နွေဦးထီရဲ့ ကံထူးရှင်ရွေးပွဲ အောက်တိုဘာ ၁ ရက်မှာ ကျင်းပမယ်

အမျိုးသားညီညွတ်ရေးအစိုးရ (NUG) ရဲ့ ‘အောင်လံလွှင့်ချီ နွေဦးထီ’ Pilot project ကံထူးရှင်ရွေးချယ်ပွဲကို အောက်တိုဘာ ၁ ရက် မနက် ၉ နာရီမှာ ကျင်းပပြုလုပ်မယ်လို့ နွေဦးထီမိသားစုက ဒီနေ့ ထုတ်ပြန်ကြေညာပါတယ်။

စီမံကိန်း၊ ဘဏ္ဍာရေး နှင့်ရင်းနှီးမြှုပ်နှံမှု ပြည်ထောင်စုဝန်ကြီး ဦးတင်ထွန်းနိုင်က Computerized random selection (ကွန်ပျူတာဖြင့်ကျဘမ်းရွေးချယ်ခြင်း)နဲ့ ကံထူးရှင်နံပါတ်တွေကိုရွေးချယ် ပေးသွားမယ်လို့ နွေဦးထီပရိတ်သတ်တွေကို အသိပေးထားပါတယ်။

အောင်လံလွှင့်ချီနွေဦးထီ Pilot project မှာ အားတက် သရောပူးပေါင်းပါဝင်ခဲ့ကြတဲ့ မိဘပြည်သူတစ်ဦးတစ်ယောက်ခြင်းစီတိုင်းကို အထူးပင်လေးစား ကျေးဇူးတင်ရှိရင်း မိဘပြည်သူများ နွေဦးထီ ကံထူးရှင်ဖြစ်ကြပါစေကြောင်း နွေဦးထီမိသားစုက ဆုတောင်းပေးထားပါတယ်။

နွေဦးထီရဲ့ ရောင်းချရငွေစုစုပေါင်းရဲ့ ၇၀ ရာခိုင်နှုန်းကို အကြမ်းဖက်စစ်ကောင်စီကို အာဏာဖီ ဆန်ကြတဲ့ နိုင်ငံ့ဝန်ထမ်း CDMer တွေ အတွက် သုံးစွဲသွားမှာဖြစ်ပြီး ၃၀ ရာခိုင်နှုန်းကို ဆုကြေးငွေအဖြစ် သတ်မှတ်ထားပါတယ်။

Public Service Announcement

‘အောင်လံလွှင့်ချီနွေဦးထီ’ ရဲ့ အမြင့်ဆုံးဆုကြေးငွေဟာ ၁၅ သိန်းဖြစ်ပေမယ့် စစ်အာဏာသိမ်းကို ဆန့်ကျင်တဲ့ ပြည်သူလူထုအကြား စိတ်ဝင်စားမှုမြင့်တက်ခဲ့ကာ အားပေးဝယ်ယူမှုလည်း များပြားခဲ့ပါတယ်။