သံအမတ်ကြီးဦးကျော်မိုးထွန်းနဲ့ NUG ကို ကုလသမဂ္ဂအသိအမှတ်ပြုလက်ခံဖို့ ပြည်ပရောက်မြန်မာတွေ တောင်းဆို

ကုလသမဂ္ဂက မြန်မာသံအမတ်ကြီးဦးကျော်မိုးထွန်းကို ဆက်လက်ခန့်ထားဖို့နဲ့ အမျိုးသားညီညွတ်ရေးအစိုးရ(NUG)ကို အသိအမှတ်ပြုဖို့ ပြည်ပရောက်မြန်မာတွေက အွန်လိုင်းကနေ ဒီနေ့စုဝေး တောင်းဆိုခဲ့ကြပါတယ်။

‘ကမ္ဘာလုံးဆိုင်ရာ သံတမန်ရေးရာတိုက်ပွဲ အတွက် အွန်လိုင်းသပိတ်’ကို ကမ္ဘာ့နေရာအနှံ့အပြားက မြန်မာတွေသာမက မြန်မာ့ဒီမိုကရေစီအရေးကို အားပေးထောက်ခံတဲ့ နိုင်ငံတကာက လွှတ်တော်အမတ်တွေ၊ တတ်ကြွလှုပ်ရှားတွေလည်း တက်ရောက်ပြီး စစ်အာဏာရှင်စနစ်ကို လက် မခံဘဲ ပြည်သူရွေးချယ်တင်မြှောက်တဲ့ ကိုယ်စားလှယ်အများစုနဲ့ စုဖွဲ့ထားတဲ့ NUG ကို အသိအ မှတ်ပြုလက်ခံကြဖို့ နိုင်ငံတကာနဲ့ ကုလသမဂ္ဂကို တောင်းဆိုခဲ့ကြတာပါ။

မကြာခင်ကျင်းပမယ့် ကုလသမဂ္ဂအထွေထွေညီလာခံမှာ NUG ကို အသိအမှတ်ပြုရေး၊ သံအမတ်ကြီးဦးကျော်မိုးထွန်းကို ဆက်လက်ခန့်ထားရေးဟာ မြန်မာပြည်သူတွေအတွက် အရေးကြီး ပေးမယ့် ကုလသမဂ္ဂအတွက် ပိုမိုအရေးကြီးပြီး ကုလသမဂ္ဂရဲ့တန်ဖိုးကိုပြသရမယ်လို့ NUG ရဲ့ ဩစတြေးလျနိုင်ငံဆိုင်ရာ ကိုယ်စားလှယ် ဒေါက်တာထွန်းအောင်ရွှေက ပြောပါတယ်။

ကုလသမဂ္ဂမှ ထွက်ပေါ်လာတဲ့ရလဒ်ဟာ မြန်မာ့နွေဦးတော်လှန်ရေးရဲ့ အဆုံးအဖြတ်မဟုတ်ဘဲ မြန်မာပြည်သူလူထုကသာ အဓိကအရေးပါအခရာဖြစ်ကြောင်း ဒေါက်တာထွန်းအောင်ရွှေက ဆိုပါတယ်။

Public Service Announcement

သံတမန်ရေးရာ အွန်လိုင်းသပိတ်မှာ တိုင်းရင်းသားလူမျိုးစုတွေအပေါ် လျစ်လျူရှုပျက်ကွက်မှု တွေအတွက် ဦးစွာတောင်းပန်ခဲ့ပြီး နွေဦးတော်လှန်ရေးနဲ့ပတ်သက်တဲ့ သီချင်းတွေ၊ ကဗျာတွေကို သီဆိုပြသခဲ့ကြပါတယ်။

နောက်ပြီး အွန်လိုင်းကနေ တစ်မိနစ်ခန့် သံပုံးတီးခဲ့ကြပြီး ‘မင်းအောင်လှိုင်နဲ့ နောက်လိုက်များ နောက်ဆုံးနေ့အတွက် ပြင်ဆင်ထား’၊ ‘နွေဦးတိုက်ပွဲ ဒို့တိုက်ပွဲ အောင်ကိုအောင်ရမည်’၊ ‘အရေးတော်ပုံ အောင်ရမည်’ စတဲ့ကြွေးကြော်သံတွေကိုလည်း ဟစ်ကြွေးခဲ့ကြပါတယ်။

မြန်မာပြည်သူတွေဟာ အရေးတော်ပုံမအောင်မချင်း လက်လျှော့မှာမဟုတ်ဘဲ ဆက်လက်ချီတက်နေမှာဖြစ်ပြီး လူကြီး၊လူငယ်အားလုံး အရေးတော်ပုံမှာ ပါဝင်ဆင်နွှဲကြဖို့လည်း လူငယ်တွေက တိုက်တွန်းခဲ့ကြပါတယ်။