ရန်ကုန်မြို့ရှိ ဘားနှင့် ကလပ်အချို့ကို ယနေ့(နိုဝင်ဘာ ၆ရက်)စ၍ ယာယီပိတ်သိမ်းရန် အကြမ်းဖက်စစ်ကောင် စီအဖွဲ့က ညွှန်ကြားလာကြောင်း အဆိုပါဆိုင်တာဝန်ရှိသူများက ပြောသည်။
မည့်သည့်အကြောင်းပြချက်ဖြင့် ပိတ်ခိုင်းသည်ကို မသိရကြောင်းနှင့် အနည်းဆုံးသုံးရက် ယာယီပိတ်သိမ်းရမည်ဖြစ်ကြောင်း ၎င်းတို့က ပြောသည်။
“ရေပေါ်ဆီလူတန်းစားတွေ၊လူချမ်းသာတွေ အသွားများတဲ့ ဘားတွေကို ဒီနေ့စပြီး ပိတ်ရမယ်လို့ ပြောတယ် ”ဟု ဘားတစ်ခုမှ ဆိုင်မန်နေဂျာတစ်ဦးက ပြောသည်။
အင်းယားရိပ်သာလမ်းတွင် ဖွင့်လှစ်ထားသည့် Malibu Barက လတ်တလောအခြေအနေများအရ ၎င်းတို့ဘားကို နိုဝင်ဘာ ၇ရက်စတင်ပြီး ခဏပိတ်သိမ်းကြောင်း အသိပေးထားသည်။
ဟံသာဝတီအဝိုင်းအနီးရှိ Beer VIBE ဘားကလည်း နိုဝင်ဘာ ၆ ရက်က စတင်ပြီး ပိတ်ထားမည်ဖြစ်ကြောင်း ဆိုထားသည်။ လင့်ခ်လမ်းနှင့် ဓမ္မဇေတီလမ်းထောင့်ရှိ Regional Barကလည်း အထက်ပါအတိုင်းကြေငြာထားသည်။
ဘားနှင့် ကလပ်အချို့ကို ယာယီပိတ်သိမ်းခိုင်းသော်လည်း စားသောက်ဆိုင်များကို ပိတ်သိမ်းခြင်းမရှိဘဲ ဆက်လက်ရောင်းချခွင့်ပြုကြောင်း စားသောက်ဆိုင်မန်နေဂျာများထံမှ သိရသည်။
ထိုသို့ပိတ်ခိုင်းခြင်းသည် ကိုဗစ်ရောဂါနှင့် သက်ဆိုင်မှုမရှိဘဲ စစ်ဖက်အနွယ်ဝင်သားသမီးများကို ပစ်ခတ်လုပ်ကြံမည်စိုးရိမ်သောကြောင့်ဖြစ်နိုင်သည်ဟု ဆိုင်မန်နေဂျာတစ်ဦးက ပြောသည်။
အကြမ်းဖက်စစ်တပ်၏ စီးပွားရေးကြောထောက်နောက်ခံ မိုင်တဲလ်ကုမ္ပဏီ၏ ဘဏ္ဍာရေးအရာရှိချုပ်ကို အမည်မသိလက်နက်ကိုင်များက နိုဝင်ဘာ၄ရက်တွင် ပစ်သတ်ခဲ့သည်။