စစ်ကောင်စီလော်ဘီမိုးဟိန်း၏ ဝါဒဖြန့်ဟောပြောမှုများ ပညာရေးရုံး၊ဌာနများနှင့်တက္ကသိုလ်၊ကျောင်းများတွင် ပြသကြည့်ရှုရန် ညွှန်ကြား

မြဝတီမှအပတ်စဉ်ထုတ်လွှင့်နေသော စစ်ကောင်စီလော်ဘီမိုးဟိန်း၏ “မြန်မာနိုင်ငံအရေး အလေးအနက်တွေးသူ တစ်ဦးရဲ့စကားသံများ”ခေါင်းစဉ်ဖြင့် ရုပ်သံအပိုင်း ၂၉ပိုင်းကို ပညာရေးရုံး၊ဌာနများနှင့် တက္ကသိုလ်၊ကျောင်းများတွင် ပြသကြည့်ရှုရန် စစ်ကောင်စီအဖွဲ့၏ ညွှန်ကြားစာတစ်စောင်ထွက်ပေါ်လာသည်။

မြန်မာအရေးနှင့်ပတ်သက်သည့် သုံးသပ်ချက်အား အများပြည်သူများသိရှိစေရးအတွက် မြဝတီရုပ်မြင်သံကြားမှ “မြန်မာနိုင်ငံအရေး အလေးအနက်တွေးသူ တစ်ဦးရဲ့စကားသံများ”အစီအစဥ်အတိုင်း ၁မှ ၂၉ထိ ထုတ်လွှင့် ပြသခဲ့သည့် အစီအစဥ်မှတ်တမ်း DVB ၅ခွေအား ဝန်ထမ်းများ ကျယ်ကျယ်ပြန့်ပြန့်သိရှိစေရေးအတွက် ပြန်ကြားရေးဝန်ကြီးဌာနမှ ပေးပို့လာမှုအပေါ် “ရုံး၊ဌာန၊တက္ကသိုလ်၊ကျောင်းများတွင် ပြသကြည့်ရှုစေရန်၊ ဆောင်ရွက်မှုများပြန်လည်တင်ပြစေပါ”ဟု လမ်းညွှန်မှုပြုခဲ့ပါသဖြင့် ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်၊ရန်ကုန်မှ စီမံ/လေ့ကျင့်/သင်ကြားဝန်ထမ်းများအား ပြသဆောင်ရွက်သွားရန် DVD ၅ ခွေနှင့်အတူ အကြောင်းကြားအပ်ပါသည်ဟု ညွှန်ကြားစာတွင်ပါရှိသည်။

စစ်ကောင်စီလော်ဘီမိုးဟိန်း၏ မဟုတ်မမှန်လိမ်လည်ဟောပြောဝါဒဖြန့်ပို့ချမှုများကို စစ်ကောင်စီ၏ ဝန်ထမ်း များအပြင် တပ်တွင်းနှင့် တပ်မိသားစုများပါ မကြည့်မနေရ ဖိအားပေးမှုများပြုလုပ်နေကြောင်း သတင်းများ ထွက်ပေါ်နေသည်။

ထိုနောက် ပညာရေးဝန်များနှင့် တက္ကသိုလ်၊ကျောင်းများပါ ပြသကြည့်ရှုရန် ထပ်မံညွှန်ကြားလာခြင်း ဖြစ်သည်။

Public Service Announcement

သူရိယနေဝင်းဂျာနယ်တည်ထောင်သူမိုးဟိန်းသည် အာဏာသိမ်းစစ်ကောင်စီနှင့် ပူးပေါင်းပြီး NUG အစိုးရ၊ PDF တပ်ဖွဲ့များနှင့် CDM ဝန်ထမ်းများအပေါ် ပုတ်ခတ်၍ မဟုတ်မမှန်ဟောပြော ဝါဒဖြန့်မှုများ ဆက်တိုက်ပြုလုပ် နေသူဖြစ်သည်။