ကေအဲန်ယူ သထုံခရိုင် ဘီးလင်းမြို့နယ် လေးကေရွာထဲကို ဒီကနေ့ မွန်းလွဲပိုင်းက အကြမ်းဖက်စစ်အုပ်စု လက်အောက်ခံ နယ်ခြားစောင့်တပ် (BGF)က လက်နက်ကြီးနဲ့ ပစ်ခတ်ခဲ့တယ်လို့ သူးလေသတင်းစဉ်မှာ ဖော်ပြထားပါတယ်။
ဒီကနေ့ မွန်းလွဲပိုင်း ၁ နာရီခွဲကျော်အချိန်က လေးကေကျေးရွာ စာသင်ကျောင်းအနီးမှာ တပ်စွဲထားတဲ့ နယ်ခြားစောင့်တပ် စစ်ကွပ်ကဲရေးအဖွဲ့ ၉၉၉ စခန်းကနေ ကျေးရွာထဲကို လက်နက်ကြီးနဲ့ ၁၅ မိနစ်ခန့် ပစ်ခတ်သွားခဲ့တယ်လို့ ကေအဲန်ယူသူးလေသတင်းစဉ်ရဲ့ ဖော်ပြချက်အရ သိရပါတယ်။
လက်နက်ကြီးနဲ့ ပစ်ခတ်မှုဖြစ်စဉ်ကြောင့် ထိခိုက်ပျက်စီးဆုံးရှုံးမှုတွေကို ဆက်လက်စုံစမ်းနေတုန်းပဲလို့ အဲ့ဒီဖော်ပြချက်မှာ ပါရှိပါတယ်။
ကရင်နယ်ခြားစောင့်တပ်ဘက်က ပြောပြချက်အရ လေးကေရွာထဲမှာ တပ်စွဲထားတဲ့ နယ်ခြားစောင့်တပ် တပ်နယ် ၃ စခန်းကို KNLA တပ်မဟာ ၁ ဘက်က လာရောက်ပစ်ခတ်ခဲ့တာကြောင့် မိမိတို့ BGF ဘက်က ပြန်လည်ပစ်ခတ်ခဲ့ရတာလို့ ဆိုပါတယ်။
အဲ့ဒီပစ်ခတ်ဖြစ်စဉ်ကြောင့် နယ်ခြားစောင့်တပ်ဘက်က တစ်ဦး ထိခိုက်သွားခဲ့တယ်လို့ နယ်ခြားစောင့်တပ်ထံကနေ သိရပါတယ်။
ပြီးခဲ့တဲ့ရက်ပိုင်းက ကေအဲန်ယူ သထုံခရိုင် ဘားအံမြို့နယ်ထဲမှာ KNLA တပ်မဟာ ၁ နဲ့ အာဏာသိမ်းစစ်အုပ်စုတို့ကြား ပစ်ခတ်မှုတွေ ဖြစ်ပွားခဲ့ပြီး စစ်အုပ်စုဘက်က ပစ်ခတ်လို့ လူနေအိမ်တွေလည်း ပျက်စီးဆုံးရှုံးသွားခဲ့တာလည်း ရှိနေတာဖြစ်ပါတယ်။