ရှမ်းပြည်နယ်တောင်ပိုင်း ဖယ်ခုံမြို့နယ် မိုးဗြဲမြို့၌ ယနေ့(အောက်တိုဘာ၂၉) နံနက်ပိုင်းတွင် ပစ်ခတ်မှုများ ဖြစ်ပွားနေပြီး စစ်ကောင်စီတပ်မှ ပစ်ခတ်သော လက်နက်ကြီးကြောင့် ပြည်သူအချို့ ထိခိုက်ဒဏ်ရာရရှိခဲ့သည်။
ဗိုးဗြဲမြို့ သစ်ယာကုန်းရပ်ကွက် အကျော် တောင်ယာခင်း သရက်ခြံထဲသို့ လက်နက်ကြီး ကျည်ကျရောက်ပေါက်ကွဲ၍ အရပ်သား နှစ်ဦး ထိမှန်ဒဏ်ရာရရှိခဲ့ကြောင်း ကူညီရေးအဖွဲ့တာဝန်ရှိသူ တစ်ဦးက ပြောသည်။
“နှစ်ယောက်ထိထားတယ်။ ပြည်သူ အမျိုးသမီးတစ်ယောက်နဲ့ အမျိုးသားတစ်ယောက်။ အမျိုးသားတစ်ယောက်ကတော့စိုးရိမ်ရတယ်”ဟု ၎င်းက ဆိုသည်။
တိုးတက်သော ကရင်နီပြည်သူ့အင်အားစု(PKPF)က မိုးဗြဲမြို့ ယနေ့ပစ်ခတ်မှု အခြေအနေကို ဖော်ပြရာ လက်နက်ကြီးကျည်ထိမှန်၍ ပြည်သူတစ်ဦးအသက်ဆုံးရှုံးခဲ့ရသည်ဟု ဆိုသည်။
Public Service Announcement
မိုးဗြဲပြည်သူများ မလိုအပ်ဘဲ အပြင်မထွက်ရန် Mobye Rescue Team ကလည်း မေတ္တာရပ်ခံထားပြီး လက်နက်ကြီးထိမှန်ပါက Mobye Rescue Team သို့ ဆက်သွယ်ပေးရန် အသိပေးထားသည်။
ပြီးခဲ့သည့် ရက်ပိုင်းကလည်း မိုးဗြဲမြို့တွင် ပစ်ခတ်မှုများဖြစ်ပွားခဲ့ပြီး စစ်ကောင်စီတပ်မှ မြို့ပေါ်သို့ လက်နက်ကြီးများ ရမ်းသမ်းပစ်ခတ်ခဲ့၍ အရပ်သား တစ်ဦးသေ၊ ကလေးငယ်နှစ်ဦး အပါအဝင် ၅ဦး ဒဏ်ရာရခဲ့သည်။
