လမ်းမတော် ကိုင်းတန်း(၈)လမ်း လမ်းမပေါ်မှာ အုပ်ချုပ်ရေးမှူးတစ်ဦး ဦးခေါင်းဒဏ်ရာနဲ့ လဲကျသေဆုံးနေပြီး အဲ့ဒီအုပ်ချုပ်ရေးမှူးဟာ လမ်းမတော် (၃)ရပ်ကွက် အုပ်ချုပ်ရေးမှူး ဦးမျိုးလွင် ဖြစ်တယ်လို့ သိရပါတယ်။
သေနတ်ဒဏ်ရာနဲ့ ဦးခေါင်းပွင့် သေဆုံးတယ်လို့ ပြောနေကြပေမဲ့ ခုချိန်ထိတော့ အတည်ပြုလို့မရသေးပါဘူး။
လမ်းမတော်မြို့နယ်အတွင်း ဒီကနေ့ မနက် ၅ နာရီခွဲနဲ့ ၇ နာရီ ၅ မိနစ်အချိန်တွေမှာ ဗုံးပေါက်ကွဲမှု ၂ ကြိမ်ဆက် ဖြစ်ပွားခဲ့ပါတယ်။
“ မနက်အစောကြီး ပေါက်ကွဲမှု ၂ ကြိမ် အသံအကျယ်ကြီးကြားရတယ်။ ပထမဗုံး တစ်ကြိမ်ပေါက်ပြီးချိန်လောက်မှာ အုပ်ချုပ်ရေးမှူးကို ပစ်သတ်ခံရတယ်လို့ ကြားရတယ်။ သေနတ်သံတော့ နည်းနည်းဝေးတော့ မကြားလိုက်ရဘူး” လို့ လမ်းမတော်မြို့နယ်မှာ နေထိုင်တဲ့ အမျိုးသမီးတစ်ဦးက ပြောပါတယ်။
Public Service Announcement
အနော်ရထာလမ်းမကြီးကို ၁၅ မိနစ်ခန့် ပိတ်ထားခဲ့ပြီး လမ်းပေါ်က ဈေးဆိုင်တွေကို ပိတ်ခိုင်းထားတယ်လို့ လမ်းမတော် ၁၁ လမ်းမှာ နေထိုင်သူ အမျိုးသား တစ်ဦးက ပြောပါတယ်။
“ လမ်းတွေက အခုဖွင့်လိုက်ပါပြီ။ ဗုံးကတော့ အသံကျယ်ကြီးကြားရပြီး မီးခိုးတွေပါ ထွက်လာတယ်” လို့ အဲ့ဒီအမျိုးသားက ပြောပါတယ်။
