ကချင်လက်နက်ကိုင်အဖွဲ့(KIA) တပ်မဟာ(၆) တပ်ရင်း (၉)နယ်မြေ ကွတ်ခိုင်မြို့နယ်တွင် ယနေ့(အောက်တိုဘာ ၁၈) နံနက်က တိုက်ပွဲဖြစ်ပွားခဲ့ကြောင်း KIA သတင်းနှင့် ပြန်ကြားရေးဌာန Kachinnet Burmese က သတင်းဖော်ပြသည်။
အောက်တိုဘာ ၁၈ရက် နံနက် ၉နာရီခွဲခန့်တွင် ဒေသတွင်းသို့ စစ်ရေးလှုပ်ရှားလာသည့် အာဏာသိမ်းတပ်ဖွဲ့ကို KIAက ခုခံတိုက်ခိုက်ခဲ့ခြင်းဖြစ်သည်ဟုဆိုသည်။
ထို့အပြင် စစ်အင်အား (၂၀၀)ခန့်ရှိစစ်ကြောင်းတစ်ကြောင်းကို ကြားဖြတ်တိုက်ခိုက်ခဲ့ခြင်းဖြစ်သည်ဟု ဖော်ပြထားသည်။
အဆိုပါတိုက်ခိုက်မှုကြောင့် စစ်ကောင်စီတပ်မှ ထိခိုက်သေဆုံးမှုရှိမရှိကို ဖော်ပြမထားပေ။ KIA သတင်းနှင့် ပြန်ကြားရေးဌာန အနေဖြင့် တိုက်ပွဲသတင်းများ ဖော်ပြရာတွင် ထိခိုက်သေဆုံးစာရင်းများ ဖော်ပြလေ့မရှိပေ။
Public Service Announcement
ရှမ်းပြည်မြောက်ပိုင်း ဒေသ အများစုကို အာဏာသိမ်းစစ်ကောင်စီက စစ်အင်အားဖြည့်တင်းလာ၍ အောက်တိုဘာ ၁၆ရက်ကလည်း KIAနှင့် စစ်ကောင်စီတပ်တို့ တိုက်ပွဲဖြစ်ပွားခဲ့သည်ဟု ဆိုသည်။
KIA တပ်မဟာ(၈)နယ်မြေ တပ်ရင်း(၅)ဒေသသို့လည်း အာဏာသိမ်းစစ်ကောင်စီတပ်က အောက်တိုဘာ ၁၇ရက် ညနေပိုင်းတွင် တိုက်လေယာဉ် ၂စီးဖြင့် ဗုံးကျဲတိုက်ခိုက်ခဲ့ကြောင်း KIA သတင်းနှင့် ပြန်ကြားရေးဌာနက ဖော်ပြခဲ့သည်။
