ကချင်ပြည်နယ် ၀ိုင်းမော်မြို့နယ်ရှိ စစ်ကောင်စီ၏ ခလရ(၅၈)တပ်တွင် ယနေ့ (ဩဂုတ်၂၈ရက်)နေ့လည် ၁နာရီဝန်းကျင်က ပစ်ခတ်မှုများဖြစ်ပွားခဲ့ကြောင်း ကချင်ဒေသခံတစ်ဦးက ပြောသည်။
“ဒီနေ့အသံတော်တော်ကြားရတယ်။ ပစ်တာက တစ်ဖက်တည်းပါပဲ။ ဘာကြောင့်ပစ်တယ်ဆိုတာတော့ မသိရသေးဘူး။ သေနတ်သံတွေက တစ်ဖက်အသံပဲ။ သူတို့က လက်နက်အကုန်ခံပြီးမှ ပစ်နေတာပဲ”ဟု ၎င်းက ပြော သည်။
အဆိုပါ ၀ိုင်းမော် ခလရ(၅၈)တပ်ကို ကချင်လက်နက် ကိုင်အဖွဲ့(KIA)က ဇူလိုင် ၂၉ရက်တွင် လာရောက်တိုက်ခိုက်ခဲ့ပြီးနောက် ဩဂုတ်လဆန်းမှစ၍ အဆိုပါ တပ်စခန်းမှ တစ်ဖက်သတ်ပစ်ခတ်မှုများ မကြာခဏ လုပ်ဆောင်ခဲ့သည်ဟု ဒေသခံက ပြောသည်။
KIA သတင်းနှင့် ပြန်ကြားရေးဌာန တာဝန်ခံဗိုလ်မှူးကြီးနော်ဘူကလည်း ဇူလိုင် ၂၉ရက် တိုက်ခိုက်မှုကို KIAက လုပ်ဆောင်ခဲ့ခြင်းဖြစ်သော်လည်း နောက်ပိုင်း ပစ်ခတ်မှုများတွင် KIA မပါဝင်ကြောင်း စစ်ကောင်စီတပ်က တစ်ဖက်သတ်တိုက်ပွဲဖော်ခြင်းဖြစ်ကြောင်း ပြောဆိုထားသည်။
စစ်ကောင်စီအနေဖြင့် အဆိုပါ ခလရ (၅၈)တပ် အနီးဝန်းကျင်ရှိ ကျေးရွာများမှဒေသခံများကိုလည်း နေရာရွှေ့ပြောင်းခိုင်းထား၍ ဒေသခံများနီးစပ်ရာသို့ သွားရောက်နေထိုင်နေကြရသည်။