အာဏာသိမ်းစစ်ကောင်စီတပ်မှ အရာရှိတစ်ဦး၏ သမီးဖြစ်သလို ၊ စစ်တပ်ကို အမာခံထောက်ခံသူဖြစ်သောလမင်းစန္ဒာအမည်ရှိ အမျိုးသမီးမှာ စနေညက နိုက်ကလပ်မှ ကားဖြင့်ပြန်လာစဥ် စစ်ကောင်စီတပ်ဖွဲ့ဝင်များက ကားကိုရပ်ခိုင်းရာ မရပ်ပေးသဖြင့် သေနတ်ဖြင့်ပစ်ရာ နေရာတွင်ပွဲချင်းပြီးသေဆုံးသွားခြင်းဖြစ်ကြောင်း စစ်တပ်အသိုင်းအဝိုင်းနှင့် နီးစပ်သူအချို့က ပြောသည်။
သူမသည် အာဏာသိမ်းစစ်ကောင်စီက ဝါဒဖြန့်ရန်ဖွင့်ထားသော ရန်ကင်းကိုဗစ်ကုသရေးစင်တာတွင် စေတနာ့ဝန်ထမ်းအဖြစ် သြဂုတ်၁၃ ရက်မှစ၍ လုပ်ကိုင်နေသူဖြစ်သည်။ထို့ကြောင့် သူမသေပြီးနောက် စက်တင်ဘာ ၂၀ မှစ၍ အလုပ်တာဝန်များမှရပ်စဲလိုက်ကြောင်း ၊ လမင်းစန္ဒာအနေဖြင့် သွားလိုရာသို့ လွတ်လပ်စွာ သွားလာနိုင်ပြီဖြစ်ကြောင်းရန်ကင်းကိုဗစ်စင်တာမှ ဦးမောင်မောင်ချို ၏လက်မှတ်ဖြင့် စက်တင်ဘာ ၂၀ ရက်ကပြုလုပ်သော သူမ၏ နာရေးတွင် အမိန့်ပြန်တမ်း ထုတ်ခဲ့သည်ကို တွေ့ရသည်။
အာဏာသိမ်းစစ်ကောင်စီ၏သားသမီးများ ၊ငွေကြေးတက်နိုင်သောစစ်တပ်ကိုထောက်ခံသူများ၊ ငွေကြေးကြွယ်ဝသော လူ့မလိုင်များ အတွက် ရန်ကုန်တွင် ကလပ်အချို့ကို ညမထွက်ရအမိန့်ထုတ်ပြန်ထားချိန်မှာပင်ဆက်လက်ဖွင့်ထားနေဆဲဖြစ်သည်။ ညမထွက်ရအမိန့်နှင့် ညပိုင်းတွင် အကြမ်းဖက်စစ်တပ်၏ ဖမ်းဆီးနှိပ်ကွပ်မှုများကြောင့် သာမာန်ပြည်သူအများစု အရေးပေါ်အခြေအနေမဟုတ်လျှင် အိမ်အပြင်မထွက်သောအခြေအနေတွင်ပင် လမင်းစန္ဒာကဲ့သို့စစ်တပ် အနွှယ်ဝင်များ၊ထောက်ခံသူများ ၊ငွေကြေးချမ်းသာကြွယ်ဝသောခံယူချက်မရှိသည့် လူ့မလိုင်များ ထိုကလပ်များသို့အဓိက သွားရောက်လေ့ရှိကြောင်း ကလပ်စီးပွားရေးအကြောင်း သိသူတစ်ဦးကပြောသည်။
“မရပ်ပေးလို့ဖြစ်တာ အပြစ်ပြောလို့မရဘူး။ ပြစ်တဲ့ရဲဘော်မှာ အပြစ်မရှိဘူး”ဟု အကြမ်းဖက်စစ်တပ်ထောက်ခံသူအချို့က ဖေ့စ်ဘွတ်ခ်တွင်ရေးသားကြသည်။
သို့သော် လမင်းစန္ဒာ၏ ချစ်သူ စစ်ကောင်စီတပ်မှ ဗိုလ်ကြီးဟု ဆိုသူ အောင်မျိုးအမည်ဖြင့် ဖေစ်ဘွခ်အသုံးပြုသူက “မင်းတို့တပ်မတော်ကြီးကလည်းကွာ ပြစ်စရာလူအဲလောက်ရှားရလားကွာ” ဟုရေးသားထာသည်ကိုလည်းတွေ့ရသည်။
အကြမ်းဖက်စစ်ကောင်စီတပ်ဖွဲ့ဝင်များက ရန်ကုန်အပါအဝင် နိုင်ငံတစ်ဝန်း ပြည်သူများကို အကြောင်းပြချက်မျိုးစုံဖြင့် စိတ်မထင်ရင် မထင်သလို သေနတ်ဖြင့် ပစ်ခတ်သတ်ဖြတ်နေမှု မှာ စစ်ကောင်စီတပ်အတွက်မထူးဆန်းဘဲ ပုံမှန်ဖြစ်နေကြောင်း ဗိုလ်မှူးသမီးကိုယ်တိုင် သေနတ်ဖြင့် ပစ်အသတ်ခံရမှုကသာဓကတစ်ခုဖြစ် သည်။ စစ်ကောင်စီတပ်ဖွဲ့ဝင်များက ရမ်းကားပစ်ခတ်သတ်ဖြတ်၍ စစ်တပ်အသိုင်းအဝိုင်းမှ လူကိုယ်တိုင်သေဆုံးမှူမှာ လမင်းစန္ဒာသည်ပထမဆုံးမဟုတ်ဘဲ မန္တလေးမြို့တွင် မကြာသေးမီကလည်း စစ်ကောင်စီတပ်အရာရှိ တစ်ဦး၏ သားဖြစ်သူ ညအချိန်တွင်သေနတ်ဖြင့်ပစ်သတ်ခံခဲ့ရသေးကြောင်းဒေသခံအချို့က ပြောသည်။