို့လည်း တွေ့ရပါတယ်။

ဒါ​ကြောင့် ဗန်း​မော်​လေယာဥ်ကွင်းသိမ်းနိုင်တာဟာ​တော်လှန်​ရေးတပ်​တွေအတွက် ​ငါးခု​မြောက်​လေယာဥ်ကွင်းပါ ။KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူကလည်းဗန်းမော် လေယာဉ်ကွင်း သိမ်းတာကို အတည်ပြုပါတယ် ။

စစ်ဘက်ရေးရာ လုံခြုံရေးတပ်ဖွဲ့(စရဖ)ရုံးတွေကိုလည်း KIA နဲ့ ပူး​ပေါင်းတပ်​တွေက ထပ်မံသိမ်းပိုက်ရရှိခဲ့ကြောင်းကိုလည်း ဇန်နဝါရီ ၂၇ ရက်မှာအတည်ပြုပါတယ်။ ဒါ​ပေမယ့် စစ်​ကောင်စီတပ်​ဟာ စကခ (၂၁ ) ကိုစုပြုံဆုတ်ပြီး ဝိုင်းဝန်းခုခံ​နေကြတာဖြစ်သလို KIA နဲ့ ပူး​ပေါင်းတပ်​တွေကလည်း ပိတ်ဆို့ဝန်းရံတိုက်ခိုက်​နေတာဖြစ်ပါတယ် ။

ဗန်းမော်မှာ တပ်စခန်းတွေ တပ်စွဲရာ နေရာအများအပြားတွေ ဆုံးရှုံးထားရတဲ့ စစ်ကောင်စီတပ်ဟာ လေကြောင်း ၊ လက်နက်ကြီး ဒရုန်း အသုံးပြု တိုက်ခိုက်ခုခံ​နေပါတယ် ။ ဗန်း​မော်မြို့သိမ်းတိုက်ပွဲ အထိနာရင် စစ်တပ်ဟာ KIA ဌာနချုပ် လိုင်ဇာကိုပါ အသေခံ ဒရုန်းတွေနဲ့ ပစ်ခတ်တိုက်ခိုက်တာတွေလည်း ရှိခဲ့ပါတယ်။

ဒီလို တိုက်ခိုက်ခံရမှုတွေရှိပေမယ့် KIAဟာ နှစ်လနီးပါး ကြာပြီဖြစ်တဲ့ ဗန်းမော် မြို့ စစ်ဆင်ရေးကို ဆက်လက် ဆင်နွှဲနေပြီး ဗန်းမော်မြို့ ဧရိယာ အများစုနဲ့ စစ်ကောင်စီရဲ့ အရေးပါတဲ့ တပ်ရင်းဌာနချုပ် အချို့ကို သိမ်းပိုက်ရရှိထားပါတယ်။

ဒီလို စစ်ရေးအောင်မြင်မှုတွေ ဆက်တိုက်ရရှိနေတဲ့ KIA အနေနဲ့ ကုန်းကြောင်း၊ရေကြောင်း၊ လေကြောင်း အရ ဆက်သွယ်သွားလာနိုင်ပြီး စစ်ရေးဗျူဟာကျတဲ့ ဗန်းမော်မြို့သိမ်းစစ်ဆင်ရေးကို မဖြစ်မနေ အောင်မြင်မှုရအောင် လုပ်ဆောင်လိမ့်မယ်လို့ စစ်​ရေးအကဲခတ်တွေက သုံးသပ်ပါတယ်။

တစ်ဖက်မှာလည်း စစ်ကောင်စီကလည်း ကချင်ပြည်နယ် စစ်ရေးအတွက် အရေးပါတဲ့ ဗန်းမော်မြို့ မကျဖို့ လေကြောင်း ၊ ဒရုန်း၊ လက်နက်ကြီးတွေ အလွန်အကျွံအသုံးပြု ခုခံနေတာကြောင့် တိုက်ပွဲဟာ ဆက်လက်ပြင်းထန်​နေပါတယ်။ဒါ့အပြင် နှစ်ဖက်ထိခိုက်ကျဆုံးမှုတွေလည်း အများအပြား ရှိနေတယ်လို့ ကချင်စစ်ရေး၊ နိုင်ငံရေး လေ့လာသူ ဦးဇော်ဆန်ကပြောပါတယ်။

