ကန်ပက်လက်မြို့နယ် ချင်းပြည်ကာကွယ်ရေးတပ်ဖွဲ့ (CDF)နှင့် စစ်ကောင်စီတပ်တို့ နှစ်ရက်ဆက် တိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့ဝင် ၁၄ဦးထက်မနည်း သေဆုံးခဲ့ကြောင်း CDFက သတင်းထုတ်ပြန်သည်။
စက်တင်ဘာ ၁၄ရက်က ကန်ပက်လက်နှင့် ဆောမြို့အကြား တိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့ဝင် ၁၀ဦးထက်မနည်းသေဆုံးပြီး ယနေ့ (စက်တင်ဘာ ၁၅ရက်) တွင် ကန်ပက်လက်မြို့ အရှေ့ဘက် ၆မိုင်တွင် တိုက်ပွဲ ဆက်လက်ပြင်းထန်ခဲ့သည်ဟု ဆိုသည်။ ယနေ့ တိုက်ပွဲတွင် စစ်ကောင်စီဘက်မှ လေးဦးသေဆုံးပြီး ဒဏ်ရာရသူများပြားခဲ့ဟု ထုတ်ပြန်သည်။ နှစ်ရက်တာ တိုက်ပွဲအတွင်း CDF ရဲဘော်များ ထိခိုက်မှုမရှိခဲ့ဟုလည်း ဖော်ပြထားသည်။
တိုက်ပွဲတွင် အထိနာခဲ့သည့် စစ်ကောင်စီတပ်သည် ယနေ့ မွန်းလွဲပိုင်းတွင် ကန်ပက်လက်မြို့တွင်းသို့ပြန်လာပြီးလက်နက်ကြီးလက်နက်ငယ်များဖြင့်မြို့တွင်းသို့ရမ်းသမ်းပစ်ခတ်ခဲ့၍ မြို့တွင်းရှိ အဆောက်အဦးအချို့ ထိခိုက်ပျက်စီးခဲ့သည်ဟု ဆိုသည်။
တိုက်ပွဲများဆက်လက်ဖြစ်ပွားနိုင်၍ မြို့တွင်းရှိမိဘပြည်သူများအနေဖြင့်ပြင်ဆင်စရာများ ကြိုတင်ပြင်ဆင်ကြ ရန် ကန်ပက်လက် CDFက အသိပေးထားသည်။
Public Service Announcement
