စစ်ကိုင်းတိုင်း ကသာခရိုင် ဗန်းမောက်မြို့နယ် နမ်းလိမ်ကာကျေးရွာရှိ ကျောက်ရွှေလုပ်ကွက်တစ်ခုတွင် မြေပြိုမှုဖြစ်၍ လူလေးဦးထက်မနည်းသေဆုံးကြောင်း ဒေသခံ အချို့က ပြောသည်။
ထိုဖြစ်စဥ်မှာ ယနေ့(အောက်တိုဘာ ၁၄ရက်)နံနက်အစောပိုင်းက ဖြစ်ပွားခဲ့ပြီး နေ့လည်ပိုင်းရောက်မှသာ ရဲတပ်ဖွဲ့က လာရောက်စစ်ဆေးခဲ့ကြောင်း သိရသည်။
“မနက် အစောကြီးကတည်းက ပြိုတာ။အနည်းဆုံး အမျိုးသားလေးယောက်ပါသွားတယ်ပဲ သိရတယ်။ရဲတွေရောက်လာတော့ ကျွန်တော်တို့လဲ မနေတော့ဘူး”ဟု နမ်းလိမ်ကာကျေးရွာသားတစ်ဦးက ပြောသည်။
မြေပြိုကျခဲ့သော ကျောက်ရွှေလုပ်ကွက်နေရာမှာ ဒေသခံများ၏ လက်လုပ်လက်စား လုပ်ကွက်ဖြစ်ပြီး လုပ်ကွက်တစ်ခုလျှင်အနည်းဆုံး ၁၀ဦးခန့် လုပ်ကိုင်လေ့ရှိကြောင်း ဗန်းမောက်ဒေသခံကိုဇော်က ရှင်းပြသည်။
ကျောက်ထဲ၌ ရွှေပါဝင်သော ကျောက်ရွှေ လုပ်ကွက်များတူးဖော်ခွင့်အတွက် ဒေသခံများနှင့် အစိုးရအဆက်ဆက်ချပေးခဲ့သည့် သတ္တုတူးဖော်ခွင့်ရ ကုမ္ပဏီများအကြား အငြင်းပွားမှုရှိခဲ့သည်။ ယင်းမှတစ်ဆင့် ဒေသခံများက ကိုယ်ပိုင် လက်ယက်၊စက်ယက်တွင်းများတူးကာ တစ်နိုင်တစ်ပိုင် ရှာနေကြသည်။