ထီးချိုင့်မြို့နယ် ဂွေးပင်တောင်လမ်းပိုင်းတွင် စစ်ကောင်စီတပ်ဖွဲ့များ စီးနည်းလာသည့် စစ်ကား ၂ စီးကို ဇူလိုင် ၂ရက် ည ၁၁နာရီခွဲတွင် တိုက်ခိုက်ခဲ့ကြောင်း ဖော်ပြထားသည်။
အဆိုပါဖြစ်စဉ်တွင် စစ်ကောင်စီဘက်မှ မော်တော်ယာဉ်တစ်စီး ပျက်စီးပြီး ၂၀ဦးထက်မနည်း သေဆုံးနိုင်ကြောင်း၊ အများအပြား ထိခိုက်ဒဏ်ရာ ရရှိသွားကြောင်း ထီးချုပ် PDFက သတင်းထုတ်ပြန်သည်။
ယခုတိုက်ခိုက်ခံရသည့် စစ်ယာဉ်တန်းသည် ကချင် ပြည်နယ်ဘက်သို့ လက်နက်ခဲယမ်း၊ရိက္ခာသွားပို့သည့် မော်တော်ယာဉ်များကို လုံခြုံရေး လိုက်ပါပို့ဆောင်သည့် ယာဉ်များ ဖြစ်ပြီး အပြန်ခရီးတွင် တိုက်ခိုက်ခံရ ခြင်းဖြစ်ကြောင်း ထီးချိုင့်ဒေသခံတစ်ဦးက ပြောသည်။
“ထီးချိုင့်တံတားကို ကျော်ပြီးမှ မြတောင်ဘက်အထိ ပို့ပြီးမှ ပြန်တာ။ ပြန်တဲ့အချိန်မှာပြန်တဲ့အချိန်မှာ ဖြစ်ကြတာ။ ထိခိုက်မှု ရှိလောက်တယ်။ သူတို့ ကားတစ်စီးတောင် ချောကားတစ်စီးခေါ်ပြီး ဆွဲသွားတယ် လို့ ပြောတယ်” ဟု ထီးချိုင့်ဒေသခံက ပြောသည်။
Public Service Announcement
KIA နှင့် PDF ပူးပေါင်းတိုက်ခိုက်သည်ဆိုသည်မှာလည်း ဖြစ်နိုင်ကြောင်း ၎င်း ဆိုသည်။ထီးချိုင့်မြို့နယ် မော်ကွန်းတောင်ရိုး လမ်းပိုင်းတွင်လည်း ဇွန်လ ၂၆ရက်က စစ်ကောင်စီ ယာဉ်တန်းကို KIAနှင့် PDF တို့ ပူးပေါင်းတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၄ဦးထက်မနည်း သေဆုံးခဲ့ပြီး ဒဏ်ရာရသူများလည်း ရှိကြောင်း ထီးချိုင့် PDFကသတင်းထုတ်ပြန်ထားသည်။
ထီးချိုင့်တွင် PDFများနှင့် အတူပူးပေါင်း၍ စစ်ကောင်စီကို တိုက်ခိုက်သည်ဆိုခြင်းနှင့်ပတ်သက်၍ KIA သတင်းနှင့်ပြန်ကြားရေးဌာနတာဝန်ခံ ဗိုလ်မှူးကြီးနော်ဘူအား မေးမြန်းရာ ဗဟိုဌာနချုပ်၏ လမ်းညွှန်ချက်အရ ပူးပေါင်းခြင်းမဟုတ်ကြောင်း၊ ဒေသခံနှင့် အောက်ခြေတပ် ပူးပေါင်း ဆောင်ရွက်မှု ဖြစ်နိုင်ကြောင်း ပြောကြားသည်။
