ကရင်အမျိုးသားအစည်းအရုံး(KNU) ထိန်းချုပ်နယ်မြေအတွင်းရှိ အာဏာသိမ်းစစ်ကောင်စီ တပ်စခန်း အချို့ စွန့်ခွာမှုနှင့်ပတ်သက်ပြီး ညှိနှိုင်းထားခြင်းမရှိဟု KNU တာဝန်ရှိသူတစ်ဦးက ပြောကြားသည်။
ကရင်ပြည်နယ် ကြားအင်းဆိပ်ကြီးမြို့နယ် ကြိတ်ကျေးရွာ အခြေစိုက် စစ်ကောင်စီတပ်စခန်းမှ တပ်ဖွဲ့ဝင်များသည် ယနေ့ ဩဂုတ် ၂၁ရက် နံနက်အစောတွင် စခန်းကို စွန့်ခွာသွား ကြောင်း ကရင်သတင်းဌာန KICက ဖော်ပြသည်။ယခုရက်ပိုင်းအတွင်း အလားတူ တပ်စခန်းစွန့်ခွာမှုများ စစ်ကောင်စီက လုပ်ဆောင်နေကြောင်းလည်း ဖော်ပြထားသည်။
“ကျွန်တော်တို့ မညှိဘူး သူ့ဟာသူ ပြန်သွားတာပဲ။ ပြန်သွားတဲ့အကြောင်းအရင်းက စစ်ဆင်ရေးအရ သူတို့ စီစဉ်မှာပဲ”ဟု KNU တာဝန်ရှိသူက ပြောသည်။
စစ်ကောင်စီတပ်အနေဖြင့် ဧပြီလ ဝန်းကျင်ကလည်း KNU တပ်မဟာ(၅)နယ်မြေရှိ တပ်စခန်းအချို့ စွန့်ခွာခဲ့ဖူးသည်။ တပ်မဟာ(၅)က မတ်လ ၂၇ရက်နှင့် ဧပြီ ၂၇ရက်တွင် စစ်ကောင်စီ တပ်စခန်းနှစ်ခုကို တိုက်ခိုက်သိမ်းပိုက်ပြီးနောက် အင်အားနည်းတပ်စခန်းအချို့ စွန့်ခွာသွားခြင်းဖြစ်သည်။
Public Service Announcement
