မြင်းခြံမြို့နယ် တလုပ်မြို့မှ ပျူစောထီးအဖွဲ့ဝင်တစ်ဦးဖြစ်သူ ကိုတိုင်းကျော်ဆိုသူသည် ယနေ့နေ့လည်ပိုင်းတွင် သေနတ်ဖြင့် သုံးချက်ပစ်သတ်ခံရ၍ သေဆုံးခဲ့သည်။ အဆိုပါ ကိုတိုင်းကျော်သည် ပျူစောထီးအဖွဲ့ဝင် ဖြစ်ပြီး မေလကဖြစ်ပွားခဲ့သည့် တလုပ်မြို့တိုက်ပွဲတွင် စစ်ကောင်စီဘက်မှ ပါဝင်ခဲ့သည့် ဒလန်တစ်ဦးဖြစ်ကြောင်း၊ ၎င်းကို ပစ်ခတ်သည့်အဖွဲ့မှာ နှလုံးလှလူမိုက်ကြီးများအဖွဲ့ ဖြစ်ကြောင်း မြင်းခြံ Newsက သတင်းဖော်ပြသည်။
“သူက တလုပ်မြို့မှာတိုက်ပွဲဖြစ်တုန်းက ဟိုကောင်တွေဘက်က ပါလာပြီး လမ်းတွေဘာတွေပြတာတို့ လုပ်တယ်လို့ကြားတယ်” ဟု မြင်းခြံမြို့ခံတစ်ဦးက ပြောသည်။
တလုပ်မြို့ခံတစ်ဦးကမူ ကိုတိုင်းကျော်သည် တလုပ်မြို့ မြို့ကြီးကုန်း ရွာတွင်နေထိုင်သူ ဖြစ်ပြီး ၎င်းသည် ဒလန်မဟုတ်ကြောင်း ပြောကြားသည်။
“ကျွန်တော်တို့ကြားတာကတော သူ့သမီးက မူဆယ်မှာနေတာ ပိုက်ဆံတစ်သိန်းလွှဲလို့ သွားထုတ်တာ ညီအကိုနှစ်ယောက်သွားတာ သေနတ်နဲ့ပစ်လိုက်တယ်ကြားတာပဲ”ဟု တလုပ်မြို့ခံက ပြောသည်။
Public Service Announcement
မြင်းခြံမြို့နယ်သည် စစ်အာဏာရှင်ဆန့်ကျင်ရေးလူထုလှုပ်ရှားမှုအားကောင်းခဲ့သည့် မြို့နယ်တစ်ခုဖြစ်ပြီး စစ်ကောင်စီက ပစ်ခတ်သတ်ဖြတ်မှုများကြောင့် သေဆုံး ဒဏ်ရာရ ပြည်သူများစွာရှိခဲ့သည့် မြို့နယ်လည်း ဖြစ်သည်။
နောက်ပိုင်းတွင် မြင်းခြံမြို့၌ စစ်အာဏာရှင်ကို လက်နက် ကိုင်ဆန့်ကျင်သည့် အဖွဲ့များပေါ်ပေါက်လာပြီး စစ်ကောင်စီတပ်ဖွဲ့ဝင်များ၊ စစ်ကောင်စီ သတင်းပေးများ၊ စစ်ကောင်စီခန့် အုပ်ချုပ်ရေးမှူးများကို ပစ်ခတ်သတ်ဖြတ်ခြင်းများ မကြာခဏ ပြုလုပ်လျက်ရှိသည်။
