နွေဦးတော်လှန်ရေးကာလအတွင်း ကျဆုံးခဲ့သည့် ပြည်သူပေါင်း ၁,၀၆၂ဦးအထိရှိလာ

ရန်ကုန်တိုင်း သန်လျင်မြို့နယ်၊ စစ်ကိုင်းတိုင်း ဝက်လက်မြို့နယ် နှင့် မုံရွာမြို့နယ်တို့မှ အပြစ်မဲ့ပြည်သူလေးဦး ထပ်မံကျဆုံးခဲ့၍ စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယမန်နေ့အထိ ၁,၀၆၂ ဦး ရှိပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)က ထုတ်ပြန်သည်။

အဆိုပါအရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး ထိုအရေအတွက်ထက် ပိုများ နိုင်ကြောင်း အေအေပီပီက ဆိုသည်။

ဖေဖော်ဝါရီ ၁ ရက်မှ ယနေ့ (စက်တင်ဘာလ ၁၀ ရက်)အထိ ဖမ်းဆီးချုပ်နှောင်ခြင်းခံထားရသူ စုစုပေါင်း ၆,၃၆၄ ဦးရှိပြီး ၎င်းတို့အနက်မှ၂၇၂ ဦး မှာ ထောင်ဒဏ်ချမှတ်ခြင်းခံထားရသည်။ ထိုပြစ်ဒဏ်ကျခံရသူထဲမှ အသက် ၁၈ နှစ်အောက် ကလေးနှစ်ဦး အပါအဝင် ၂၆ဦးမှာ သေဒဏ်ချမှတ်ခံထားရသည်။ ထို့အပြင် ဖမ်းဝရမ်း ထုတ်ခြင်းခံထားရသောကြောင့် တိမ်းရှောင်နေသူ ၁,၉၈၄ ဦး၏ အမည်စာရင်းကိုလည်း သီးခြား ဖော်ပြထားပြီး ၎င်းတို့အနက်မှ မျက်ကွယ် သေဒဏ်ချမှတ်ခြင်းခံထားရသူ ၃၉ဦး အပါအဝင် ၁၁၈ဦးမှာ မျက်ကွယ် ပြစ်ဒဏ်ချမှတ်ခြင်းခံထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း ၆၅ ဦးရှိပြီဖြစ်သည်။

ရန်ကုန်တိုင်း သန်လျင်မြို့နယ်တွင် စက်တင်ဘာ ၈ ရက် ညအချိန်က စစ်သားများမှ ဖမ်းဆီးခေါ် ဆောင်သွား ခဲ့သည့် အသက် ၁၉ နှစ်အရွယ် ကိုသက်ကိုကိုအောင်သည် စက်တင်ဘာ၉ ရက် နံနက်ပိုင်းတွင် ကျဆုံးသွားခဲ့ ကြောင်း သိရှိရသည်။ ကိုသက်ကိုကိုအောင်ကို ရပ်ကွက်ရုံး၌ ထိန်းသိမ်းထားကာ တစ်ညလုံး ရိုက်နှက်ပြီး ညှဉ်းပန်းနှိပ်စက်ခဲ့သောကြောင့် ကျဆုံးသွားခဲ့ရခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

Public Service Announcement

စစ်ကိုင်းတိုင်း ဝက်လက်မြို့နယ်တွင် စက်တင်ဘာ ၉ ရက် နေ့လယ်ပိုင်း၌ သမံသာကျေးရွာမှ ညီအစ်ကို နှစ်ဦးဖြစ်သည့် အသက် ၂၅ နှစ်အရွယ် ကိုယဉ်မိုးလွင် (ခေါ်) ဘဒင် နှင့် အသက် ၁၇ နှစ်အရွယ် မောင်သက်ပိုင်စိုးတို့ကို စစ်သားများမှ ဖမ်းဆီးနှိပ်စက်ခဲ့ပြီးနောက် သေနတ်ဖြင့် ပစ်သတ်သွားခဲ့ကြောင်း ထပ်မံဖော်ပြထားသည်။

စစ်ကိုင်းတိုင်း မုံရွာမြို့နယ်အတွင်းရှိ မုံရွေးကျေးရွာကို အကြမ်းဖက်စစ်တပ်မှ စက်တင်ဘာလ ၈ ရက်နေ့ ညအချိန်က ဝင်ရောက်စီးနင်း၍ ပစ်ခတ်ခဲ့သောကြောင့် မုံရွေးကျေးရွာသား ဦးမြင့်ဌေးသည် ဆီးခုံကို ကျည်ထိမှန်ခဲ့ပြီး စက်တင်ဘာလ ၉ ရက်နေ့ နံနက်ပိုင်းတွင် ကျဆုံးသွားခဲ့ကြောင်း ပါရှိသည်။