KIA အနေနဲ့သူ့ရဲ့ စစ်ရေး ၊နိုင်ငံရေး ရည်မှန်းချက်အရ ဗန်းမော် ကို အရသိမ်းပြီး မြောက်ပိုင်းတိုင်း စစ်ဌာနချုပ်(မပခ) အခြေစိုက်ရာ မြစ်ကြီးနားနဲ့ ဝိုင်းမော်၊ ဖားကန့်စတဲ့ လက်ကျန်မြို့တွေကို ဆက်လက် သိမ်းနိုင်ဖို့ ထိုးစစ်ဆင်မှုတွေ ဆက်ရှိမယ်လို့လည်း ဦးဇော်ဆန်က ခန့်မှန်းပါတယ်။

ဒါကြောင့် ၂၀၂၄ မတ်လ ၇ရက်က အစပြုပြီး KIA က ဖော်ဆောင်နေတဲ့ စစ်အာဏာရှင် အမြစ်ဖြတ်သိမ်းရေး စစ်ဆင်ရေးဟာ တစ်နှစ်မပြည့်မီမှာပဲ ကချင်ပြည်နယ်အတွင်း မြို့​ပေါင်း ၁၄ မြို့နဲ့ ရှမ်းပြည်နယ်​မြောက်ပိုင်းမှာ မဘိမ်းမြို့ နဲ့ နမ့်ဖက်ကာဗျူဟာတို့ကို သိမ်းပိုက်ထားပါတယ်။ဒါ​ကြောင့် ကချင်ပြည်နယ်မှာ KIA ဦး​ဆောင်တဲ့ ပူး​ပေါင်း တပ်​တွေရဲ့၁၅ မြို့​မြောက်အဖြစ် ပြည်နယ်အတွင်း ဗျူဟာ​မြောက် လှတဲ့ ဗန်း​မော်မြို့ကိုအပြီးသတ်သိမ်းနိုင်ဖို့ နီးကပ်လာပြီလို့ စစ်​ရေး​လေ့လာသူ​တွေက သုံးသပ်​ကြပါတယ် ။

ဆက်စပ်သတင်းများ

သတင်း

ကချင်ပြည်နယ်၊ ဆော့လော်မြို့နယ်၊ လန်ဆယ်ဒေသရှိ ရွှေတူးဖော်ရေးလုပ်ကွက်တစ်ခုတွင် အမျိုးသားတစ်ဦး မြေစာပုံပေါ်မှပြုတ်ကျ သေဆုံးသည့်ဖြစ်စဉ်ဖြစ်ခဲ့သည်။

သတင်း

ကချင်လွတ်လပ်ရေးတပ်မတော်(KIA) ဌာနချုပ် လိုင်ဇာအပါအဝင် ကချင်ဒေသနေရာ ၈ခုထက်မနည်းကို စစ်ကောင်စီက တိုက်လေယာဉ်၊ အသေခံဒရုန်းများအသုံးပြု၍ လေကြောင်း တိုက်ခိုက်ခဲ့ကြောင်း KIA သတင်းပြန်ကြားရေးဌာနက ဖော်ပြသည်။

သတင်း

ကချင်လွတ်လပ်ရေးတပ်မတော်(KIA)တိုက်ခိုက်သိမ်းပိုက်ထားသည့် ကချင်ပြည်နယ်၊ ဆော့လော်မြို့နယ် လန်ဆယ်ဒေသနှင့် ဆဒုံးဒေသအား စစ်ကောင်စီက ယနေ့(ဖေဖော်ဝါရီ ၇ရက်) လေကြောင်းမှ ဗုံးကြဲတိုက်ခိုက်ခဲ့ကြောင်း ကချင်သတင်းရင်းမြစ်က ပြောသည်။

သတင်း

ပွဲဝင်သွားမည်ဖြစ်ကြောင်း အဖွဲ့ ဥက္ကဋ္ဌ ဗိုလ်ချုပ်ကြီးအင်ဘန်လက ယနေ့(​ဖေ​ဖော်ဝါရီ ၅) ကျရောက်သည့် ကချင်တော်လှန်ရေးနေ့ မိန့်ခွန်း၌ ​ပြောကြားခဲ့သည်။