Gidawn Brang
တော်လှန်ရေးဆိုတာစိတ်လောလို့မရဘူး။ကလဲ့စားချေလို့တဲ့စိတ်တစ်ခုတည်းနဲ့စိတ်လိုက်မာန်ပါလုပ်လို့မရဘူး။အကွက်တစ်ကွက်ရွေ့မှားတာနဲ့အသက်ပေါင်းများစွာစတေးသွားရမယ်။
အားမနာတမ်းပြောရမယ်ဆိုရင် ပြည်မဘက်ကPDF ခေါင်းဆောင်အချို့တော်လှန်ရေးကို Picnic ထွက်သလိုခေါ်လုပ်နေကြတာတွေ့ရတယ်။ဗျူဟာမဲ့ ရှေးတန်းခေါ်ထွက်တယ်။လမ်းခုလတ်မှာလက်နက်နှင့်တစ်ကွ ဖမ်းခံရသူတွေများလာတယ်။ အသတ်ခံရသူတွေများလာတယ်။
စစ်၏သဘော သဘာဝရင့်ကျက်မှု အတွေ့အကြုံကနုနယ် သေးလို့ဆိုတာကိုနားလည်ပေမဲ့ အသက်တွေက အပိုမပါဘူး။
နောက်ပြီး PDFများကိုသနားစိတ် ချစ်တဲ့စိတ်များဖြင့် ပို့ပေးသော အလှူငွေများ အသုံးအဆောင်များကို စည်းမဲ့ကမ်းမဲ့ သုံးဖြုန်းကြတယ်။အားလုံးကိုဆိုလိုတာမဟုတ်ပေမဲ့ အချိူ့ PDF ခေါင်းဆောင်များမလုပ်သင့်တာတွေကို မလုပ်ဖို့ ပြည်သူများ၏ချွေးနည်းစာများကို တန်ဖိုးထားတတ်ဖို့ မေတ္တာဖြင့်သတိပေးလိုပါတယ်။
Popular ဖြစ်ချင်တယ်။တော်လှန်ရေးလုပ်တာကိုအခွင့်ကောင်းယူပြီးကြွားဝါချင်စိတ်များနေကြတယ်။မိမိတို့သူငယ်ချင်းများနှင့်မိသားစုဝင် များကိုကျွန်တော်တို့ဒီမှာရှိတယ်၊ဟိုမှာနေတယ်ဓာတ်ပုံတွေပို့တယ်။ပြောသင့်မပြောသင့်သတင်းပေါင်းစုံပြောတယ်။ ဘယ်သူ့ကိုမှမပြောနဲ့နော် မင်းတို့ဘဲသိပါစေ…ဆိုရာကနေရန်သူများတည်နေရာအတိအကျသိရှိသွားကာမမျော်လင့်ထားတဲ့အချိန် စခများရောက်လာကာ အသက်ဆုံးရှုံးသွား သော PDFများလည်းမနည်းတော့ဘူး။
မနေနိုင်လွန်းလို့အမုန်းခံပြီးပြောဗျစေ။
“ကျေးဇူးပြုပြီးတော်လှန်ရေးကိုအထူးသတိပြုကာအာရုံစိုက်ရအောင်။ စိတ်ဓာတ်တွေရိုးသားကြရအောင်။ပြည်သူများ၏စေတနာမေတ္တာများကိုတန်ဖိုးထားကြရအောင်။တော်လှန်ရေးကိုထိခိုက်နစ်နာစေမည့်အရာအားလုံးကိုအထူးရှောင်ရှားကြရအောင် စားသတိ သွားသတိနဲ့သိုသိပ်စွာလုပ်ဆောင်တတ်ဖို့အင်မတန်အရေးကြီးသောကာလပါ။အသက်တွေမသေသင့်ဘဲသေနေရတာဘယ်သူကြောင့်လဲ။ စခတွေကြောင့်ဆိုပေမဲ့ကျွန်တော်တို့ရဲ့ပေါ့လျော့မှုတွေလည်းအများကြီးပါနေတယ်။”
မင်းတို့ရဲ့ကျဆုံးသတင်းတွေမကြာခဏတက်လာတော့ဘယ်သူမွေးမွေးငါတို့သွေးသားတွေပါဆိုတဲ့ပြည်သူများထပ်ခါထပ်ခါ ရင်ကွဲနေကြပြီ။ အောင်ပွဲသတင်းများကိုသာမျော်လင့် နေကြတဲ့ပြည်သူများအတွက် ငါ့ညီတို့ ဂရုစိုက်ကြပါကွာ။
တော်လှန်ရေးအပြီးထိမင်းတို့တွေ ရှင်သန်နေဖို့စေတနာကြီးစွာဖြင့်ဤစာအားရေးလိုက်ရပါတယ်။
(ဆောင်းပါးရှင် Gidawn Brang ဟာကချင်တိုင်းရင်းသားတစ်ဦးဖြစ်ပြီးတော့ နွေဦးတော်လှန်ရေးမှာ စစ်ရေး၊ နိုင်ငံရေးနဲ့ပတ်သပ်တဲ့ဆောင်းပါးတွေကိုရေးသားအကြံပြုနေသူတစ်ဦးဖြစ်ပါတယ်)