ကုလဆိုင်ရာ အမေရိကန် သံအမတ်ဟောင်းနဲ့ စစ်ကောင်စီခေါင်းဆောင်တွေ့ဆုံ ၊ ကိုဗစ်ကိစ္စဆွေးနွေးတယ်လို့သာ ထုတ်ပြန်

ကုလသမဂ္ဂဆိုင်ရာ အမေရိကန် သံအမတ်ဟောင်း ဘီလ်ရစ်ချက်ဆန်ဟာ ဒီနေ့ မနက်ပိုင်းက စစ်ကောင်စီခေါင်းဆောင်နဲ့နေပြည်တော်မှာ တွေ့ဆုံလိုက်တယ်လို့သိရပါတယ်။

စစ်ကောင်စီဘက်သတင်းထုတ်ပြန်ချက်မှာတော့ ကိုဗစ်ထိန်းချုပ်ရေးအခြေအနေ နဲ့ပတ်သက်ပြီး ဆွေးနွေးကြတယ်လို့ ဖော်ပြထားတာတွေ့ရပါတယ်။

ခရီးစဉ်မတိုင်ခင် ဘီလ်ရစ်ချက်ဆန် ရဲ့သတင်းထုတ်ပြန်ချက်မှာတော့ ဒီခရီးစဉ်ဟာ ကိုဗစ်အတွက် ကူညီဖို့အဓိကထားမယ့်ခရီးစဉ်လို့ဆိုထားပါတယ်။

ဘီလ်ရစ်ချက်ဆန်ဟာ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ရဲ့မိတ်ဆွေဖြစ်ပါတယ်။

Public Service Announcement

ဒေါ်အောင်ဆန်းစုကြည်နေအိမ်အကျယ်ချုပ်ကျနေတုန်းက လွတ်မြောက်ရေးအတွက် တောင်းဆိုတာ ၊ စစ်အစိုးရ ကို အရေးယူဖို့ကိစ္စတွေမှာ ဘီလ်ရစ်ချက်ဆန်ဟာ တက်တက်ကြွကြွပါဝင်ခဲ့သူဖြစ်ပါတယ်။

ဒေါ်အောင်ဆန်းစုကြည်အာဏာရလာပြီး ရခိုင်အရေးအတွက် ၂၀၁၇ မှာ ဖွဲ့စည်းတဲ့ ရခိုင်အရေးအကြံပေးအဖွဲ့မှာ ဘီလ်ရစ်ချက်ဆန်ကို ထည့်သွင်းဖွဲ့စည်းခဲ့ပါတယ်။

ဒါပေမယ့် အဲဒီအဖွဲ့ရဲ့ အစည်းအဝေးမှာ ရိုက်တာ သတင်းထောက် ၂ ဦးလွတ်မြောက်ရေးနဲ့ ရခိုင်အရေး ကိုင်တွယ်ပုံတွေနဲ့ ပတ်သက်ပြီး ဒေါ်အောင်ဆန်းစုကြည်နဲ့ အဆင်မပြေကာ အဖွဲ့ကနေ ဘီလ်ရစ်ချက်ဆန်ဟာ ထွက်ခွာသွားတာဖြစ်ပါတယ်။

လက်ရှိသူရဲ့ခရီးစဉ်အတွင်းမှာ ဘယ်သူတွေ နဲ့တွေ့ဆုံဖို့ရှိဦးမလဲဆိုတာတော့မသိရသေးပါဘူး။

စစ်ကောင်စီကတော့ ဒေါ်အောင်ဆန်းစုကြည်နဲ့တွေ့ဆုံခွင့်တောင်းဆိုတဲ့ အာဆီယံ ကိုယ်စားလှယ်ကို ငြင်းဆိုထားတာရှိပါတယ်။