အာဏာရှင်၏ လက်ပါးစေဘ၀မှ လွတ်မြောက်ခွင့်ရလိုပြီး ပြည်သူနှင့်အတူရတပ်တည်လိုသည့် အာဏာသိမ်းစစ်ကောင်စီ တပ်ဖွဲ့ဝင်များကို နွေးထွေးစွာကြိုဆိုသွားမည်ဖြစ်ပြီး လက်နက်အပြည့်အစုံဖြင့် လာရောက်ပါက ကျပ်သိန်း ၅၀ ပေးသွားမည်ဟု ချင်းဒေသကာကွယ်ရေးတပ်ဖွဲ့(CDF) တာဝန်ရှိသူကပြောသည်။
ထိုသို့လာရောက်ပူးပေါင်းရန် ဖိတ်ခေါ်ချက်ကို မင်းတပ်မြို့နယ် CDF ကလည်း ယနေ့ထုတ်ပြန်ခဲ့ရာ “ Full Equipment နဲ့ ရောက်လာတဲ့ ရဲဘော်တွေကို ဆုငွေ သိန်း ၅၀ ပေးမှာဖြစ်ပြီး ပြည်ပ / သွားလိုရာ အရပ်သို့ သွားနိုင်အောင် စီမံပေးနိုင်ပါတယ်” ဟု ဖော်ပြခဲ့သည်။
CDF ပြောရေးဆိုခွင့်ရှိသူကလည်း “ကျွန်တော်တို့ အစကတည်းက ကြိုဆိုပြီးသား။ ကျွန်တော်တို့ ပြည်သူတွေနဲ့ပူးပေါင်းပြီးတော့ အာဏာရှင်စနစ်ကို တိုက်ထုတ်ရမယ်ပေါ့။ ကျွန်တော်တို့ စစ်သားတွေကို မုန်းလို့လည်း မဟုတ်ဘူး မကြိုက်လို့လည်း မဟုတ်ဘူး။ ကျွန်တော်တို့ မကြိုက်တာက အာဏာရှင်စနစ်ကိုမကြိုက်လို့ အဲဒီအပေါ်မှာ ပြည်သူတွေနဲ့ ပူးပေါင်းပြီးတော့ ကျွန်တော်တို့ဘက်မှာလာရပ်တည်ပေးဖို့ပေါ့။ အမြဲတမ်းလည်း ကြိုဆိုမှာပါ” ဟု ပြောသည်။
ချင်းပြည်နယ်တွင် စစ်ကောင်စီတပ်မှ ပြည်သူနှင့်အတူ ပူးပေါင်းခဲ့သည့် တပ်ဖွဲ့ဝင် ၂၀ဦးနီးပါး ရှိပြီး အချို့သည် CDF ဖြင့်အတူ ပူးပေါင်းပါဝင်ပြီး အချို့သည် လုံခြုံရာနေရာများ၌ နေထိုင်နိုင်ရန် စီစဉ်ပေးထားကြောင်း ၎င်း ကဆိုသည်။
Public Service Announcement
လာရောက်ပူးပေါင်းလိုသူများအနေဖြင့် CDF ပြောရေး ဆိုခွင့်ရှိသူများ၏ တယ်လီဖုန်းနံပါတ်များ၊ သက်ဆိုင်ရာဒေသအလိုက် မြို့နယ်အလိုက် CDF တပ်များထံသို့ ဆက်သွယ်၍ ရကြောင်း CDF ပြောရေးဆိုခွင့်ရှိသူက ပြောပြသည်။
