💉ကာကွယ်ဆေးထိုးနှံမယ့်အခြေအနေက ဘယ်လိုရှိပါသလဲ

တရုတ်နဲ့ အိန္ဒိယနိုင်ငံတွေက လှူထားတာအပါအဝင် ပြည်သူ့ဘဏ္ဍာ နဲ့ ဝယ်ယူထားတဲ့ ကိုဗစ်ကာကွယ်ဆေးအလုံးရေ စုစုပေါင်း ၁၀ သန်းကျော်ပြည်တွင်းမှာ ရောက်ရှိထိုးနှံနေတာဖြစ်ပါတယ်။

လက်ရှိထိုးနှံပေးနေတဲ့ကာကွယ်ဆေးတွေက စစ်ကာင်စီရဲ့ ဆေးတွေမဟုတ်ကြောင်း၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်လက်ထက်က ရှာဖွေစုဆောင်းစီစဥ်ထားတဲ့အတိုင်း ဒီအချိန်မှာထိုးရမှာဖြစ်လို့ ထိုးနှံနေတာဖြစ်တယ်လို့ NUG ကျန်းမာရေးဝန်ကြီး ဒေါက်တာဇော်ဝေစိုးက ပြောပါတယ်။

ရွေးကောက်ခံ အစိုးရလက်ထက်က အိန္ဒိနိုင်ငံရဲ့ လှူဒါန်းမှုနဲ့ မြန်မာနိုင်ငံကို ကိုဗစ်ကာကွယ်ဆေး Covishield အလုံးရေ ၁.၅ သန်း ဇန်နဝါရီ ၂၂ ရက်က ရောက်လာခဲ့တာဖြစ်ပြီး အများပြည်သူကို စနစ်တကျအဆင့်ဆင့် ထိုးနှံဖို့ပြင်ဆင်ချိန်မှာပဲ စစ်တပ်က အာဏာသိမ်းသွားခဲ့တာပါ။

အဲဒီနောက်ပိုင်း စစ်ကောင်စီက ပြည်သူ့ဘဏ္ဍာနဲ့ တရုတ်က ကာကွယ်ဆေးနှစ်မျိုးဖြစ်တဲ့ Sinopharm နဲ့ Sinovac တွေကိုဝယ်ယူခဲ့ပါတယ်။

Public Service Announcement

အခုလိုလူအမြောက်အများသေဆုံးခဲ့တဲ့ ကိုဗစ်တတိယလှိုင်းမှာ စစ်ကောင်စီကျန်းမာရေးဝန်ကြီးဌာနက ထိုးပေးနေတဲ့ ကာကွယ်ဆေးစုရပ်တွေမှာ သွားထိုးသူတွေရှိသလို ပုဂ္ဂလိကအဖွဲ့အစည်းတွေ၊ ဆေးရုံတွေအစဥ်နဲ့ အခပေးထိုးနဲ့ရတဲ့နေရာတွေမှာလည်း Sinopharm ကို သွားရာက်ထိုးနှံနေကြတာရှိပါတယ်။

လက်ရှိမြန်မာနိုင်ငံမှာ လူဦးရေ ၅၄ သန်းကျော်ရှိပြီး ကာကွယ်ဆေးနှစ်ကြိမ်ပြည့်ထိုးနှ့ပြီးသူက ၁.၈ သန်းကျော်ရှိပြီလို့ စစ်ကောင်စီကျန်းမာရေးဝန်ကြီးဌာနက ထုတ်ပြန်ပါတယ်။

စုစုပေါင်းလှူထားတာရော ဝယ်ထားတာရော ကာကွယ်ဆေးစုစုပေါင်းအလုံးရေက ၁၀.၂ သန်းကျော်ရှိပြီဖြစ်တယ်လို့ဆိုပါတယ်။

NUG အနေနဲ့လည်း ဖေဖော်ဝါရီ တတိယပတ်ကတည်းက ကာကွယ်ဆေးရရှိရေးဆောင်ရွက်နေတာရှိပြီး Pfizer အလုံးရေ ၄ သန်းကျော်နဲ့ Sinovac အလုံးရေ နှစ်သန်းကျော်ရရှိဖို့ ရှိသလို ဒီချုပ်ပါတီအစိုးရလက်ထက်က ဝယ်ထားတဲ့ အိန္ဒိယနိုင်ငံက ကာကွယ်ဆေး အလုံးရေ ၁၅ သန်းကျော်လည်းရဖို့ ရှိတယ်လို့ ဝန်ကြီးဒေါက်တာဇော်ဝေစိုးက ပြီးခဲ့ရက်တစ်ပတ်က ပြုလုပ်တဲ့ NUG သတင်းစာရှင်းလင်းပွဲမှာ ပြောကြားထားပါတယ်။