ဂန့်ဂေါနယ်မွှေ့လယ်ရွာတွင် စစ်ကောင်စီတပ်က လမ်းဘေးနေအိမ်များကို မီးရှို့ဖျက်ဆီး

မကွေးတိုင်း ဂန့်ဂေါမြို့နယ် မွှေ့လယ်ရွာရှိ လမ်းဘေးနေအိမ်များကို စစ်ကောင်စီတပ်က နိုဝင်ဘာ ၇ရက်တွင် မီးရှို့ဖျက်ဆီးသွားကြောင်း ဒေသခံက ပြောသည်။

ဂန့်ဂေါ-ကလေး ကားလမ်းရှိ မွှေ့လယ်ရွာ လမ်းဘေးအနီးတ၀ိုက် အဆောက်အဦ ၁၅လုံး မီးရှို့ဖျက်ဆီးခဲ့ ရာ လူနေအိမ် ၅လုံး၊ ကြက်ခြံ နှစ်ခြံ နှင့် နွားစာတိုက် ၁လုံး ပြာကျပျက်စီးခဲ့ပြီး ကျန်အဆောက်အဦများမှာ အနည်းငယ်သာ မီးလောင်ခဲ့သည်ဟု ဒေသခံက ပြောသည်။

အကြမ်းဖက်စစ်ကောင်စီတပ်သည် နိုဝင်ဘာ ၅ရက် နေ့လည်ပိုင်းကလည်း အဆိုပါလမ်းရှိ နှမ်းခါးရွာသို့ ဝင်ရောက်ပြီး နေအိမ်တံခါးများကို ရိုက်ချိုးဖျက်ဆီးကာ ပြည်သူလူထုပိုင် ပစ္စည်းများကို ခိုးယူသွားကြောင်း နှမ်းခါးလူငယ်အဖွဲ့က ထုတ်ပြန်ခဲ့သည်။ ထို့ပြင် ရဲလှရွာ လမ်းခွဲရှိ အိမ်တစ်အိမ်ကိုလည်း စစ်ကောင်စီတပ်က မီးရှို့သွားသည်ဟု ဖော်ပြထားသည်။

စစ်ကောင်စီတပ်သည် စက်တင်ဘာလကလည်း အဆိုပါ လမ်းရှိ ကျေးရွာများကို ဝင်ရောက်စီးနင်းပြီး နှမ်းခါး၊ မြင်သား ရွာများ၌ နေအိမ်များကို မီးရှို့ဖျက်ဆီးခြင်း၊ ဒေသခံများကို တိုက်ခိုက်သတ်ဖြတ်ခြင်းများ လုပ်ဆောင်ခဲ့သည်။ နှမ်းခါးရွာကို စစ်ကောင်စီတပ်က ၃ကြိမ် မီးရှို့ခဲ့ရာ နေအိမ် ၆၀ကျော် မီးလောင်ပျက်စီးခဲ့ကြောင်း ဒေသခံက ပြောသည်။

Public Service Announcement