မန္တလေးမြို့ပေါ်ရှိ မြေပြင်သပိတ်တိုက်ပွဲများ ပိုမိုအားကောင်းစေရန်နှင့် စစ်အာဏာရှင်စနစ်ဆန့်ကျင်တိုက်ဖျက်ရေး လုပ်ငန်းစဉ်များ အင်အားမြှင့်လုပ်ဆောင်နိုင်ရန်အတွက်ဟုဆိုကာ မန္တလေးရှိ နေ့စဉ်ချီတက် ဆန္ဒပြနေသည့် သပိတ်စစ်ကြောင်း ကိုးခု ပူးပေါင်း၍ မန္တလေးသပိတ်အင်အားစုအဖြစ် ဖွဲ့စည်းလိုက်ကြောင်း ယနေ့ ထုတ်ပြန် ကြေညာသည်။
အဆိုပါ သပိတ်စစ်ကြောင်း ကိုးခုမှာ ဆရာတော်များ ဦးဆောင်သည့် သံဃသမဂ္ဂသပိတ်စစ်ကြောင်း၊ မန္တလေး မဟာမိတ်တပ်ပေါင်းစု သပိတ်စစ်ကြောင်း၊ မြတောင် သပိတ်စစ်ကြောင်း၊ မန္တလာတက္ကသိုလ် ကျောင်းသားကျောင်းသူများ သပိတ်စစ်ကြောင်း၊ ချမ်းမြသာစည်လူထုသပိတ်စစ်ကြောင်း၊ မဟာအောင်မြေမြို့နယ် လူထုသပိတ်စစ်ကြောင်း၊ မန္တလေးလူငယ် သပိတ်စစ်ကြောင်း၊ အလက (၁၂) ထခွဲ အခြေခံပညာကျောင်းသားများသမဂ္ဂ (အကသ) သပိတ်စစ်ကြောင်းနှင့် LGBT သပိတ်စစ်ကြောင်းတို့ဖြစ်သည်။