ချင်းပြည်နယ် မတူပီမြို့နယ်တွင် စစ်ကောင်စီတပ်က လက်နက်ကြီးဖြင့် ပစ်ခတ်ခြင်းနှင့် မိုင်းထောင်ခြင်းတို့ကြောင့် အသက်(၆)နှစ်အရွယ်ကလေးငယ်တစ်ဦးအပါ အဝင် နှစ်ဦးသေဆုံးခဲ့ရကြောင်း ချင်းပြည်ကာကွယ်ရေးတပ်ဖွဲ့ (CDF) က သတင်းထုတ်ပြန်သည်။
အောက်တိုဘာ ၁၆ရက် မွန်းလွဲ ၂နာရီခန့်က အကြမ်းဖက် စစ်ကောင်စီဘက်မှ လက်နက်ကြီးများရမ်းသမ်း ပစ်ခတ်မှုကြောင့် အသက်(၆) နှစ်အရွယ် ကလေးငယ်တစ်ဦးသေဆုံးခဲ့ရပြီး သက်ကြီးပိုင်းပြည်သူတစ်ဦး သေဆုံးရခြင်းမှာ စစ်ကောင်စီတပ်ထောင်ထားသည့် မြေမြှုပ်မိုင်းနင်းမိ၍ဖြစ်သည်ဟု ဖော်ပြထားသည်။
ထို့အပြင် မတူပီ – မင်းတပ်လမ်းတွင်လည်းလက်နက် ကြီးကျ၍ ပြည်သူတစ်ဦး ပြင်းထန်စွာဒဏ်ရာ ရရှိခဲ့သည်ဟုဆိုသည်။
ပြည်သူများ၏ အသက်ပေးဆုံးရှုံးနစ်နာမှုများအတွက် အထူးဝမ်းနည်းကြေကွဲကြောင်း မတူပီ CDFက ထုတ်ပြန် သည်။
Public Service Announcement
ယခုတစ်ပတ်အတွင်း မတူပီမြို့နယ်တွင် အကြမ်းဖက် စစ်ကောင်စီဘက်မှ လက်နက်ကြီး၊ငယ်များဖြင့် ရမ်းသမ်းပစ်ခတ်ခြင်းများနှင့် မတူပီ-မင်းတပ်လမ်းကြောင်းတစ်လျှောက် နယ်မြေရှင်းလင်းရေးများအား တောက် လျှောက်လုပ်ဆောင်လာ၍ ဒေသခံပြည်သူများအနေဖြင့် စိုးရိမ် ထိတ်လန့်နေကြကြောင်း ဖော်ပြထားသည်။
မတူပီ CDF အနေဖြင့်လည်း စစ်ကောင်စီတပ်ကို ခုခံတိုက်ခိုက်မှုများ လုပ်ဆောင်လျက်ရှိရာ အောက်တိုဘာ ၁၅ရက်က စစ်ကောင်စီတပ်နှင့် ထိပ်တိုက်တွေ့ဆုံပစ်ခတ်မှု ဖြစ်ပွားခဲ့ရာ စစ်ကောင်စီတပ်မှ နှစ်ဦးသေဆုံးခဲ့သည်ဟု ဆိုသည်။
