မြန်မာ-တရုတ်နယ်စပ် ပန်ဆိုင်းဒေသ၌ တိုက်ပွဲအဆက် မပြတ်ဖြစ်ပွားလျက်ရှိကြောင်း ကိုးကန့်လက်နက်ကိုင်အဖွဲ့(MNDAA)က သတင်းထုတ်ပြန်သည်။
စစ်ကောင်စီတပ်များက အင်အားအလုံးအရင်းစုစည်း လှုပ်ရှားနေ၍ ပန်ဆိုင်းဒေသ၌ သုံးရက်ဆက်၍ တိုက်ပွဲဖြစ်ပွားခဲ့သည်ဟု ဆိုသည်။
ဩဂုတ် ၂၀ရက်က MNDAA တပ်မဟာ၅လက်အောက် ခံတပ်နှင့် စစ်ကောင်စီတို့ မီတန်တောင်ကြော၌ တိုက်ပွဲ ၂ကြိမ်ဖြစ်ခဲ့ကြောင်း၊ တိုက်ပွဲတွင် စစ်ကောင်စီတပ်က MNDAA တပ်ဖွဲ့တို့၏ ခံစစ်နေရာအား လက်နက်ကြီးအလုံး၃၀ခန့်ပစ်ခတ်ခဲ့ကြောင်း၊ မွန်းလွဲပိုင်း၌လည်း ပန်ဆိုင်း ရဲစခန်းတွင် အပြန်အလှန် ပစ်ခတ်မှုဖြစ်ပွားခဲ့ကြောင်း ထုတ်ပြန်ထားသည်။ ပန်ဆိုင်းရဲစခန်း ပစ်ခတ်မှုတွင် စစ်ကောင်စီတပ်သားအနည်းဆုံး၂ဦး ဒဏ်ရာအပြင်းအထန်ရရှိခဲ့သည်ဟုဆိုသည်။
ဩဂုတ် ၂၁ရက်တွင်လည်း မီတန်တောင်ကြော၌ တိုက်ပွဲဖြစ်ပွားမှု အပါအဝင် တိုက်ပွဲ ၃ကြိမ်ဖြစ်ခဲသည်ဟု ဆိုသည်။
Public Service Announcement
လက်ရှိတွင် စစ်ကောင်စီ လက်အောက်ခံ တပ်မ ၉၉ လက်အောက်ရှိ တပ်ရင်းများမှ အင်အား ၁၃ခန့်သည် မီတန်တောင်တန်းမျ စီကြူရွာရှေ့တန်း၌ အခြေချလှုပ်ရှားလျက်ရှိကြောင်း၊ ထို့ပြင် အင်အား ၁၆၀ ခန့်ရှိသည့် စစ်ကောင်စီတပ်သည် နမ့်ပါတီ ၊နမ့်ဟူး၊ခါလင်ဒေသတဝိုက်တွင်အခြေစိုက်လှုပ်ရှားလျက်ရှိကြောင်း MNDAAက ထုတ်ပြန်ခဲ့သည်။
ကိုးကန့်လက်နက်ကိုင်အဖွဲ့နှင့် စစ်ကောင်စီတပ်တို့သည် ဇူလိုင်လမှစ၍ မုံးကိုးဒေသ၌ တိုက်ပွဲများ ပြင်းထန်စွာဖြစ်ပွားခဲ့ပြီး ယခုလတွင် ပန်ဆိုင်းဒေသ၌ မကြာခဏ တိုက်ပွဲဖြစ်ပွားလျက်ရှိသည်။
