-ဖမ်းဆီးချုပ်နှောင်ထားသူ ၅၄၂၅ဦးရှိပြီး ၂၅၅ဦးမှာ ထောင်ဒဏ်ချမှတ်ခံထားရ
စစ်တပ်က အာဏာသိမ်းပြီးနောက် စစ်အာဏာရှင်တော်လှန်ရေး (နွေဦးတော်လှန်ရေး)ကာလအတွင်း စစ်တပ်၏ ပစ်ခတ်သတ်ဖြတ်မှုကြောင့် ကျဆုံးခဲ့သည့် ပြည်သူအရေအတွက်မှာ ဇူလိုင်၂၈ရက်အထိ ၉၃၆ဦးရှိပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)က ယမန်နေ့တွင် ထုတ်ပြန်သည်။
ကောက်ခံရရှိသည့် မှတ်တမ်းများအရ ဇူလိုင်၂၉ရက်တွင် ဆုံးသွားခဲ့သူများကို အတည်ပြုနိုင်ခြင်းမရှိသေးသည့် အတွက် အမှန်တကယ်ကျဆုံးသွားသူများမှာ အဆိုပါအရေအတွက်ထက် ပိုများနေနိုင်ကြောင်း အေအေပီပီက ဆိုသည်။
အေအေပီပီ၏ မှတ်တမ်းပြုချက်များအရ ဖေဖော်ဝါရီ၁ ရက်မှ ဇူလိုင်၂၉ ရက်အထိ ဖမ်းဆီးချုပ်နှောင်ခြင်း ခံထားရသူ စုစုပေါင်း ၅၄၂၅ ဦးရှိပြီး ၎င်းတို့အနက်မှ ၂၅၅ ဦးမှာ ထောင်ဒဏ်ချမှတ်ခြင်းခံထားရကြောင်း ထုတ်ပြန်ချက်တွင် ပါရှိသည်။
ထိုပြစ်ဒဏ်ကျခံရသူများအနက်မှ အသက် ၁၈ နှစ်အောက် ကလေးနှစ်ဦး အပါအဝင်၂၆ ဦးမှာ သေဒဏ်ချမှတ် ခံထားရသည်ဟုဆိုသည်။ ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ ၁၉၆၃ ဦးရှိကြောင်း၊ ၎င်းတို့အနက်မှ မျက်ကွယ်သေဒဏ်ချမှတ်ခြင်းခံထားရသူ ၃၉ ဦး အပါအဝင် ၁၁၈ ဦးမှာ မျက်ကွယ် ပြစ်ဒဏ်ချမှတ်ခြင်းခံထားရကာ ထို့ကြောင့်သေဒဏ်ချမှတ်ခံထားရသူ စုစုပေါင်း ၆၅ ဦးရှိပြီဟု ဖော်ပြထားသည်။
ဇူလိုင် ၂၈ရက်က မကွေးတိုင်းဒေသကြီး တောင်တွင်းကြီးမြို့နယ် ဟံသာတိုက်ကျေးရွာမှ လူငယ်တစ်ဦးကို PDF နှင့်ချိတ်ဆက်သည်ဟုဆိုကာ လာရောက်ဖမ်းဆီးရာ မတွေ့သည့်အတွက် ၎င်း၏ဖခင်ဖြစ်သူ ကိုဖိုးဇော်ကို ဖမ်းဆီးသွားခဲ့ကြောင်း အေအေပီပီက ဖော်ပြထားသည်။
ထို့ပြင် ဇူလိုင် ၂၈ကလည်း ပရဟိတလုပ်ငန်းများတွင်ဦးဆောင်ပါဝင်နေသူတစ်ဦးဖြစ်သည့် တောင်ငူတက္ကသိုလ် သင်္ချာဌာနမှ ကိုဇင်ကိုကိုခန့်သည် အောက်စီဂျင်လိုအပ်နေသူများအတွက် ကူညီပေးနေစဉ် ဖမ်းဆီးခြင်း ခံခဲ့ရသည်ဟု ဆိုသည်။ ၎င်းနှင့်အတူ ကိုခန့်ဇော်ပိုင်ဦး (မျောက်ကြီး) အပါအဝင် ပြည်သူလေးဦးတို့လည်း ဖမ်းဆီးခြင်းခံခဲ့ရပြီး ကိုဇင်ကိုကိုခန့် နှင့် ကိခန့်ဇော်ပိုင်ဦး (မျောက်ကြီး)တို့ကို ဆက်လက်ထိန်းသိမ်းထားပြီး ပြည်သူသုံးဦးကို ပြန်လည်လွှတ်ပေးခဲ့သည်ဟု ဖော်ပြထားသည်။
ပျဉ်းမနားမြို့ရှိ ဘုန်းကြီးကျောင်း၌ တိမ်းရှောင်နေသော နေပြည်တော် ကျောင်းသားများသမဂ္ဂစစ်ကြောင်း၏ ဦးဆောင်သူတစ်ဦးဖြစ်သည့် ရမည်းသင်းနည်းပညာတက္ကသိုလ် ဒုတိယနှစ်ကျောင်းသား ကိုကျော်ဘိုဘိုခန့် ကိုလည်း အကြမ်းဖက်စစ်အုပ်စုမှ ဇူလိုင် ၂၇ ရက်တွင် ရိုက်နှက်ဖမ်းဆီးသွားပြီး ဖမ်းဆီးခြင်းခံရချိန်တွင် ကိုကျော်ဘိုဘိုခန့်မှာ ကျန်းမာရေးမကောင်းကြောင်း အသိပေးထားသည်။