အကြမ်းဖက်စစ်ကောင်စီက ပြည်သူလူထုနှင့် ပြည်သူ့ကာကွယ်ရေးတပ်ဖွဲ့(PDF)ကြား သွေးခွဲရန်ရည်ရွယ်ပြီး ကလေးငယ်နှစ်ဦးသေဆုံးပြီး တစ်ဦးအပြင်းအထန် ဒဏ်ရာရရှိအောင် မိုင်းခွဲခဲ့ကြောင်း မုံရွာမြို့နယ်ပြည်သူ့ကာကွယ်ရေးတပ်ဖွဲ့ (MPDF)က အသိပေးထုတ်ပြန် သည်။
ထိုဖြစ်စဥ်မှာ အောက်တိုဘာ ၂၄ ရက်က မုံရွာမြို့ အ.ထ.က (၂) ကျောင်း တောင်ဘက်လမ်း၌ အကြီးစားပေါက်ကွဲမှုမှတစ်ဆင့် ကလေးငယ်သုံးဦး ထိခိုက်သေဆုံးသည်အထိ စစ်ကောင်စီက လုပ်ဆောင်ခဲ့ခြင်းဖြစ်သည်။
ပေါက်ကွဲမှုဖြစ်စဥ်တွင် မျက်မြင်တွေ့ရှိခဲ့သော ဒေသခံများ၏ ဖြေကြားချက်အရ နံနက် ၆နာရီမှစ၍ ပေါက်ကွဲမှုဖြစ်ပွားချိန် နံနက် ၈နာရီ အထိအခင်းဖြစ်ပွားရာ လမ်းကြားတွင် ပစ်စတိုသေနတ်ခါးကြားထိုးထားသော အရပ်ဝတ်စစ်ကောင်စီတပ်သားများ အသွားအလာပြုလုပ်ခဲ့သည်။
ထို့နောက် စစ်ကောင်စီယာဥ်သုံးစီးသည် ပေါက်ကွဲမှု မဖြစ်မီ လမ်းကြားထဲ၌ပင် လူအတင်၊အချလုပ်ခြင်း နှင့် မည်သူခေါ်လာမှန်းမသိသော ကလေးငယ်သုံးဦးကိုလည်း အရပ်ဝတ်စစ်ကောင်စီတပ်သားများက အမှိုက်ပုံအနီး သွားခိုင်းခဲ့ကြောင်း ထုတ်ပြန်ချက်တွင်ဖော်ပြ သည်။
Public Service Announcement
ကလေးငယ်များ အမှိုက်ပုံအနီး ရောက်ရှိတွင် ပေါက်ကွဲမှုဖြစ်ကာ နှစ်ဦးမှာ နေရာတွင်ပင်ပွဲချင်းပြီး သေဆုံး၍ ကျန်တစ်ဦးမှာ ပေါင်ပြတ်သွားခဲ့သည်ဆိုသော ရင်နင့်ဖွယ် ဖြစ်ခဲ့ရကြောင်း MPDF က ဆိုသည်။
ပေါက်ကွဲမှုဖြစ်ပွားခဲ့သော နေရာရှိ ပြည်သူများ၏ ပြောဆိုချက်အရ ကလေးငယ်သုံးဦးစလုံးမှာ အခင်းဖြစ်ရာ ပတ်ဝန်းကျင်မှမဟုတ်ကြောင်းလည်း MPDF က အတည်ပြုသည်။
ထို့ကြောင့် ပြည်သူလူထုနှင့် ပြည်သူ့ဘက်တော်သားတော်လှန်ရေး အင်အားစုများကိုတစ်ဖက်လှည့် သွေးခွဲလုပ်ဆောင်သော စစ်ကောင်စီ၏ အောက်တန်းအကျဆုံး လုပ်ရပ်ဟု မုံရွာမြို့နယ် ပြည်သူ့ကာကွယ်ရေးတပ်ဖွဲ့ က သတ်မှတ်သည်။
