ကချင်ပြည်နယ် မိုးမောက်မြို့နယ်မြို့သစ်ရွာအနီးတွင် ကချင်လွတ်လပ်ရေးတပ်မတော်(KIA)နှင့် အာဏာသိမ်းစစ်ကောင်စီတပ်တို့ အကြား ယနေ့တိုက်ပွဲဆက်လက်ပြင်းထန်နေဆဲဖြစ်ကြောင်းဒေသခံ အချို့က ပြောသည်။
မိုးမောက်မြို့နယ် အတွင်းရှိ စစ်ကောင်စီ၏ အလော့ဘွမ်တပ်စခန်းကို KIAက မတ်လ ၂၅ ရက်တွင် တိုက်ခိုက်သိမ်းပိုက်ခဲ့ရာ စစ်ကောင်စီက အဆိုပါတပ်စခန်းပြန်လည်ရရှိရေးအတွက် ဧပြီ ဒုတိယပတ်မှစ၍ မြေပြင်နှင့် ဝေဟင်မှ ထိုးစစ်ဆင်တိုက်ခိုက်လျက်ရှိသည်။
“တိုက်တာ ရက်ကြာနေပြီ။ ဒီ(စစ်ကောင်စီ)ကလည်းထပ်ထိုး ဟို(KIA)ကလည်း ပြန်တိုက် ခံတိုက် နဲ့ တောက်ေလျှာက်ဖြစ်နေတယ်။လေယာဉ်လည်း တောက်လျှောက်သုံးနေတယ်တိုက်။ လေယာဉ်က တိုက်လေယာဉ်နဲ့ ရဟတ်ယာဉ် နဲ့ တောက်လျောက်သွားနေတယ်။ အလော့ဘွမ် ဘက်ကို ဦးတည်နေတယ်လို့ သိရတယ် အဲဒီပတ်ဝန်းကျင်ဖြစ်တယ်ဆိုတော့ သူ့ကို ဦးတည်နေတယ်လို့ပဲယူဆရတာပေါ့”ဟု ဒေသခံတစ်ဦးက ပြောသည်။
စစ်ပွဲက ပိုမိုကျယ်ပြန့်လာနိုင်သည့် အခြေအနေဖြစ်သည်ဟု၎င်းက သုံးသပ်သည်။
ယနေ့မြို့သစ် ရွာ၊ ကုန်းလော ရွာ တစ်ဝိုက်ဖြစ်ပွားနေသည့် တိုက်ပွဲတွင် စစ်ကောင်စီက လေယာဉ်ဖြင့် ဆက်လက်တိုက်ခိုက်ခဲ့သည်ဟု မြစ်ကြီးနားဒေသခံက ပြောသည်။
Public Service Announcement
“သူတို့(စစ်ကောင်စီ)ကလည်း အဓိကတော့ အလော့ဘွမ်ကို ပြန်ရအောင် တိုက်မယ်ဆိုတော့ အဲဒီနားက အဓိကဖြစ်နေတာ။အဲဒီကနေ ဖြတ်သွားရမယ်လေ။ KIA လည်း အဲဒါကို အဓိကထားပြီး တိုက်နေတာ။”ဟု အထက်ပါမြစ်ကြီးနားဒေသခံက ပြောသည်။
အလော့ဘွမ်တပ်စခန်းကို ၁၉၈၇ခုနှစ်မှစ၍ စစ်တပ်က နေရာယူထားရာ နှစ်ပေါင်း၃၀ကျော်အကြာ ယခုနှစ် မတ်လတွင် KIAက ပြန်လည်တိုက်ခိုက် သိမ်းပိုက်ခဲ့ခြင်းဖြစ်သည်။
အလော့ဘွမ်တောင်စခန်းကို အာဏာသိမ်းစစ်ကောင်စီက ပြန်သိမ်းပိုက်နိုင်ရန် ကြည်းကြောင်း ၊ လေကြောင်းမှ ထိုးစစ်ဆင်နေသော်လည်း
စစ်ကောင်စီတပ်ဖွဲ့ဝင်များပင်သေဆုံး ဒဏ်ရာရမှုများနေသည် ။ ဧပြီ ၂၄ ရက်က လေကြောင်းတိုက်ခိုက်မှုတွင် စစ်ကောင်စီတပ်ဖွဲ့ဝင်ချင်း ပစ်မိ၍အများအပြားသေဆုံးခဲ့သည်။
