စစ်အာဏာသိမ်းတဲ့နေ့ကစတင်ပြီး ဒီနေ့အထိ ကျဆုံးသူပြည်သူဦးရေ တစ်ထောင်ကျော်လာပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း ( AAPP ) က ကောက်ခံထားတဲ့အချက်အလက်တွေအရသိရပါတယ်။
ဖေဖော်ဝါရီလ ၁ ရက်ကစပြီး ဒီနေ့ သြဂုတ် ၁၈ ရက်နေ့အထိ ခြောက်လကျော်အတွင်း ကျဆုံးသူဟာ ၁၀၀၁ ဦး ရှိလာတာပါ။
“စစ်အာဏာသိမ်းပြီး ကတည်းက သူတို့သတ်လာတာ ဒီနေ့နဲ့ဆို ၁၀၀၁ ယောက်ဖြစ်ပြီ ၊ ဒီထက်ပိုနိုင်ပါသေးတယ်” လို့ AAPP ရဲ့တွဲဘက်အတွင်းရေးမှူး ကိုဘိုကြည်က သူရဲ့ဖေ့ဘွတ်ခ်မှာ ရေးသားထားပါတယ်။
မနေ့က သြဂုတ်လ ၁၇ ရက်အထိ AAPP ရဲ့ စာရင်းအရတော့ ကျဆုံးခဲ့သူဟာ ၉၉၉ ဦးထိ ရှိခဲ့တာတွေ့ရပါတယ်။
Public Service Announcement
နွေဦးတော်လှန်ရေးကာလအတွင်းကျဆုံးခဲ့တဲ့ ဒီအရေအတွက်အတွက်ဟာ AAPP က ကောက်ယူထားတဲ့ အရေအတွက်သာဖြစ်ပြီး အမှန်တကယ် ကျဆုံးသူဦးရေဟာ အဲဒီအရေအတွက်ထက် ပိုများနေနိုင်တယ်လို့ AAPP က ဆိုထားပါတယ်။
စစ်ကောင်စီဘက်ကတော့ AAPP အပါအဝင် နိုင်ငံတကာအဖွဲ့အစည်းတွေရဲ့စာရင်းဟာ ချဲ့ကားထားတာလို့ ငြင်းဆိုထားဖူးပါတယ်။
