မကွေးတိုင်းဒေသကြီး စလင်းမြို့အဝင်၌ ယနေ့မနက်ပိုင်းက ဗုံးပေါက်ကွဲ၍ စစ်ကောင်စီလက်အောက်ခံ ရဲတပ်ဖွဲ့ဝင် ၁ဦးသေဆုံးခဲ့ကြောင်း ဒေသခံက ပြော သည်။
စလင်း- မင်းဘူး ကားလမ်းတွင် ဩဂုတ် ၁၇ရက် နံနက် ၁၀နာရီခန့်၌ ဗုံးပေါက်ကွဲမှု ဖြစ်ပွားခဲ့ခြင်းဖြစ်သည်။
“စလင်းမြို့တောင်ဘက် ဂိတ်အထွက်မှာ ဗုံးပေါက်ကွဲတော့ ဂိတ်စောင့်နေတဲ့ ရဲ ၇ယောက်ရှိတာ ၃ယောက်ထိတယ်။ တစ်ယောက်က သေသွားပြီး နှစ်ယောက်ကဆေးကုနေရပြီ” ဟု ဒေသခံက ပြောသည်။
ဒဏ်ရာရသည့် ရဲတပ်ဖွဲ့ဝင် နှစ်ဦးလုံးလည်း အခြေအနေမကောင်းကြောင်း သိရသည်ဟု ၎င်း ကဆိုသည်။
“လတ်တလောက ဘယ်သူ့လက်ချက်မှန်းဆိုတာ သေချာပြောလို့မရသေးဘူး။”ဟု အဆိုပါဒေသခံက ပြောသည်။
ဗုံးပေါက်ကွဲမှုကြောင့် စစ်ဆေးရေးဂိတ်အဆောက်အဦ များလည်း ပျက်စီးခဲ့သည်။
စလင်းအပါအဝင် မကွေးတိုင်းဒေသကြီးရှိ မြို့နယ်များ၌ အာဏာသိမ်းစစ်ကောင်စီတပ်ကို ခုခံတော်လှန်ရန် ပြည်သူ့ကာကွယ်ရေးတပ်ဖွဲ့(PDF)များကို မြို့နယ်အလိုက် ဖွဲ့စည်းပြီးဖြစ်သည်။