Sinopharm ဆေးကုမ္ပဏီအုပ်စုကြီးကထုတ်တဲ့ ကိုဗစ်ကာကွယ်ဆေး နှစ်မျိုးစလုံးကို Sinopharm လို့ အလွယ်ခေါ်ကြပေမယ့် WHO ရဲ့ ကိုဗစ်ကာကွယ်ဆေးအရေးပေါ်သုံးစွဲခွင့်စာရင်းထဲပါတဲ့ဆေးက Sinopharm BBIP-CorV ဖြစ်ပါတယ်။
BBIP-CorV က Sinopharm ဆေးကုမ္ပဏီအုပ်စုအောက်က Bejing Institute of Biological Product က ထုတ်တာဖြစ်ပါတယ်။
WHO ရဲ့ ကိုဗစ်ကာကွယ်ဆေးအရေးပေါ်သုံးစွဲခွင့်စာရင်းထဲ မပါသေးတဲ့ဆေးက Sinopharm WIBP-CorV ဖြစ်ပြီးတော့ Wuhan Institute of Biological Product က ထုတ်တာဖြစ်ပါတယ်။
စစ်ကောင်စီကျန်းမာရေးဝန်ကြီးဌာနကနေပြီးတော့ အခုထိုးပေးနေတာက Sinopharm BBIP-CorV ဖြစ်တယ်လို့ အဲဒီဝန်ကြီးဌာနရဲ့ ညွှန်ကြားရေးမှုးတစ်ဦးဖြစ်တဲ့ ဒေါက်တာခင်ခင်ကြီးက ပြောထားပါတယ်။
Public Service Announcement
“ ကျွန်တော်တို့ဆီမှာထိုးပေးတဲ့ ကာကွယ်ဆေးဘူးတွေမှာ Bejing Institute of Biological Product ဆိုတဲ့စာတန်းပါပါတယ်” လို့ ဆေးဘူးတွေကိုကြည့်ရှုခွင့်ရခဲ့တဲ့ရှမ်းပြည်နယ်မြောက်ပိုင်းက လူငယ်တစ်ဦးကပြောပါတယ်။
စစ်ကောင်စီက ပြည့်သူ့ဘဏ္ဍာနဲ့ Sinopharm BBIP-CorV အလုံးရေ ၂ သန်းဝယ်ထားတယ်လို့ ကြေညာထားပြီးတော့ တရုတ်နိုင်ငံထုတ် Sinovac အလုံးရေ ၁ သန်းလည်းဝယ်ထားကောင်းကြေညာထားပါတယ်။
ဘူးခွံမှာ Bejing Institute of Biological Product စာတန်းကိုကြည့်ပြီး Sinopharm BBIP-CorV ဟုတ်၊ မဟုတ် စစ်ကြည့်နိုင်မှာဖြစ်ပါတယ်။
“ စာရွက်မှာ Sinopharm လို့ပဲရေးပေးလိုက်တယ်။ ထိုးပြီးတဲ့အခါမှာ အခုထိတော့ ဖျားနာတာမရှိဘူး။ အခြားကောင်းတဲ့ဆေးတွေက ကိုယ့်နိုင်ငံဘယ်အချိန်ရောက်လာမယ်မသိဘူး။ ခုကတော့ ရတဲ့ဆေးထိုးပြီး ကိုယ်နဲ့ ကိုယ့်ပတ်ဝန်းကျင်ကိုကာကွယ်တာပါပဲ ” လို့ လွန်ခဲ့တဲ့ နှစ်ရက်က ကာကွယ်ဆေးထိုးခဲ့တဲ့ ရန်ကုန်မြို့ခံတစ်ဦးက ပြောပါတယ်။
Sinopharm BBIP-CorV ကို WHO က ၂၀၂၁ ခုနှစ် မေ ၇ ရက်ကမှ ကိုဗစ်ကာကွယ်ဆေးအရေးပေါ်သုံးစွဲခွင့်ပြုခဲ့တာပါ။
လက်ရှိမြန်မာနိုင်ငံမှာ Sinophram BBIP-CorV ကို အသက် ၆၅ နှစ်အရွယ်တွေကို ထိုးနှံပေးနေတာဖြစ်ပါတယ်။ ဒါပေမယ့် Sinophram BBIP-CorV က အသက် ၆၀ အထက်အရွယ်တွေ၊ ကိုယ်ဝန်ဆောင်တွေထိုးနှံရင် ဆေးရဲ့ဆိုးကျိုးနဲ့ ကာကွယ်နိုင်မှုတွေဘယ်လိုရှိတယ်ဆိုတာကို လုံလောက်တဲ့စမ်းသပ်မှုအချက်အလက်တွေမရှိသေးဘူးလို့ WHO က ပြောထားပါတယ်။
ဒါပေမယ့် အသက် ၆၀ အထက်တွေမထိုးရဘူးလို့တော့ယတိပြတ် ပြောမထားပါဘူး။ ဒီဆေးတွေကို အသက် ၆၀ အထက်တွေ ထိုးပေးမယ့်နိုင်ငံတွေအနေနဲ့ ထိုးနှံထားသူတွေရဲ့အခြေအနေကိုတော့ အနီးကပ်စောင့်ကြည့်ရမယ်လို့ WHO က ပြောထားပါတယ်။
“ စစ်ကောင်စီ စီစဉ်တာကြောင့်ရော၊ ဆေးထုတ်တဲ့နိုင်ငံကို အယုံကြည်မရှိတာရော နားလည်ပါတယ်။ ဒါပေမယ့် ဒီရောဂါကို ဘယ်လောက်ရာခိုင်နှုန်းပဲ ကာကွယ် ကာကွယ် စစ်ကောင်စီက ပြည်သူ့ငွေနဲ့ဝယ်ထားတဲ့ဆေးကို ထိုးပါ ” လို့ အတိုင်ပင်ခံသမားတော် အထူးကုဆရာဝန်ကြီး ဒေါက်တာသက်ကိုကိုက တိုက်တွန်းထားပါတယ်။
